I GAM HOIH NA DIA MIPIN PANLAK HUNTA:

Written by C.T Lian, ZOPA

Tuni in i district sung a teng mihing ten mailam a i nek leh tak zawnna ding uleh i khawsak nate tua sang mah a tamlou chikbek a ahong nop zawk deuh theihna ding lampi tamlou i gen ding uh.

Khovel hunte hongpai liam zel in, mihing ten ahun dung zui in i thil hihdante uleh i nasep dante uh hong kikhek zelzel hi. Kum tamtak paisa, ipi-pute hun lai a anek zonna pipen uh ahihleh "TU" leh "TEM" zanga " LOU BAWL" ahi. Lou adeih chiachia uh vat in loubawl in nekmuhna ana nei uhi. Hun hongpai zelin nek zondan hong ki danglam zek a, gam neitu hong omta hi. Hiai hun in bel nekmuh na ding in hausate' phalna in gam LOU abawl ta hi. Hiai hun ah tamtak ten TU leh TEM kia zang nonlou in, GAN LEH TRACTOR zang in nek hon muta uhi. Hun hong paitou zel in nekzonna hong tuam zek non a, miten lou bawl kia a nek zong nonlou in lehkha zil a a theihna uleh siamna zang in nekzonna hong kipan hi. Miten lehkha thei a lai ahong siam chiang un mite na/govt na sem in nek hon muta ua, laisiam ziak a nek muhna hong suak ta hi. Hichibang a thil hong kikhek tou non in, tuchiang in nekmuh nading a malai a LOU kibawl sek sang mah in, mi' nasepna ki pibawl zawtham ta hi. Tuchiang a miteng in nekmuhna ding a i et uh "ilouma" uh govt hong suak a, huaiziakin tuchiang in mipiten nek i muhna ding uleh i sepna ding uh GOVT kiang a i phutkhiak uh ngaita hi. Hichi a nek i muhna ding un, mipi'n galdou bang a govt i sual a i thuzoh hoih uleh nek zonna nuam deuh ding suak ta hi. Hiaiziakin, nidang bang a TU leh TEM zang a nek muhtheih hong hi non talou in, i nek muhna ding a THEIHNA, SIAMNA, PILNA toh PEN zang a nek muh ding hong suak ta hi. Nidang banglou tak in tulai tak a mipite' nek zonnopna di pen mimal tung kia ah kinga nonlou in, HEUTU hoih khat leh nih tung ah hong kinga kha ta hi.

Hichi bang khovel a hong hihtakman in, Bible in a gen mah bangin - "i doute zaw sa leh sisan ahi kei ua, van a kha gilou hon omte ahi zaw, huan ah, sawltak Pual in chiklai peuh in kha namsau batin kha dim gige in om un" a na chih bang deuh sim in, eipawl leng tulai khovel a i "hinna ding un" siamna leh pilna sang tak i neih uh ngai hi. Huai i neihkei tak uleh leng, i zatdan i theih uh poimawh petmah ding hi. Huchilou in zaw policy thu a i ki khinpih dingte uh India pumpi a laisiam pen pawl, state sung a lehkha siam penpen IAS, IPS, IFS-te leh MCS, MPS, MFS theihna leh pilna nei, pau leh ham siam "pen" a vaihawmte ahihman un.

Hichi bang ahihziakin, hiaite toh kibei thei ding siamna leh pilna banah, technical knowledge nei laisiam mah ei mipi te'n i public leader dia i koih uh ngai prtmah ta. Huchih kei leh i gam muih gop ding hi. Aziak bel govt lamte leh public lam ate ngaih dan hong ki batlouh luat chiang in development nasepna pai theilou hi. En (public leader) thil i gen chiang a govt lam ten thei siam lou, amau lam in thilkhat ahon gen chiang ua ei lam (public leader) in theisiam theilou zel. Thilhoih tuaktuak gel hinapi in kitheih siamlouh ziak a nasep pai hoih theilou in, atop in mipin kithuak a i gam khanmoh bawk hilel hi. Etsakna ding in, kidou nakhat ah vetel in, i galten AK 47 rifles ngen toi uh henla, en gophel lel toi in kidou le bang i suak phet dia?

Hichi bang ahihmanin, heutu ding chu mihoih ziak kia hilou, chit luat ziak kia hilou, Pathian thu hat luat ziak kia leng hilou in, nasep dan thei, lehkha siam deuh mah govt lam leng hoih tak a deng thei ding heutu nei hile i gam ah khantouh na kichi hong om thei pan ding in upna nei ing. Huchi lou zaw i pianna gam, i tenna gam leh i khosakna gam pen khangkhe ngeilou in siat beh deuhdeuh lai ding bang hi. Hiai thu kigelh kok tuam nei a gelh ahi kei.