I TENNA GAMMANG  LEH KIM-LE-PAMTE KEPBIT NA DING A KHRISTIANTE MAWPUOHNA
Rev. Hangpi Manlun
Moderator, Zou Synod

0.Thupatna:
I Laisiengthou Genesis 2- ah Pasian in leitung asiem laiin, a enkawl ding leh kembit ding in mihingte khut ah mawpuohna apie chi i mu uhi. Tualeh mihingte’n i kul-le-poimaw dungjui un i  zahthei ding ahi chi jong Pasian thupieh ahikia hi. Ahin tulai in enkawl ding a imawpuohna lam uh kisemlouin, thangzahna leh suhsietna lam ihabawlta ua, tuakhun itenna kim-le-pamte leh leitung khu tenna tahlouin aumsahta hi. Tuaziehin, gammang sing-le-guote etkawl ding dante khu tulai a i gam Government in jong angaikhawh pen ahita a, eiten zong ikithupi chiet ding uh khu Pasian thu leh Bible toh zong akituah thu poimaw mama ahi.

1). Gammang genchetna. Gammang kichi khu English-in ‘forest’ ahi a, tuami’n agen pen gam leh sing-le-guote genna ahi hi. Tualeh forest ichi chiengun chini’n ikhenthei kia uhi. Tuate khu: i) Pasianin apiensah/siem (Natural forest),  ahi  ii) Mihing bawlkhieh (Man-made forest) a hikia a,  etsahna ding in sing-le-gua isuonte uh genna ahi hi.

2). Gammangte kepbit kulna jiehte. 2.i). Mihing leh gam mang in kijopna lienpi muthei leh mutheilouin anei ua, gammang phattuomna chinite ziehin gammang kepbit lou thei lou ahi. Ajiehpen gammang umsihta leh mihingte jong ki-um koilou ding hi. Sapten, “Mihing in a pientung apat ashitan dong in sing-le-suong toh a kichimat uh achi” uhi. Tamkhu adiehin ei singtang mite adin adih dieh hi. Adihna jiehte ahileh naungeh a piengtung in sing a kibawl lupna a siel/lupsahin aum a, ahinkhuo pumpi khu lupna tung ah jan teng in alum a, shichieng in jong sing akibawl hankuong ah sielin in i um um hi. Tuaban ah a zong ahau, apil amawpen jong khu ishichieng un ikivuina dingun jong gam ipoimaw uhi. Tamte khun sing-le-aleh itenna gam toh ikijop dan uh asulang mama hi.

2.ii). Tuaban ah, i gam leh lei khu eite hing chawmtu leh vahtu ahi uhi. I NU uh chilei jong ichikhiel sih ding hi. A zieh ahileh NU in atate avah bang in, i Gamte akipat in neh-le-tah imu un aga leh thaute ne in ikivah uhi. Adam kung ah Pasianin Eden huon a sing chin teng gaa ne akivah ding in jong anakoi hi.

2.iii).  Tuabanah, nidang lai ngel in ipi-le-puten, hun-le-kumte simna in gamte nana jang uhi. Atate uh kum asuiding chieng in khutjung talte hiah in, khumi lou ihaw kum chiin atate uh kum pha ding za khu ana hisap jeljel mai uhi. Eite ading in gam-le-leipen ihun leh nite hisapna uh leh theitheina (Calendar) uh jong ahimai hi.

3). Muthei a gammang phattuomnate.  Gammang phattuomna chi nite muthei leh khoikhahthei leh khoi khahtheilou akichi hi. Tuate pen gen dan dang in indirect benefits jong akichi hi. Tuabang a muthei gammang phattuomnate khenpi ni in tam anuai a bang in agenthei ding hi.

4). Gammang in climate (huikhuo) leh gua zudingte a thunun (control) hi.
Tam control kichipen athunun jong achithei ding hi. Tualeh climate in ahuopte ahileh gua zu dingte, nisa leh lum-le-vot leh huilangte genna jong ahi. Bangchi dan a gammang in gua zu control ahi  e, ichi leh gammang umna tung ah meipi akai nuom deu a, tua meipi akipan gua ang zuleng hi. India gamsung mun khat “Thar” kichi a um a, tuagam nidang laiin sing-le-gua adim in apou hi. Hinanleh, mihingten tua sing-le-guate aphuasieng/suhbei tah jiehun, tun gua azutom hiaihiaita a, atopin gam gomun (desert) asuahta mai hi. Ei gam ah jong nidanglai in sing-le-guate tamlai in, tusangin gua azuatam a, tun azutawm hiaihiaita hi. Masanglaiin, i Ex- MP uh pu Chiramani’n “Tunua kum sawmnga (50) nua chieng in Manipur ah gamgo lientah ang um ding achi” hi. Tuakhu adih mama hi, tambang a ipeitou jeljel uh leh igam pen tunua chieng in gamgo (desert) gam ahing suah ngei ding hi. Tutung igam a MLA result kipuonni in Pu T.N Haokip, Saikot, MLA puin, athugen kalung akhoi in dih kasa mama hi. “Aman igam ah chi-le-nam kidouna umnonlou ding, ahin tui tahsapna (Tuigal) gal idoukhawm ding uh a chi hi. Amang agen jelna ah i unau Naga lamten, agam ua tuipen akhuo kim apamte uh moh pieh ut nonsih uh” chi agen khu dih kasa mama hi. Tam lamkainite thugen leh vision akipatin tu-le-tu leh tunua chieng a igam umtou ding dan leh pan lah akultah zetdan ang musah un  ang ngaitua sah uhi.

4.i) Gammang in kholum leh khovot jong control hi. Etsahna dingin, Nisat laitahin sing nuailim avot mama mai hi. Tualeh singnate akipatin huisieng muthamlou ang pot a, tuami khun nis alumna asukiem leng hi. Innkim ah sing kung suan kimvel lei tuabang in kholum akiem deu ding a, nisat laiin jong i innte avot ding hi. Langkhat lam ah jong, i kholum leh khosa kailaitahin tuivot mai hiloun, tui sa dawn lei kholum kiem zou chi’n science lamten agen uhi.

4.ii). Gammang in huilang ding dal thei hi. Huipi tunglam akipatin nuailam tang tah alang hilouin apheilam in alang deu pen hi. Singkung in ama sanna tan in hui khu adal a, tualeh huipi in singkungte anohkhah chieng in singteten anadal jeljel uhi. Tuachin hui thahatnate akiemsah hi. Na inn kim a singkung um in na inn huipi akipatin hing ven bitsah gige ahidan na phawh jing ding ahi. Tamkhu adiehin singtang gam (Zodawn) a khuo gei a singten khosung avenbit dan apat in imuthei uhi.

4.iii). Singte/na in huihoi (oxgen) bawlkhie hi. Leitung buppi seli asua sethum khu tuipi ahi a, sekhat maimai leitang ahi. Leitung teng ah sing-le-gua poudim lou lai hi. Thamlouin Simtop leh Maltopte khu vua (snow) in atuom dim nalai hi. Tuamaiban ah tangsang, muolsangte ah sing-le-gua umlouin vua in apumtuom kia hi. Ahin Pasian in sing-le-guate akipatin huisieng (0xygen) mihingte hip/diplut ding apiengsah a, tuachin huisieng khu leitung buppi-ah akihom jah hi. Tam oxgente jiehin mihingte leh hinna nei zousie inahthei un ihingthie uhi. Tam oxgente beita moh leh mihingte leitung ah kitengthei lou ding hi.

4.iv). Singzung khu lei sudet (phankhamwtu) ahi. Singjung, suongjungte lei tudettua ahi ua, tuajiehin lei hoi kitolmang dingte dalthei uhi. Sing umlouna ah leithem gua zuh chiengin hawhtui in taimang leng hi. Tambang a sing-le-suongte’n anasepnate uh mihing in theikhah phahlou tampi aum nalai hi. Etsahna ding, i gam a sing-le-suongte beisiengta moh leh tusang in igam ah leichim alesawmin tam ding a, tentheilouna leh kikawmtuona tanpha a buai mama ding hi.

5). Muthei a gammang aphattuomnate.

5.i) Gammang akipan in sing vanjah ding (timber) apieng hi. Gammang ah singkung lienpipi a pou (um) ua, tua singte mihing ading a vanzah ahi uhi. Timber akichi chiengin inn vanzah genna bang, lei (bridge) rail lampite bawlna van jah bangte genna ahideu pen hi. Tualeh inn i lam chieng in, singpang/tel louin akibawlthei sih hi. Buiding inn akilam chieng nangawnin zong singpanglouin akibawlthei sih hi.Tuathamlouin, singtang hileh khopi atengten jong a tam zaw in building inn kilam zou lou ahijiehin sing inn ateng kitam jo hi. Tuaziehin single-guote hoitah kepbit ah chiltah a zah akul ding hi.

5.2 Furniture. Sing akipan furniture tampi kibawl khia a, tuatepen lupna, touna, dokan, almairah, singkuang leh adangdangte ahi. Sing umsih leh tamte innsung van zah tampi kibawlthei lou ding hi.

5.3). Plywood. Khawlpi abawl plywood te jong sing abawlkhieh ahi a, plywood-pen furniture leh innlamna ah nasatahin kijang hi.  

5.4). Puon leh laipuan bawlkhiehna. Sing akipan in puon leh laipuon (paper) tampi khawl jang in kibawl hi. Tua leh laipuonte khu sing leh guate akipan abawl ahi uhi.

5.5. Guo leh Mau. Gammang akipan guo-le-maute zong innlamna ding in kijang phatuom mama hi. Thamlouin guo-le-maute akipanin laipuon (paper) jong kibawl hi.

5.6) Sing vah ding (firewood). Sing akipan in sing vah ding kimu a, mitampite’n sing khuo jang in annte kihuon na lai hi.

5.7i). Miehol (charcoal). Singkung leh sing jung a kipanin meihol bawlkhieh ahi a, meiholpen ann huonna leh mei oi ding kijang pahtuom mama hi. Tulai Lamka leh akim atengte meihol kihajah mama a, meihol toh ann zong akihuon a, gas leh kerosin zangloute adingin lemtang mama hi.

6.Gammang melma/galte khu.
Gammang melma lienpen khu ei mihingte ma ihi uhi. Mihing in sing-le-gua kum teng in tampipi kiphua in, isuthelthang uhi. Singtang louvatna sing tuai tampi kivat lum in kihal tum jing hi. Tualeh mihingte ma hawldingte, plywood, paper, singvah ding leh atuomtuomin kum teng in kiphua hi.

6.i). Mei (fire) Gammang melma leinpen khat ahileh mei ahi. A diehin singtang gamah phalbi gamgaw chiengin, sakamkhat neh-utna pouin gam lienpipi ihalthum uhi. Tamte khu topsan ahuntah jet ta hi. Sa kamkhat, kamni deina igam ilei ihaltumtum uh, pen ei-e-ei iphei tung a sa kisem toh kibang ih uhi.

6.2). Hol hut. Tam zong tulaiin ihabawl mama uhi. Hol mun khat a ihut chieng un akim apam a singhui, hing pou dingte nasan jong akangtum in, alei jong tuanua chieng ading in jahthei nonlou hi. Tamte jiehin igam ilei atulin agaw siengt ahi. Tamte jiehmain guate jong tawm deudeu in gamgaw gam asuoh siengta hi. I tenna gam mangte khohsahna bei ihuthut na khu eima-le-eima kisuhsetna chi khat jong ahi. Uipi khat alupna savun nene in atopin anehbei leh alupna ding mun aneinonlou bang ihita uhi.

7. Silsiem dangte tung a ei Khristiante panlah ding dante.   Genesis ah Pasian in leitung leh asung umte zousie asiem laiin a en a hoi asa mama hi. Tualeh Pasian in gammang hoitahte aum asung a siemsa sa-le-vasate leh ganhing chin teng aum khu hoi asa in siemsan jong ahi. Tuate khu eiten isuhsiet jing moh leh Pasian poikhoina khat ahi. Eipawlin gam lah ivah leh jong item ahiam ei chin lam gei asing khat kisat phei mohin, migam ah lam gei sing khat phuh khu mihing hinna lah toh kibang min a ngai va-ia hi. Thamlouin, gam lah theikung leh nehthei sing khat imuleh jong itu it ate ading kikhuol nonlou in kiphuh lum pai in dam sung nehthei ding pen khat vei kine giap in maban kikhuol votlou hi. I gensa bangin aphattuomna igente muding aum non sih a, itenpi ding a Pasian siem sing-le-guote umlouin eite jong bangma kihituom lou ding hi. Ahing khawm leh poukhawm ding a Siemtu in ang siemlai eite duam jieh amaute isuhsiet jing moh leh amaute panglouin eite jong bangtan kihingthei tuonlou ding hi.

Thamlouin, Pasian loupina puong jahtute ahidan uh jong imanghillou ding uh ahi. Pasian thupina leh hinate khu ei mihingte maimai apuong jah ding kihikoilouin, Silsiemten jong apuon jah ding uh khu Siemtu deidan leh tup dan ahi hi. Tuabang a puongjahtu dingte suhsietna khu siemtu lung gel dan ahina diai le? Sam geltu khun, “Vante’n Pasian thupina aphuong ua, huikhuo in akhut nasep asulang hi” achi hi.  (Sam 19:1). Tuaban ah Rom laihahah jong “Pasian khu sielsiemte ah akipuong hi” chin jong ang hil hi. (Rom 1:19-20). Mikhen khatte ngel in jong Silsiemte jiehin jong Pasian gingta in pienthana tanpha atang thei uhi. Tuabanah, i Late uah jong “Silsiem chintengte in jong Mangpa phat uh” chite in sa uhi. Tuate mai ban ah, “Silsiemte zousie in jong ei gingtute ma bang in kinemtahin Pasian tate kilatna ding angahla mama uhi.” achi hi. (Rom 8:19). Mangpa Jesun jong “Mihingte a khantanhoi thu agen sih uh leh suongtangte kikou ding” achi va-ia hi. Thamlouin, Israelten, Jubilee aman chieng un jong agamte uh khawldamna ape jeljel uhi. Tamte akipatin ikim ipam leh i Zogam duottah a kepbit ding khu ei gingtute mawpuoh leh Pasian deidan ahidan imutthei ua, tuaziehin tuabang nnasemthei dingin theitop in pan ilading uhi. Mangpan simtu zousie hing guoljawlta hen. AMEN!