“He u tuzan a kipat in nupi ka hitai!!”
By John Suantak

Ka phone lupna tún ah ka kawi chuh a hung git leh ka khanglo a, awl in kenle ka phone chuh la’n ka et leh sms khat a hung lut ah. Zingkal thatha bang thu a ta diam ti’n nidang ah sms en ngai beklo ka hiziak in thupi dingin ka kawi puai. Mit ha haksa sa kawmkawm in ka et leh “He u tuzan a kipat in nupi ka hi tai!!” ti ka mu. Ka mit nuai chuichui thak in khatvei ka en thak a, a no.chu ka et leh Nunnem a kipat ahi ti ka heta. Zingkal matak ahiziak in chawmkhat kilum nalai heh awh ti’n ka kisa thak a, himaleh ka sms mu chun ka ngaituana zosia a luadim tak ziakin imut theina ding a hi ta puai.

Thodawk diaklo in ka phone chuh ka la, “Ka hun kipakpi hi. Nupa’n hinkhua nuamtak hung mang un” ti’n ka reply a, a no.le ka delete ngal hi. (Phone a kipat a no. ki delete ziang lehle I ngaitak te no.chuh ki byheart ahia, call khak kit chuh bailam mama!!) Ka phone ah limlak te ka en a, whatsapp ah ka kihiat lim lai ua ka kihona teu bang ka simthak ka sim thak a, ka gallery bang Nunnem photo album tithei ding hial khawp ah limlak tampi um te chuh, a banban ah delete ding ka ti himaleh ka delete taktak kit ngam diak puai.

I mit I sing leh Nunnem, I ha leh lah I etna lamlam Nunnem ngen ma hi zel!! A bang hileh lungthim suk fresh na kawm in ti’n bathroom lam ka zuan phei a, kisuthiang in walking dingin ka vak dawk hi. Ka bil ah earphone bul in, Nunnem in whatsapp ah a laa nalsak a hung thawt “Nang chouh la ki ka kinepna….” ti la ngai kawm in HQ veng sak lam in ka chiato hi.
Nunnem ahileh kei sang a chapang zaw tham ahia, himaleh a piting a, thasiat hun tamtak ah ei thamuantu a hi. Ka ngaituana um chuh, ki lungsiatpi, kingaipi te haw bang le senna leh ngaituana hukdimtu mai hilo ah khat leh khat, sum leh pai khello, pauchapna bek ah ki panpitua thei te hi mi ngaisan um kasai. Veng sung ah nungak fel leh kamthiam ah hiat a hia, a nui phat leh a kipak um diak a bang hi. Nungak fel leh kitup chuh gen ngailo ah mite’n he ziang ahiu ka ti lungthim hi.

Insung haksat ziak in lekha sangtak a zilo pua, himaleh a hiat na tiang hawitak ah mang thei mi khat a hi. Lekhathiam iti hi degree sangtak va nei ngailo in, hiatna khawvel umdan tawh ki adjust thei, leh mi tawh kihethiam te ahiu ti mi khat gen ka hedawk vawngvawng hi. Ama chuh Facebook ah kamu khak a hia, active talua lo maleh hun awngkal in ka chat sek ui. Facebook vel ah active mama leh mi zosia hopi thei leh dating thei ahilo chuh a ngaisan um kasak na khat a hi. Ka hopi lim lai a chun ei reply ngai bek pua, keile kisuangla hat kahi ziak in hawisa thim maleng ka hopi tuntun ngam diak puai. Zillai program leh YVA program vel kipang mun ahiziak in a tak inle awl-awl in ka hung kihe deudeu tau a, a no.le Zillai Day ni Usher ah a pan ni ka lak a hi. Pawlpi I neiteu panlakna lunglut a, mawpuakna kipia hawitak ah sem leh gam leh nam ngaina te nasep pakcha thei chuh ti’n ka lunggel in ngaisanna a kibelap diak hi.

Khatvei ka call leh a pick-up pua, kenle call kit ngamlo kisuangla kawm in phone chuh ka kawi hi. A zing ah facebook ah online a hi ka hiat ziak in, “Hi….” ka ti leh a hung dawnhu phat in kenle “Zani tak ah ka hun call la pick-up pua?” ka ti leh “Insung kikhawpna ka nei ziak ua a hi. Call back di ka ti leh balance ka nei pua, ei ngaithiam in he u” ti’n ei dawnhu hi. Insung maicham ngaina nungak tangval te khel ah ngaisan um di ka he puai kati nuam hial hi….. Kei le reply kamu chuh nui thim heuhau kawm in, sawtpi chat pi nuam mama himaleng nasep ding ka nei hi ti’n fel ei sak khak leh ti kawm in sep ding neilo pi’n ka log-out san tai. Mi fel chuh a ngaisanglo kuama umlo in ka hiai…ken chuh….

Zia kipat chun awl-awl in ka hopi sek a, a chang leh a inn un ka va khawlai leng zel hi. Khatvei a Computer uh sia ka va tuak kha, thiamlo ma leng zia pentak chuh ka va siam thei hi. Thiam ei sa mama’u, a naupa bang a kipak mama hi. Pathian lemguat hintin, zia kipat chun ei ngainatna a sang diak in ka hiai. Pathian in mihingte hi a dawidan uh gunchu tak ah a bawl nak ua leh lampi siampiak sek ahi ti ka geldawk hi.

A pa suapipa chanu pawsal nei ding ziak in a buai mama, kenle kithuapi theina um dandan in ka kithuapi zel hi. Ka bawl thei sunsun banner design sak, programme typesetting tivel ka bawlsak a, a kipak mama in ka mui. A ma a ding ah a cousin pawsal nei ding thakdawna chuh a zingkal tha, annek ma kibawl a hia, program chuh mite nasep subuailo ding ah kituptak cha zingkal tha a siam dan uh a hi. Mihing kipung zel ah, kichenna, kithakna, suangdaw hawn leh adang dang te haw mite hunbi – program ahiloleh nasepna subuailo ding ah bawl thei chuh ka ngaisan lamtak a hi.

 Zia ni sunlam chuh hun awng a um ziakin kenle hun lemchang ah la in, ka gari nei sunsun Pulsar bike in ka pawtdaw pi hi. Lamka chuh I hiatsa gual un I it leh ngai cheng tawh hun awl mat na ding mun a vaang mama a, Khuga Dam ah va chia di lah mi tam dingin ka gingmaw a, thu pawimaw tak gen nuam ka hi ziak in lemchang ka sa pua. Pearson khawsak ah waterfall lah zu leh khamthei bawlte tamsek a ti ziak un minsiat um kasa… a tawp in, a la chul ta hial ah I ngai uh Rochung bangla atisek uh, Sielmat lam in ka taisuk pi ah. Pathian lemguat hintin, a mun chuh a nuam a, a thawveng a, holiday ni a hilo ziak in midang a um puai. Pukhri hawitak khat a um a, zia pang achun Nunnem chuh ka chutpi hi.

Kenle zia hun lemchang chuh mansua nuamlo in, thanuam mama leh ti kithing pumpum leh aw kithing dildil kawm in, “Nunnem... thu khat ka gen nuam a, la lunglo lam ahileh ei ngaithiam in… Ka hung mu masak ni kipat in ka hung lungsiat a, la lungsiatna a lemthei leh kawt lei hawn piak thei diam?” ti’n kithing pum in ka gen dawk ta mai hi!! A maisua et a chun ka thugen chuh negative ding a bang tai…a maisua a mual a, lah, bangma dawnhuna a hung piak pailo ziakin ka kisuangla mama hi. “He u, ken sawtpek akipat akhan ka hung lungsiat ta, numei ka hiziak in hung gen ziang ka la nuam pua, tuni la hung gen chuh kei a ding ah ka lungtup mualsua na khat ahi.” ti’n kipak mel kawm in a mittiu a gal pan hi. Hurray….ti nuam hial in kipak ziakin bangma le ka gendawk ziang thei puai…. Ka kawi a, a muk nem tak chuh ka chawp piak a, ama’n le nel tak mai in ei chawp thuk hi. “Lungsiatna hi pawsal in a gen masak khel ding tina a um puai… Numei leh pawsal hi mihing gel a hiu a, numei inle pawsal dawi masa thei a hi. Ngaidan diklo I la nei teu tulai khawvel ah paithak hun ahi tai. Kuama hiatlo kal ah lunggimna hi mite a dingin a haksa diak hi”.

Nunnem ka ngaisan na diak chuh, ka medu dan a hia, a inn ua ann ka nek ding sin leh ka du lam bawl a hemil ngai puai. Mihing te ki ngainatna etsak mawltak khat chu a du leh dulo zawng hiat a hi.  Ziagual ah ei care thei nungak ah nei chuh kei a dingin malsawmna khat a hi. Ki ngai, kinel leh kihetua ka hi tau a, maban chun kicheng ahi mai tai. Eile kum 30 kivalta, zi thei ma le kihita…. Chiana lam zosia lawi leh pai, chanaute zosia’n zi nei ding tilo gen ding a nei bek puau… Zia ziak ma achuh ki huphur deudeu ei diam aw ka ti lungthim hi…. Sial ek tawkha masate thugen vang chulah dik dingin ka gingcha…. Nunnem chuh ka kichengpi mai ding a diam le….

Sutzawp ding…..haha

(PS: Zia thu kizik hi, ziktu tuak khak himaithei, hilo maithei, midang tawh kituak kha a um leh tupmawng hilo a hi… Kituak kha mawk! in ei kawi piak mai un pls….. hehe)