KAIHLAM KANG – KAIHLAM KANG
By : pbkhuptong

“Aw nang ka pianna vangkhua Kaihlam Vaivut nasuah ni tuang hongtung nawnta maw, kum zatam kivei zong lailung ah ngilhni omlou ding”

Tuni date 31-7-1997 hileh Mi asang a simte’n “KAIHLAM KANG - KAIHLAM KANG” chia agen  ni uh, mi tampite’ lungphawng ni hiding hi. Ban ah, kou Kaihlam khuate adia ka inn uh, neih-le-lam, ganta, ka gou teng uh ka mansuah ni uh hiding hi. Ka hinkhua ua ahuaisiatni pente lak a khat hiding ahi.

Nitaklam ninem in kapa toh Loukuan vai kapai uleh lampi ah midang loukuan khat katuak uhi. Aman Radio tawi ahihman in thu thei nuam in ka Pa’n akiang ah “Tuni bangthu a om ale” chia adot aleh “Saikul ah mi 10 vel that a uh” chih ahon gen hi. Banglam, bangthu hihiam agen uh kathei bankei hi. Namkal buaina kipan ahihlam leng kaphok kei, ka pa kiang ahleng kadong tuankei a aman leng ahon hilhtuankei hi. Huchi’n inn katung ua, khosung vaihawmte zaw kihou khamah unteh ken bangmah kathei nonkei hi. Hiai lai in kum 7 khong lel hipan kahi.

Buaina hongkhang in masawn tou zel a, ka khua uah leng duty post te bawl in duty ahon panta uhi. Kapa leng duty in akuan zel hi. Nitak a kapa’n duty a ahon kuansan chiang in Amah ngai a kapzel kahihlam katheipha lai. Gaal ten khua ahonluh ua ahonghal sak ualeh leng vanzat tawm ding silh-lehten, zanpuan tamloute ka inn phaitam-dainawl uah kakoih khia uhi. Akhente bang ana aap thelthul chih khong in ana omsek hi.

Buaima in ei sepaihte’n ka khua uh Traning centre ding in zang ua, khua apat gamlalou gamlak ah camp bawl in huaimun ah om uhi. Zingkal chiang in khosung tawn in PT ahong taisek ua mipi’n ki-en heuhou sek hi. Chihziak, huchidan uniform silh a mi tampi tai dupdup kimu ngeilou himhim ahihchiang a mak, lamdang, leh etnop kisa hi. Ka lawmpa toh skul suti ni khong hihding kaneih louh chiang un acamp uah vapai in football, volleyball khong kava kimawl sek ua nuamthei mahmah. Akhen chiang in sun ann bang kava nekha sek uhi. Lim thei petmah, Dal/havai meh sek uh ahih chiang ua, en kinekha ngeilou. A camp uah vakkual in  a training na khong uh en in kachim chiang un khua ah kapai zel uhi.

Khua tuamtuam ahong kaang souhsouh ta a kou khote leng nasatak in Gaalte anadou ding in kakisa kholta uhi. Meithal tomchik kia om ahihman in siksek siamte’n meithal ding siksek in, meithal leh thal(arrow) bawl in buai uh a, heutu lamdeuhte’n tangvalte melma apat ki dal dingdan leh kiven dingdan singkhuah khong toh kizilsak in buai in a kabuai veng vungta uhi. Khatvei tei hong luh sawm ding ahihziak un, Khua mipite kipatau, Lou hoihtak akuan chihleng omthei nonlou, thawmhauna lianpi toh ki om hi. Huai kawm kal ah refugee khua dang apat hong taai uh huaiten hon patau sak, himahleh lehlamtak ah honsu khamuang uh: mipi kitam, kihulum ahihchiang in. Kakhua uh training centre khat ahihhang in Ei sepaihte’n ahon ompih theikei uhi. Amau mundang a gaal kap  akuan uh ngai ahih man un.

Nitaklam khat ann kanek laitak un Mipi hong kikou souhsouh in, “Thanlon kang, Thanlon kang” honchi ua, kazak phet un kouleng annethei om nonlou in inn konglam kadelh ua, meikhu luailuai, bomb ging pungpung zaktheih in a om hi. Mipi kipatau, kinguai gaivek, akhente Biakinn lamzuan in, kakhua zang un ka om vengvun mai uhi. Kou khua leng honhal pahta ding uh chih kia lungsim uah omta hi.

Zan kalup chiang un ka nu’n ka unau un Gaal omleh taidia mansa in hon lumsak sek hi. Puanak, khekol, leh khedap tanpha bunsa in hon lumsak hi. Kapa duty akuanzel ahih chiang in, kanu ading in lungzin huai mahmah ding in kagingta aziak bel unau tam, neulai kahih chiang un. Enlah huchia lauhluat ding ahihlam le kitheikollou, nuamtak a ki ihmu hithit zel. Zingkal lam dak 3-4 khong ahihciang in kanu ihmu ngeidi’n kaging kei, chihziak chu hiai dakkal te khing ahong luh ding ua alauh huai huntangpi ahihziak in. Zingkal baih taktak in ahon thousak zel a, phalvak khong in ann ahon nekpih sek, buaina cikchiang a hong om  ding ahia chih kitheilou, a om zenzen lehleng annesa hiding chi in. Sun ahihchiang in bel lungmuan huai deuh. Nitaklam, nitak ahong hihchiang in “tuni ahong luh ta ding uah aw, dak bangzah in, chickchiang in” chih himai.

Ahong buaisan deuhdeuh chiang in hongluh pahta ding ua kiginta in, ahong lut louhnang lam ua gintak namun, khua kiim gamlalou samphok lei gamlak ah giahbuk/vankoihna ding kilbawl chiat hi. Inn ahleng kigiak ngam khol nawnlou ahih ciang in ah huai giahbukte kibel in, Annte huan in huai ah Numei naupang, pitek-putek teng ki omzel hi. Khosung akipan mi ahongpai ciang un bangthu a om a, bang achita chi in kikan souhsouh sek hi. Ahong lutdekta ding uh, khua kiim a khua Paamzal ah  a om uh achih chiang un bang dipkuatna toh kidim hi. Cik chiang in thau ahong ging dia aw chih kia lungsim ah omta hi. Lauhthawngna ngen toh ki-om ahihman in kuamah kamlim a anne ki-om khol nawnlou hi.

Zingkal khua hong vak a, nihong suak in mitengteng in an kinea khinpah hi. Thu ahong pai a, kakhua kiang ua Unau Vaipheite khua ah a-om uh chih ahon hilh uhi. Hongluh petmah ding ua gingtak ahita hi. Kakhuate’ uh leng hih theihteng hih in, Galte dangzoh teitei ding in nasa tak a kisakhol ding un kagingta hi. Nitaklam ninem kuan, dak 2 khongvel ding hita, thakhat in thau hong ging petmah ta hi. Ka khua uh tuh unau Kuki te’n hongluh uh ahita hi. Ka omna ua nupi omte ahongkap ua hihtheih bangmah a omkei hi. Thau chuh ahong ging naak deuhdeuh mai a, Kapa, ka u, kata bang achih dia aw chih lungkham na in kidim hi. Amau thau(gun) hoih pipi ngen toh hongkuan chuh ahi ngei ding ua, amau thau ging dotdot kia kiza mahbang hi. LMG ahonkap uh chu aging ngaih petmah mai, hondelh hileh kilawm hial in kiza hi. Huchih lai’n vuah nasatak in ahong zu a, kouleng Gaal ten ahondelh kha ding uh chi’n gamlak lam zuan in vuahnuai ah ahon taipihlai uhi. Huai ni’n kanun akhut a agat, tualpuan thak liklek puan-ak a akhui ahon silhsak hi. Keicu gamnuai ah khe in kapai theita a, kanaute bel puak ngailai uhi. Vuahnuai ah maban kasawn zel ua, akhen chiang in gamsa khong katuak uhi. Thau ging inlah khawlsawm nailou, mun awng khawng katun chiang un kholam ka-en ua, meikhu vuaivuai kia muh ding a om hi.  Thau ging ahong daita a khua leng ahong mial pianta hi. Loutul munkhat ah kakhawl uh a, huai ah meichih in kazan giak uhi. Silh ding puanlah omlou, kavan kot utoh kalum mai uhi. Nitaklam annek ding bang theihphak in omnon kei hi. Nekding la a om kei hi. Huai nitak in(khua kat nitak) ka nu-le-pa, ka pi leh pute ihmu ding in kagingta kei hi. Ka pa khosung lam a omden ahihman in ka omkhawm kei ua, ka pan kou ahon ngaihtuah dingdan leh ka Nu’n ka Pa angaihtuah ding dan kangaihtuah chiang in ahaksat dingdan kathei phiing hi tukhong in. Miteng in kuamah luhzoh louh dia agintak uh, amuan penpen uh tuh Kaihlam khua tuh vaivut asuak maimah ta hi.

Zingkhua ahong vak a, kouleng ka thou uh a, kagiahna uapan ka kholam uh zuan ding in kapai khia uhi. Neek ding bangmah omlou gilkial tak in ki-om hi. Lampi ah mitampi toh kakituak ua, “ Kou ate’, kou sungkuante bang achi uh, namukha uam” chih chuh kampau potkhia masapen ahi hi. Huchi’in kapai zel ua, khua katung petmah ta uhi. Mipi ana buai vengvung uh a, ka Pate toh kaki kimu ua nuam mahmah. Khomual toh biakinn kong ah tangvalte’n ann anahuan ua kintak in ann kane pah uhi. Inn-le-lou gentak louh Ka pute’ khat in gaalte khut apan ahinna ana mansuah in khomual ah ana vui uhi. Ka Nu tuh A hantung ah ann nekding ngaihsak lou hial in a iit, asanggam suun a kahtam lou akap ngeungeu tuh kamu hi.

Ka innpi uh khomual kiang ahihman in kava paipah a(kuatoh kahi ua chihcu kathei nonkei) kamuh theih omsun chuh a sing akangtum nailoute meikhu liailiai, langva tui leh buh akang lai, apuak, thiltui, chih khong, inn himhim akanglou muhphak ding a omkei hi. Huai ban ah kholai ah ka aak uhleh kavok uh belding neilou in alanglang a vialtai te kamu hi. Kangaihtuah na ah “huai ah ka innkatung uh omhia” huaimun ah huaite” chih ahi. Huai lai a khuathei a lungkham dan khong theita hileng bangchituk in kalung akham dia aw chih khong ka ngaihtuahna ah honglut hi. Ka inn uh khua khunglam deuh a om hiven keileng huailam zuan in kapai tou a, amun katung a meivu ana suak khinta hi. Kangtum dimdem mai, bangmah akangbang chihleng omselou hi. A nawl ah ka ekbuk uhchuh ana dinglai sam hi. Agen uh kazak ahih leh Kaihlamte inn hoih sathei lua ua haal ngamlou dekphial phial uh chi uhi.

Ka Pa leh Ka nu’n dainawl a kavan selte uh bangmah chilou ahihman in alakhom uhi. Huaite bang ana koihkhelou hile ung ka zatlai kia utoh ka ommai uh ngai ding hi. Giah nang, omnang mun omnawn lou ahihman in gamlak lam kazot uh ngaita hi. Kenbel kangaihtuahna ah buk khong lam a huai ahon ompih ding ua kana gingta hi. Himahleh huchi in omtaleng le bang ne a  bang dawn ding ahizel hi. Huchi’n nitaklam honghih in kavan omsunte uh pua in Ka khua kiang ua kawl buk omte kabel uhi. Kawl buk lou belh ding mun bit omlou himhim hi. A munleng keen zomah ahih ziak tung ding haksa mahmah hi. Huchi in kawl buk sausim, leh tamsimtak om ahih chiang in huai ah ka khozang un ka om souhsouh mai uhi. Tua mun ah ann huan in kanea ua, suanghum tung peuh a lum  a ihmu in huai nitak chu kazang bei uhi. Katheih lai khat, huai nitak in ka U pasal alian pen in  ka Aak uh khat khua ah ahon man a hontawi in zingkal meh ding in kasiit uhi.

A ninawn ahong hita a , kathou souhsouh ua, khua a van laktheih om sun teng a latheithei in avala uhi. Kanute’n ann ahuan uhi. Zing ann nezou kahong kisa souhsouh ta uhi. Kenbel huai mun a om tadih phot ding kakisa lailai hi. Khodang a gaaltai dia kikoih nailou himhim kahi. Manta kipan kheding achitak un kenleng kapa kiang adong kahi ngei ding a kapaina lam ding uh katheita hi. Ka nu’n sakhaupi khat, asung avan adim a om ahong kuah sak a, ka khekol tom teng in kakuah a kapai hi. Kanaute puak ngai uh ahihman un amau akipua uhi. Nau nen kahihman un midang in kavan uh honpuak pih uhi. Gaaltai ding in Mualnuam lam kazuan dupdup maita uhi. Kakhua uh, buh leh baal, sa, haichi leh tui anopna mun leh kiningchingna mun nutsiat mai ding chuh mitampiten haksa sa mahmah ding un kangaihtuah hi. Lampi kapai ua Sun khong ahih ding in tuivai katung suk uhi. Tuuklai ahihciang in Tuivai nasatak a ana lian in hat mahmah hi. Tuivai kanlou a pai nang lampi omlou ahih man in kakantan uh ngai teitei hi. Kakaan theih nang uh lampi omsun chuh puum akinawn ahi. Puum khat a-om a huai leeng maupum kigaak khom a kibawl ahi. Mualnuam khote tuisiam khat leh kou khua tuisiamte pangkhom in pum langtuak ah khaukhit in agal tuak a khau a kangtuah theih ding in ahon bawlta uhi. Huchi’n sungkuan sungkuan in puum ah tuihat mahmah tung ah kahong kinawn laihlaihta uhi. A kaihna khau bang hong kitan mawk bang hitaleh suahtaak lam et huai khollouh hi. Huchi’n kakinawn zoh un agaal a tuilou om hiven huai ah sun ann nekna kanei lalaih uhi. Lim mahmah aksa mehkhing sun ann dia kipua ahih chianga. Huchi in anne zou kakipan khenawn leuleu ua lampi(lamlian gaitaina)katung un Mualnuam khote’n honna dawn ua, akhua uh katung uh a, Inn chih ah zin ahonhawm uhi. Kaihlam a gaal hongtaite toh kou Kaihlam khomite tuh kavek un  gaaltaite/refugee kahong suak ta uhi.

(Hiai Article kei mimil theihdan leh ngaihdan a kigelh ahi)