INDIAN INDEPENDCE LEH ZOMITE
(Independence Day Thukhah)
By Chinzhou Vista
India in Independence a ngah nung kum 68th veina a hih dungjui in tuni'n Zomi te'n leng i lungsung uah mahni kimuanna leh kitoudelhna lungsim tuh thakin Hon Siamtu pahtawi ta dingin kisa lehang i chi uhi. Nam khat in a gamsung leh khotaang kivaipuakna (socio-cultural) a hihkhelh chiangin huai nam tuh nek-le-tak (economy) ah hong keniam a, thakhatin, a theihlouh kalin, namdangte' thunuai ah lut kha nak a, a gam leitang hauhsakna teng toh simgawp in hong om a; a kimuhkhiak pah keileh houh kum suan 4-na (kum 300) tanin leng khanglou lou in om den thei hi. India (Hindute) leng hichi banga ana om jiak un nam kivaihawm siam jaw British te'n kum 300 val vingveng (1600-1947 A.D) bang ana awp ua, gam-le-nam kivaipuak dingdan hoih taka a hilh khit un "Tun jaw amau in kawng bangkim ah kitoudelh (independ) thei ta unteh" chi'n August 15, 1947 ni in Independence pia uhi. Huai pen si-le-thau pawlh a, sisan suaha a sualkhiak uh ahi kei a, a hai luat te jiak ua British te'n ana simmoh kha uh ana hi jaw hi. Pandyas, Cholas, Guptas,Moghuls, Nawabs, Rajputs, etc. peuh kichi a, amau leh amau ana kidou gige leh pangkhawm loua gallaak a ana kineihtuah vengvung jiak un British te'n sangak palai tawm zokin tattuah a, thunun zou hamtang hi. A hai (barbarous) leh mawl (uncivilized) luat jiaka khang 4 bang British te'n ana uk nungin, gamdanga lai va sim Vaite (India mi) khenkhat in "E! Eilawi kihazatuah vengvunga i om nilouh uleh khanvual kipha zoulou ding hi ve aw, mi'n va-uk in hon lengmang san kha unteh" chi'n gam adia nna sem dingin hong kisa ua, a namsung uh hon puah ua, British Govt in a bawlsak thilhoihte ah kipahthu gen kawmin 'kou leng koumau in ka hih thei ta ding uh' chiin hong kipankhia ua, huaite lak ah Raja Ram Mohan Roy, Swami Vivekananda, Rabindranath Tagore, MahatmaGandhi, Jawaharlal Nehru, etc. te leng makaiin a pang kha uhi. British te'n leng a kivaipuak nading uh dan Regulations tampi bawlsak in nutsiat ua, "na kivaihawm theih kei zenzen ualeh k'ong kuan nawn ding uh" chiin vaikhak hi.
Tunia tawlkhat namdang thunuai a ana kun India in Independence a muhdan apat ei Zomi te'n i sinlai ding uh chu bang hihiam i chihleh bangdang hilou in hiai a nuaia zillai thumte ahi hi:
1. Nam phungpi leh khangthu theihtelna (DISCOVERY OF THE PAST) -
Zosuan kuapeuhin i hihna diktak uh theihchiang sem kiphamoh petmah ta hi. Mawka Zomi hih ek mawk pen Zo Ngeina leh thugousiahte leh tawndante theilou mi adi'n juauman suak a, nam khualna leng nei tuan lou suak ding hi. "Present is the past of the future" chi bang simin "Koia kipan, bang tan pai ta, tua bang dinmun a ding lel" chihte sut det det kawma kalsuan ding ahi hi.
2. Sum-le-pai, nek-le-taak, silh-le-teen, inn-le-lou, um-le-bel (ECONOMY) kitodelh - Kialpi khawngin pupate ana nuai ek kha a diam? chih khop hial dingin tuni'n genthei khutdoh in mahni gam Zogam sung mahmah ah Zomite i vakvai mawk uhi. EU Summit a 'ECONOMY is the backbone of Politics' a chih bang un i gamsung sum-le-pai dinmun en kisam mahmah hi. Gam kitoudelh leh khangtou hi dingin suah-le-tum, sim-le-mal a om i innveng gamdangte toh kisumdawntuah poimoh hi. Huai dingin singtang zoudawn leka khota tampi a kikhen teltul a i om pen hithei nawn kei ding a, khopi khat ah nuai 10 vang pha dingin kigawmkhawm ngai hi. "POWER AND INDUSTRY depends on the thickness of population in a particular region". Khopi neilou kuamah nam khukhia omlou hi. I khopite uh puah meng meng ni.
3. Khotaang kivaipuakna namdan venbit (Socio-cultural) - Nam chihte thuguk chu a kivaipuak dan siam uah kinga hi. Constitution/Regulations omlou, neilou piin nampi khat a ding sawt thei kei hi. Kivenbitna namdan neih louh jiakin nam tampite namdangte' dan nuai ah kitulut in namdang suak gai ta uhi. India in leng Independence mu chi'n constitution nei tuan kei mawk taleh, midang aa a zuih ngai ding a, Republic state hilou ding hi. Zomi te'n nampi khata dinkhiak i sawm un chu i khotaang leh namsung damna ding nam danbupi constitution phuan hun mahmah ta hi. China, Japan, Korea, Singapore, Myanmar, Malaysia, Thailand, Cambodia, Philipines, Laos, Vietnam, Taiwan ate' neih bangbang Constitution tuam kineih hun ta hi.
Huaijiakin, India Independence peuh i na kipahpih a, i na zatpih a, i na kisak bemten lai un Zomi te'n independence mu nai lou i hi zaw ding uam? I tenna Zogam pen India, Myanmar leh Bangladesh pe den maimah i ding uam? Hilou e.
A HON SUAKTASAK DING. GIABUNG JUN NI PUPA SATSA ZOLEI GAM, KHANGSAWN TAWISAWN LIM NGABANG BUAL NAN'G.
