KHRISTIANTE LEH LAITHAI KAP (PLAYING CARDS)
Revd. Hangpi Manlun
Moderator, Zou Synod
1). Thupatna. Pasian mapuina toh tulai in tahsa lam inn ten louten ah masawnna itangta mama uhi. Nidanglaiin ipi, iputepen nna genthei tahin semin, singnuai gam muol ah neh-le-tah dingte sui in asun ajanin hinkhuo anazang uhi. Ahin eitepen tuabang kihinonlouin, adiehin pasal sepna hoi leh hau neite ngel ading in sepding bawl ding umlouin, asun azan khu chimthoina ding a bang e khat bawl a hun zah bei mailou bawl ding aum non sih hi.
Tuabang ahilai in tulaiin, anu apain hinkhuo mannopna ding in kimawlna chituomtuom, Laithai, Ludo, Carom board chite leh adangdangte khu iha bawlta uhi. Tualeh eiten chimthoina leh hun suhbeina ding a izahlaiun, itheilou kalun, khelna leh gitlouna sangtah ah ina um kha leng uhi. Adiehin Laithai khu khelna leh manthaina kipatna bulpi jong ichi thei ding hi. Tam laithai kap ziehin, mihausa tamtahin manthaina leh inn-le-lou tannate bang leh leiba thangba tam tah bang anatan law uhi. Tuaban ah tulai ngelin i computer sungte ah jong chimthoina in kikap thei ding in ikoita ua, tuachin eima tang nangawn in jong kikapkap thei ahita hi.
2. Laithai hing kipat dan isui masa ding uhi. Laithai ang kipat dan ahileh France lengpa Charles ( 1324-1392) vellai in, ni khat lungsim buai in ang umta a, koima houpithei leh kipawlpi thei in ang um sih ua, tualaitah in a Minister khatin ama-le-ama akipahtheina ding leh Jesu Christ leh anuazuite suhmisietna ding leh engbawlna in tam laithai khu ang bawlkhiata hi. Tuachin, tam laithai mukhietu leh bawlkhietu Ministerpan, Pasian thu leh Baibul doudalna ding in ang bawl khiata hi. A zieh ahileh PHE (playing cards) a zattuomte khun Baibul sung thumanpha umte ahilou lam a etsahna nei in anabawl hi. Tuin ana etsahnate abanban in isuiding uhi:
2.i). KING (EENGPA), in a etsah ahileh Setan (Dawimangpa) ahi.
2.ii). QUEEN (LENGNU/KUMPI NU), in a etsah ahileh Mary ahi a, thamlouin azahna uh ahileh mihua etsahna in ana zang uhi.
2.iii). JACK, A etsah ahikia leh mizuau, milepchia, mihuh leh thangtat etsahna ahi kia hi.
2.iv). JOKER, in aetsah ahileh Jesu Khrist ahikia hi. Thamlouin, gilou chin teng leh suolna etsah in ana zang kia uhi.
2.v). ZAT KHAT AKIPAT ZAT SAWM (1-10), in a etsah ahileh Mosi Thupieh sawmte ahi hi.
2.vi). ZAT LI (4), in a etsah kia ahileh khawvel nopsahna leh gamtatna ahikia hi. Tamchi bang in Baibul thutah doudalna leh Mangpa Jesu simmaw na leh eng bawlna ding a na kibawl anahilai zang hi. Tuaziehin, laithai kap khu itheilou kalin Pasian thutah sim mawna, Ama doudaltute toh Jesu Khrist leh Baibul thutah doudal khawmna ding Setan van zah hoi mama khat ana hita hi. Thamlouin, tamte ban ah laithai kap ziehin sum-le-pai batna, inn-le-lou tanna, zudawnna leh thangtatna tanpha min aneilaw va diang uhi. Tualeh, sum-le-pai du gawna leh awlsam tah a hau utna lungsim jong ang pia nalai hi. Tuakhu, Baibulin sum deitah khu suol chin teng bul achi toh kibang ahi. I Baibul ah laithai kap thu umsih malehjong laithai kapte khu, Sam 14:1”…amaute atawnkhile siengta ua, sil kidahhuoite a bawl ua…” achite din mun adinna ahi. Ban ah, ahoi agam tat ding theina pi a gamtatlou khu khelna zong ahithou hi. Tuaziehin, tam Pasian thudouna ding a hing kibawl suolna-le- gitlouna chin teng bul laithai kap khu ei gingtuten itop san un ibawlnon sih ding uhi. Ahin, theina pia ibawl teitei leh Jesu Khrist doudalte leh Baibul musitte toh nnasem khawm leh amaulam apang ihilam kimang hil sih va ui. Simtute zousie theisiem thei ding in Mangpan mita vahna hing piata hen.
Laibu ette:
1. Rev. S. Chinkhanpau, Manipur Express, October, 8, Friday, 1999.
2. Zakima Khiangte, Thalaite Tan, (Aizawl: Synod Publication Board, 1985.