Hill Areas Committee: Etkiikna
~ R. Sanga
Thupatna:
India Daan Bupi khenpi 371C-na dungzui a Manipur singtang mite hamphatna tuambiik bawlsak ahih toh kiton in Hill Areas Committee Order, 1972 India President lui, Shri. V.V. Giri in June 20, 1972 ni in New Delhi ah puangkhia a; Gazette of India, Ministry of Home Affairs, Government of India in agelhthoh in suahkhia hi. Thilhih diing (Scheduled) Lina tan om a, Thilhih diing Nihna nuai ah Sep-le-Bawl diingte (Scheduled Matters) (1) akipan (12) kikal ah Kahiangte [Department(s)] tuamtuam poimoh taktak leh singtang gam toh kisai khantouhna, neek-le-dawn (Economics) hitaleh nasep-silbawl kong bangkim ah tualsuak mite khantouhna diing hunkhop thuneihna piak in om hi. Huai thuneihna hunkhop piak a omte ahi diing bangtak a sepkhiak in om hia; om lou chih leh bang chibang dinmun geih a hiai, “Hill Areas Committee” om hi hiam? Committee Members 20 (Tribal MLAs tengteng) in tuni chiangchiang ah, hamphatna tuambiik deihsakna toh piak a om, Daan Bupi Khenpi 371C-na nuai a kipiate toh kisai poimohngaih taktak uh hi hiam? chih leh – Manipur Sorkar in bang dinmun a hiai, ‘Committee’ poimohtak koih hi hiam chih houlim zual le’ng chi i hi:
India Daan Bupi Khenpi 371C-na a thu kigelh limtak a sim chiat diing in ahoih mahmah hi. A lompi a gen in hiai bang in gelh le’ng a theihsiamhuai mai diam i chi ahi:
June 20, 1972 ni in Hill Areas Committee Order, 1972 kichi India Daan Bupi Khenpi 371C-na nuai ah Manipur State sung biik a zat diing “Deihsakna tuambiik” sehkhen (1) akipan (9) leh Thilhih diing Khatna akipan Lina tan tunkhawm a, thu poimoh taktak Daan dungzui a sepbuchin diing thilte India President lui, Shri. V.V. Giri in ana puangkhia hi. Thilhih diing abanban a kigelh Nihna (Second Scheduled) ah Sep-le-Bawl diingte (Scheduled Matters) (1) akipan (12) huapsung ah Kahiang tuamtuam (Departments) hunkhop Hill Areas toh kisai hiai, Hill Areas Committee thuneihna nuai ah guanlut in om hi.
1) Khantouhna leh Neek-le-dawn toh kisai Hill Areas huapsung a sum-le-pai zat diing bikhiahsa guanlut a om dungzui a sum zeektu ahi.
2) Hill Areas District Councils thuneihna leh nasepdan paizia bawlkhiakna toh kisai sembuchingtu ahi.
3) Inmun-Lou-mun diing gam-leitang piakkhiakna, gamluahtu diing geelna, gam zatdan diing, (gammang koihching chih louh siah) Lou a neihtheih gam, huangvulh ganta gamtatna diing a khennenna chihte tengteng Hill Areas huapsung a khawta-khawlian khat peuhpeuh ah HAC khut ah thuneihna piak ahi.
4) Gammang koihching chih louh siah gammang sawngbawlna khat peuhpeuh HAC thuneihna leh mohpuakna ahi.
5) Lou bawlna diing toh kisai a tui-paina ahihke’h tui-luanna, tui-lam diing bawlkhetu ahi.
6) Singtang Lou-neihdan toh kisai zuih diing Daan bawltu diing ahi.
7) Khawsung kivaihawmna toh kisai Village Committees/Councils leh a thuneihnate uh bawlsaktu ahi.
8) Mipi damtheihna leh sianthouna (Public health and sanitation).
9) Hausate kiluahsawnna toh kisai aluahtu diing mi sepkhetu ahi.
10) Neih-le-lam gouluahtu diing geeltu ahi
11) Kitenna leh Kimaakna (Marriage and divorce).
12) Khawtang ngeinadante (Social customs).
Hill Areas Committee Order, 1972 dungzui a thilhih diing leh sepkhiak diing mohpuakna mumaltak a piak a om, Kahiangte (Departments) ngenteltak a etchetna anei mi khat peuhpeuh in hiai, Committee pen bangzahta a poimoh hi hiam chih ageelkhiak ngei a gintakhuai hi.
Hill Areas Committee in nasep-silbawl a mohpuakna aneihte Sehkhen 4-na ah sehkhen neunou khatna (1) akipan ngana (5) tan ah kiteltak a gelh in om hi. Sep-le-bawl diing khempeuh Hill Areas toh kisai ahih peuhmahleh Hill Areas Committee thuneihna nuai ah avek a koih in om hi. Singtang gam huapsung ah khantouhna nasep atamsem sepkhiak ahihna tungtawn a tualsuak mite humbit leh kepbit ahih uh baan ah; Amaute deihsakna tuambiik hamphatna piak in om uh hiam chih enkai a venbitna nasep hiai ‘Committee’ mohpuakna ahi.
Khantouhna Thilgeelte:
Kumnga Thilgeel (Five Year Plan) leh Kumsim Thilgeelte (Annual Plans) State Sorkar in thutanna abawlma ngei a Phaijang leh Singtang a sum zat diing atuam vilvel a gelfelsa diam a Hill Areas Committee mai ah aluikhiak diing ahi; huchi a hiai, HAC in velchian a hiai thilgeelte toh kisai thutanna bawl ahihma a ‘Committee’ ngaihdan pen pomsak diing ahi chih Sehkhen 6(1) ah kiteltak in kigelh dimdiam hi. Khatvei lel leng Kumnga Thilgeel leh Kumsim Thilgeelte (Five Year Plan & Annual Plans) Manipur Sorkar in Hill Areas Committee mai ah phaijang leh singtang gam a sum zat diing atuam a bawl tunitan chikmah in luikhe ngei nai lou hi. India Daan Bupi a kigelh hinapi, akigelh bang dungzui a sepkhiak a om lou chih pen thil lamdangtak ahi...!
Hill Areas toh kisai a thilgeelte sepkhiak a om hi hiam chih leh khantouhna bangchibang a om hi hiam chih State Sorkar in HAC ah kumkhat sung in livei apiaklut zel diing ahi chih Sehkhen 6(2) ah chiang huntawk in kigelh hi. Kum 40 vaal pailiamta mahleh khatvei lel leng masawndan zaksakna State Sorkar in Hill Areas Committee ah kum 1972 akipan tunitan khatvei lel leng pelut ngei het lou maimah hi. Singtang mite tengteng muhsitna leh simmohna toh kibang geih hi lou hiam chih hon ngaihtuahsak maimah abang hi...?
State Sorkar in Hill Areas Committee Bang Dinmun Ah Koih Hi Hiam?
Manipur Legislative Assembly (Hill Areas Committee) Order, 1972 chih minvuah in “Rules of Procedure and Conduct of Business In Manipur Legislative Assembly Secretariat, Imphal in Manipur Inpi Vaihawmna a zat diing a Laibu abawl; India Daan Bupi Khenpi 371C nuai a deihsakna tuambiik hamphatna, Manipur Hill Areas huapsung a tualsuak mite a di’a Phualpi Sorkar in apiak dungzui in Manipur Sorkar in hiai, Laibuta sung ah, hamphatna leh tanpual, HAC nasepdan diing leh athuneihna gelhlut in abu in suahkhia hi.
January 21, 1972 ni in Manipur in Statehood, Kivaihawmna buching angah toh kiton in tualsuak (tribals) mite atuambiik a kivaihawm theihna diing deihna leh ngimna ziak in India Daan Bupi Khenpi 371C-na pansan in “Hill Areas Committee Order, June 20, 1972” ni in India President lui, Shri. V.V. Giri in hamphatna diing chituamtuam pia a, ‘Deihsakna Tuambiik Thupuan’ singtang mipite deihsakna ziak in theihsakna thupuan amaute a diing a bawlsak a; “Thupiak” (Order), Manipur Hill Areas huapsung teng a zuih diing, Daan bawl a om pen India Daan Bupi ah gelhlut in, ana puangkheta hi. Thuneihna saangtak pia a, Singtang mite amau-le-amau akivaihawm theihna diing uh ngimna leh deihsakna ziak a hiai, HAC Order, 1972 – Phualpi Sorkar in ana bawlsak ahih ngei agintakhuai hi....
Manipur Sorkar in Orders: Confidential & Cabinet Department, Rules of Business of the Government of Manipur, 1972 kichi Inpi leh Secretariat a akisaipih Departments tuamtuam in azat ua, azuih diing uh Daan tuamtuam (Rules) abawl pen Laibuta khat ah gelhlut dimdiam in Thupiak (Orders) leh Theihsakna (Notification) thusuah poimohtak bawlkhia hi.
Laibuta nihna, Manipur Sorkar in; Confidential & Cabinet Department, Business of the Government of Manipur (Allocation) Rules, 2009 kichi bawlkhia in: Sorkar in Theihsakna, “Notification” thusuah bawlkhe nawn leuleu hi. Hiai Laibuta sung ah Sorkar Kahiangte (Departments) kimtak in kigelh a; Nasep-silbawl leh thilhih diing tuamtuam toh kisai a akahiang omsawnte abanban in kivualsuk diudeu vek uhi.
Atung a kigen, ‘Allocation Rules, 2009’ pansan in Manipur Sorkar in Thupiak dang khat bawlkhe nawn zel hi: Orders Memo No. 26/20/2011 – TD (Misc): Imphal, the 11th July 2014, Principal Secretary (TA, H &SC), Government of Manipur in Thupiak (Orders) abawlna ah; Tribal Affairs, Hills & Scheduled Castes Development Department nuai ah kahiang neunou tuamtuam aban volhsukna ah hichi in kigelh hi:
SECRETARIAT: TRIBAL AFFAIRS, HILLS & SCHEDULED CASTES DEVELOPMENT DEPARTMENT
(i) Matters relating to Autonomous District Councils.
(ii) Matters relating to Hill Village Authorities.
(iii) Matters relating to Hill Areas Committee.
(iv) Matters relating to Tribal Sub-Plans.
(v) Matters relating to Cultural Research & Tribal Welfare Centre.
(vi) Matters relating to the prevention of transfer of tribal lands to Non-Tribals.
(vii) Matters relating to the prevention of exploitation of Tribals by Traders and Money Lenders.
(viii) Matters relating to other Welfare measures for Tribals.
(ix) Matters relating to project exclusively meant for development of primitive groups among Scheduled Tribes.
(x) Matters relating to Ashram Schools.
Hiai atung a Manipur State Sorkar Kahiang or, Department (i.e., Tribal Affairs, Hills & Scheduled Castes Development Department) khat nuai ah Ashram School toh dinmun kibang a “Hill Areas Committee” koih in om lel hi. HAC pen India Daan Bupi Khenpi 371C nuai ah President Thupiak dungzui a Thuneihna saangtak Daan toh kituak a piak a om lah hi ngal; Banghang a Department (Kahiang) neunou khat nuai a koih a om lel hi hiam chih ngaihtuah thamching petmah asuak hi...! Manipur Sorkar koihdantak a bel Hill Areas Committee dinmun niamchik a koih; Ashram Schools, Autonomous District Councils leh Village Authorities chihte toh dinmun kibang leh kikim a koih, Department khat nuai a khumkhawm vek in om uhi. Huaiziak a HAC pen nasemthei lou leh thuneihna nei lou bang mai a kum 40 vaal State Sorkar in akhum bichilh lel lai hi. Sahang kulsung a khum mahbang a tangthei lou a kul-khum toh kibang in koihden lailai hi. HAC Members, Tribal MLAs 19 + 1 = 20, singtang mipite sik-le-tang a Inpi a palai (Legislators) diing a teelching a om mite ngen, khenkhatte ngial houh – Cabinet Minister chih khawng, Parliamentary Secretary chih khawng ahi uhi. Amaute ngaihtuahna ah hiai toh kisai bangchi a koih uh hi hiam chih bel i theihpih het kei hi. Amaute a diing in bel a poimohngaih mahmah diing ua hoih ahi... Mipi Palaite muhsitna leh simmohna ahih toh kiton in, amaute teelchingtu mipite a diing a thil zumhuai tawpkhawk hi lou hiam hon chisak pha mahmah hi...!!
“Papen dinmun ah tapa koih in om henla; amah, a papen kha tapa dinmun ah koih in omtaleh – huai toh kibang geih ahi diing hi.”
Thukhitna:
Manipur Hill Areas huapsung ah Tribal MLAs 20 teng hiai, “Committee” ah Members ahi uhi. Amaute lak ah “Will Power” om peuhleh ahi diing bangtak in thilhih leh nasep chiteng ah amohpuakna uh Daan bang dungzui a piak a om teng beek chu hoihtak in asemsuah thei ngeingei diing uh chih a gintakhuai hi.
Singtang gam puahna diing leh lamtuamtuam a khantouhna diing toh kisai Hill Areas Committee (HAC) thilhih, nasep-silbawl diing abanban a gelhlutna (Scheduled Matters) ah akichian mohpuakna piak in om mahleh asepsuahna diing sum-le-pai thilgeel (Financial Business) toh kisai phaijang leh singtang gam a sum zeek diing, atuam vilvel Five Year Plan & Annual Plans bawl a, HAC mai ah tunitan State Sorkar in a luikhiak ngei louh ziak in nasemthei lou leh tha nei lou in omden hi. India Daan Bupi palsutna toh kibang geih ahi.
Manipur Sorkar in Kahiang (Department) khat nuai ah HAC koih maimah hi – Autonomous District Councils, Village Authorities, Cultural Research & Tribal Welfare Centre, Ashram School, etc., etc., toh dinmun kibang a kum 40 vaal koih a om: Kua mohna hi mahmah diing hiam? – Manipur State Government/HAC (Tribal MLAs)/ADCs/VAs/ Public/Mipite...???