MOU VANKEN
by S. Nengdoupau, New Delhi
Ei Zomi te, pu-leh-pa apan singtaang dawn a kholian loulou a teeng a khosa te ihi uhi. A koi mah dang valak beh nading omtuan lou ban ah ikhohsa uleh isepsuah sa lel mah utoh ipoi mohte uh thil bangkim innsung vaitoh kisai ina saifel zel uhi. Tanu (mou) ikhak chiang uhiam, tanu ten pasal aneih chiang un, anung sawt lou kumkhat hiam ahih kei leh ikhak khiak kum sung mah in tunsa chiin voktal tuak vual li vel igoh uhi. Hih hunin mou man leh mual genna bangmah omnai tadih lou hi. Tua nung hun bangtan hiam hong kivei in, kum thum kum li zoh chiangin sialkhumsa chiin, bawng hiam sial hiam ahih kei leh voktal tuuk nga apan atunglam kigoh hi. Hih hunin man leh mual tungtaang gen felna zong omngal hi. Hih hun (sialkhumsa goh hun) pen a khua atuam dungzui in hihdan kibang vek sipsip kei mah leh ipai dan taangpi uh aki bang vek hi. Tua ni in sa seeng, sathau biing, tu (lou khohna), nam (seeng puakna), puanpi/puanbu, lelpi ahih kei leh singkuang (singlem) leh tua ni a sakigou, asa atam zaw tham toh pua in mou leh akuan lamte ipai sak uhi. Hibangin akua mah in haksa salaw lawmlawm lou in a tanu te uh nakha khe zel uhi.
Tu chiangin, atam zaw te singtaang dawn apan khosakna nuamzaw delh in tampi ten Lamka jang inaih uhi. Hibang a Lamka jang ihong naih chiangun, atam zawte khosak siam ban ah sum leh pai zon siam in singtaang dawn a ten hunlai toh teh vual louh khop a neih leh lama khanglian a khosa hoih pawl tampi i om uhi. Hichi kal lak a lah, a khente singtaang dawn a tenlai sang mah a zong hoih zaw tuan lou ban ah khosak na buai in niteng zing leh nitaak huan ding toh kisual khop a khosa pawl zong ki om ve ve hi.
Mou vanken tungtaang en nawn le-hang, jang gam inaih ziak mah uh adiam, nidang a, kol leh vai, Meitei igente mah uh ibang simta mawk uhi. Aziak ahih leh, kol leh vai, Meitei ichih ten ta numei aneih chiangun amou vanken ding uh lungkham pih in dah thei mah mah uhi. Adik a gen in tanu deih louhna/neih ngam louh na ziak in, Punjab, Haryana, Delhi leh vaigam atam zawte ah numei tawm zaw a, pasal 1000 lak ah numei 700 leh 800 kikal lel khawng om uhi. India tanchin bu Times Of India,23rd Jan 2015, issue ah Maneka Gandhi in hichiin chi hi, “…tuma kum bangzah hiam paita apan, Haryana state sung khua 70 te ah numei khat zong pianglou…” chi tel hi. Tua mun a sex ratio a et chiang un pasal 1000 lak ah numei 700 lel om chi uhi.
Ei Zomi Lamka jang naih a teengte dinmun en nawn le-hang, khosakna leh neih leh lam a changkaang zaw deuh ihih dungzui un, tanu (mou) khakna tung taang ah kol leh vai, Meitei igen te mah utoh kibat dek natan khat om hileh kilawm maw. Akua ichih na tuan hilou in, anei zou deuh ban ah ule-nau sang gam hau, lawm-leh-vual haute ngial houh apoi moh lou tantan uh kipia in, tua van teng toh let zenin pasal te innsung ah lut tultul mai uhi. Hichi kal ah u le-nau panpih tu ding neilou ban ah mahni a zong khosa khop teek, nu-le-pa tampi zong om ve-ve a, tuaten a tanu te uh akhak chiang un innkiim innkiang te laka zon theih na na zongin leiba tampi toh theih tawp suahin pang uhi. Tua theih tawp suah leh hih theih tawk a ahih nung un zong a keng dingpen in alawm anei zoute vanken toh ama kending hong teh kak chiangin thupi salou a, lungkim zou lou in nu leh pa phut beh,ngiat beh zaw mah lai. Tua nu-le-pan theih tawp suah a akaih khawm sun sun te uh thupi salou lua a pasal te innsung a lutpih dia kizumpih pawl bang om thei hi. Hichibang a i om touh zel un tuh ei lak ah zong tunung chiangin ta numei neih ziak a kol leh vai, Meitei igente mah bang a lung ziin na hong piang hak lou ding din mun in i om uhi.
Hichite kal ah mou vanken tung taang a thil kipiak te ki hawm thoh sak, ahih kei leh tup leh ki lam et tan hihsak kisa lou in u leh nau kal ah zong kimoh sakna om thei zaw mah lai hi. Dan siangthou chizen mah in biak inn sung ah pastor leh mipi te mai ah va kiteeng zizen mah le-hang, ineih ilam suang a, ahih kei leh neih-le-lam deihna leh lung gulh na ziak a kiteeng ihih in tuh dan siangthou ichih pen siangthou zoulou deuh ding mah abang. Hoih tak a i et vel-vel leh ilak ua kiten na program hong om peuh mah chiangin, nidang bang lou in numei lamte igensa bangin pasal lamte sang in nasatak a kiging leh kisa khol in buai zaw mah uh abang ta mawk hi. Nidang a, min mou a neih a, kitenna a om chiangin, a pasal lam ten (mou neipa) bawng hiam vok hiam gou in khosung mipi vaak uhi. Amou lamte adin hichipi lawmlawm a buai na bang mah omvet lou hi. Adang te pen pupa ngeina dan in baih lam takin saifel tou zel uhi.
I pu-ipa dan ahoih hiin izui ding chih na hizaw lou in, aziak bel zui nuam in deih le-zong tuni chiang chiang a ihih theih nawn louh bang bang hiam aom ban ah avan ding zong muh zoh nawn louh himai thei a, himah leh hih mou vanken toh kisai in, a zawng apha in baih lam deuh a zuih theih leh zuih zoh dingin i nam heutu ten bang hiam hih tung taang ah a kilawm tan hong bikhiah sak thei lou ding a diam maw. Pu Editor nang bang nachi ngaih a.
KITEN NI (Mou lop ni): A ban ah en nawn le-hang, mou lopni a mou khakna toh thuah pen thu khat a gen in lem taang mahmah leh time save mahmah a theih in om hi. Hundang leh nituam a va tha pai nawn se lou a nikhat leh hun khat thu a thil teng hih fel sai fel vek a hih manin. Himah leh kei namuh danin mou lopni a mou khak na toh thuah pen alem louh natan leh anop louh natan khat om hiin ka thei hi. Kiten na a om chiangin biak inn a va kiteeng zou, mou neipa iin lam manoh in ipai ua, moupa leh mou nu ban ah a thian te tuak utoh mipi mai a tukhawm in, tuahun takin tuh mipi mou lawm ten zong nuam isa uhi. Tua mou lawm nuam salel lengkhawm hiam a i om lai un, dak kal nih zong ching nai lou in, mou khak khiak hun chiin mou leh a thian nu ban ah a numei lamteng in mou lop namun hong nutsiat san vek mawk uhi. Mou lop hun ding lah sawt law lai, mou nu omlou a moupa kia mipi mai a tu geugou imuh chiangin a et anop louh ban ah akim lou om ahih manin mipin zong nuam kisa thei taktak nawn lou hi.
Kei na ngaihdan leh kei nahoih sakdan intuh, mou lop ni ngal in a pasal lam hiin anumei lam in tua mou lop na mun ah ihun uh pevek in lawm khawm, nekhawm takhawm in, a numei lam hiin a pasal lam hita leh tua mun a kiha sotna thu kigente ngai khe khawm thei le-hang uthuai kasa hi. Khanglui te chihdan leh sisan zong pal nai lou a, thil bangkim kin le buang a nikhat hunkhat thu in hih fel sai fel vek isawm uhi. Kei mimal ngaih dan intuh alou thei lou a, azing athai ni a, koi lam hiam gam lapi a sawtpi omdia, a kiteeng khin tegel zin mang pah ding chi ihih zen kei leh, mou khakna pen kiten ni teitei hikei hen la, anung kha nih hiam kum khat hiam alang tuak tuak a ilem taan hun in gel khawm in, tua mou khak namun ah a kuan lam hiin a inn teek lam hita leh nekhawm takhawm in kithuah khawm le houh a nuam zaw diam. Tu lel a paidan atuh kuan lam ten lah mou kha lamte annkuang umpih khalou, tua mah bang a mou kha lam ten zong mou lop na annkuang umpih kha lou in i om mawk uhi. Hichibangin, sungta putu dia kizong a, ziiding ta ding in kila zizen mah le-hang zong annkuang sawk khawm lou in i om mawk uhi. Nidang a vachih chih pen hai huai lua khanglui huai lua ichi zel diam ah, a ziak bel nidang a, mou i lop chiang un, mou lop ni nana chu mounei pa te inn lam ah innteek hiin akuan lam hita leh mou lawm khawm ban ah tua mun ah pastor, hiin upa thugen siam tampi ten ki hasot na thu a gente uh ingai khe khawm ua, tua ban ah annkuang umkhawm, nekhawm takhawm in i om uhi.
