ZOGAM MASALA - IV
Written By : K.Lianthansang @ K Thansang Zomi

ZOGAM a nopdante khawng lasiamte'n hon awi ngiahngiah ua, atak-agam ah bel a nopna teng huih mutmang lel abangta hi. 'Zomi'n kei ka piang, Zomi bang ka nungta, Zomi bang in ka si ding' chih la om abang(?). Tulai a i nuntakdante uh i et leh, Zomite nuntakdan ahi i chi ngam diam ? I sihdante uh Zomite sihdan ding in kilawm i sa taktak na hia ? Sappau (Overdose) a si i tam mahmah mai uhi. Himahleh, i sih chiang in, i natna min di'n, 'SUNGNA'chih i gelh ua hive'n..! Khamtheih in Zomite thil thawnpiak huham tak hon pia a, huai ahihleh SIHNA ahih banah, sukdam theihlouh natna lauhuai, HIV/AIDS te ahi mai hi. I kipak na uh hia?
Zomite mipil i tam mahmah ziak un khelhna leng a sang mahmah mai a, bangtan i sawk chiang a khelhna hi hiam chih theih zoh di ahi nawnkei. Self Defence na di khop a lehkha thei bang i na om ua, i Rights uh i theih hoih mahmah kawm un, i Duty uh i hamhaih khanak ua hiven..! I lak a ngaihdan kituahlouh ziak lel a kiselbuai i tamluat ziak ua hiai hon gen ka hi.

I kipilsak ziak leh Christian minpu hihziak a vangam kai di ahi diam? Zu dawndawn khat houpih lechin hon haibawl mahmah dia, nang hon leh thuhilh nuam zaw di ahi. Huchi bang ahihziak in, 'Bang ziak a zu na dawndawn?' chi in dong le hang, hon dawnna dia i gintak, 'Zeldim thubawl' zual le, 'Zudawn khelhna hia? Bible in na Damtheihna ding in ZU dawn cheuhcheuh in chi ahi' hon chi ding ahi. Zomite'n zu i dawn 'Cheuhcheuh' hia? Dawn 'Khutkhut' i hi zaw hia? Mahni kisiamtanna lel in vangam hon tunlou di ahihman in mei mittheilou (Meidil) ah i tawmlut souhsouh ding uh lauhuai i sa hi.

Zu zuakna inn khawng a pung deuhdeuh mai chih, miteng in i 'by-heart' sa ahi. Hiaite khantouhna dan a ngai i hi di uam? Khosung makaite'n le Permit bawlsak i hi uh hia le? Khamtheih chi tuamtuam i Zogam hong kidenna a, huaite changkanna ahi diam? Vengsung makaite'n na vengsung uh na etkai zohkei ua leh kou khangthakte bang suakta di? A khamtheih hia i khaam di, A hih tute?

Khamtheih zaw khovel in abuaipih ahi a, Zomite kia in i buaipih uh hilou ahihman in thil buaihuai tak leh ngaihnep theih vual hilou ana hi nawn hi. Khamtheih ziak in, i Zogam ah mi kiphasak i tam mahmah uhi. TV a i et 'Action Film' te khawng innsung leh kholak a apply sawm mawk. Gang Group bang tam zozen, hantou khawng in kuan le i phat tuam-tuam maizen di utoh. I hatnate uh kholak a zat sang in Pi Mary Kom sulnung zui zaw le bang a chi dia? Chinuam dan i hi. Kholak a mi hong pai te ana phu (push) zok in mi'n a et chiang a, 'Bangziak a hon huchi et e? Chou maw? Chisuk pah geel-gaal mawk..! Na hip-hop dance gengen un le i khuakte uh sing (shake) datgawp le ahi diam a..! La khawng ah chu,'Hip-hop in siatna hon tun kei hen, hip-hop in lemna hon tun zaw hen' chi a mitsi diaudiau a awi chu i hi peuhmah ua (?). Hiai Hip-Hop in tuailai thathak tet-tet ( kei bangbang) te suthak sem in, khutthak a siakna ding uh zong pahpah mai dan ahi uhi.

Huchibang kawmkal ah, Khotang heutu leh makaite'n Khamtheih hih leh hichibang a tuailai, kholak a hatna shaw sawm (Namdang lak a ui mikhual bang) te khamdaih sawm in, 'CURFEW' kichi thumal nalhtak mai hon apply zel uhi. Curfew kichi i zak chiang in naupang kum chinglou (Kum-18 nuailam) te kia a di'n i koih uhi. Akoi-abang hitaleh, bang chibang in Curfew i enzui ua le? Miteng lauthawngsak dia Curfew Duty i hi di uam? Curfew i bawl a, Duty a i pang leh chu 'Pack cheuh' chihte i hihlouh ding uh ahi. Huai banah, mi lampi pai tuahkhak teng suk thawmhau di ahi kei a, buaina banghiam om hun a suvaiveng pahthei dia Duty zawk di ahi. Curfew duty khenkhat, kham neisa in i duty ua leh, 'CURFEW' kichi thumal zang khalou in, mi'n zang kha zaw daih ding uhi. Bang chi'n e? Buaina om leh nou om nua-nua KAL (Cur) in mi, FIU(few) chi a kikhoh mang hiau ding uh ahi..!
Huai banah, nu-le-pa khenkhat hotel a mawk chiakchiak a, inn a tate ngaihsak manlou zen a omte le Curfew puankhum di'n hoih ka sa hi. 'Naupang Curfew' a omtheih leh chu, 'Piching Curfew' chih a omthei kei dia hia? Nang Hotel a singpi a Special ngen na va dawn ziak a inn a na tate' agil uh ana vah di hilou ahi. Zomite lawm ngai dia le ngaina diakte i hi ua, kipawttuah chih khawng chu i ngeina uh ahi hi. 'Nikhat pumlum kongpua a pawt leh sih di' chih thu khawng hong om leh i buai didan uh, i om didan uh thei nuam zozen ka hi. 'Curfew' puan di chile, i puankhum di tam law mahmah di ahi a, huchia i puan tak leh le, buaina bawltu i suahlouhna di'n, a etkaidan siam le maw ?

Zomite lawm pawl zaat i hi uh i chih mahbang in, Siamsin momnoute leng, inn a om a Study table a tu a, text book te lawmbawl kitamlou hial hi. Huaiziak le ahi dia, siamsinna lam ah i keniam mahmah uhi. Electric ginatlouh bang paulap in i nei ua, 'suun a khua vaklou hia?' chinuam dan ka hi. Bike nawn leisak kei leh School kailou di chi a kiphinte zaw tawp suk maile uchin (?). Gamdang khwng bang i lunggulh lai tei a, 'Gamdang a ABC te le eilam a toh kibang ahi a,1+1=2  hi vekthou ahi'. Tulai pau in gen le, 'Laisiam taktak na ut leh MGNREGS (Job Card) bangmai in laisim kei le chin himai' chinuam i hi.

ZOMI sung ah Nam 9 kikhaikhawm ahi a, huaite lak a Nam khat, 'Paite-Zomi' kichi te'n Paunak nalh mahmah khat ana neih uh tuh, 'Kamsiam in Sial lei a Sang' chih ahi. Himahleh, hiai paunak i zuikha kei ua, hichibang a paunak neiloute sang in i kamsiam kei zaw uh abang hi. Kamsiam louh mai hileh hoih di, i kampaute uh 'Tangkha' bangmai in a kha velvul maimah hi.
 
 I Zogam uah, Pathian hehpihna ziak in A zawng-ahau in Office tuamtuam ah thil sai di i neita ua, kipahhuai mahmah hi. Pitek-Putekte nasan in Bank Account a neih uh ngai chih ahi nawn a, a saisak di thulim omkei leh amau mah a kisai uh ngai pawl om abang hi. Huchih hun chiang in, Officer tuamtuam a maituah uh ngai hi. Zum pipi a hong maituah uh eive ! A zum didan uh ana thei hile chin zaw maw...?
 
 Bank lamte hi'n *Banklou lam hitaleh, Front Desk a mipi toh ki deal dia tute bek adan ana om deuh d'uh i sak leh i gintak a bang kei. I dotnate zaw, Bil (ear) nei a navaktak a omte adia zaklouh ngaihna omlou hi a; Na-ngong ahih ua leh a sepna uapan tawpsak/Kitawp maile uh bang a chi dia?
 
 Counter a tu phenphan, mi'n thil banghiam a va kan chia buai hi awmtak a mile enlou a tom chikchik a kidawn lauhlauh te i siamdan uh ana hi maimah ta. Tawndan a nei i hita uh hia leh? US President, Barack Obama, India Prime Minister, Manmohan Singh chihte lawi toh dinmun kibang hile uh kilawm a hong om hial chiang un zaw...? Huchi dia lah a hihna uh thupia lua hilou zel..!! Mizawng leh Mihau bang khensiam zawzen, ''A haute hauden a, azawngte zawngden lou di ahi'' chih theilou a duam ! Pawlam et a Minuai a deuh a i koihte bang i kou suk pah toihtoih mawk uhi. Zum pipi a hong pha uh ahihlam theisiam sam le zaw...!
 
 I Zogam ua Government School te tamlou i nagen khin ua. Tu'n Private Institution lam buluh nawn leng i chi hi. Private Institution khenkhat, Business hoihtak khat a suak mawk uhi. 'Manipur a Industry lianpen, Underground' chihbang deuh in, 'Manipur a Business lianpen Private School te ahi' chi leng sau i khial law kei ding. Private Institution khenkhat ngial bang zaw, a ngaihna omlou eive. Result hoihtak bang hon neih chiang un, changkanna khat bang a ngai in, School Fee te su pung hulhul maimah uhi. Hiaite enkai di'n i Siamsinna lam ua Lubawk deuhte'n Mizawngte Khualna a maloubang hong pat ua, pan laktheihna teng ah hong la maile uh bang a chi dia? Hichih a chu, kine gawng gai di i hi uh..!!
 
 Huchi bang kawmkal ah, Private hichiahlou, Mission School te'n le a 'Objective' uh hamhaih kha dekdek uh a dia o chihtheih hun tam nawn hi. A school 'run' zoulou di zen a fee a tawmsak d'uh chu ahi zozen kei a, himahleh naupangte Salam leh khalam a bah leh chaute a panpih ua leh a tup uh semkha pen himailou hia? Mission hi'n *Sonlou hita henla'n, Private hi'n *Vate lou hitaleh, 'Admission Test' i bawl veu pen uh ahi, lai-dip nasak tuntun..! A kaina lui uapan, Documents poimoh teng hon puaksuah nak ualeh hun himai lou hia? Rights to Education Rule bohsiatna chikhat ahi. School kai dia kisate Admission test in omzia anei kei; 'Siamsin dia kisa dekpan ahi ua, a siamsa bel hilou ahi uh' chih thei ta ni.
 
 Nu-le-Pate summuhna a kibang kei a, khenkhatte hausa mahmah le uh leng, akhente ngial Lou nasem, Suangtum sek, Hol haal chihte khawng a kuan a nek di ana sutuah zou hamham ahi tangpi uhi. I nekzonnate uh deihtel theih hileh zaw, hichibangte kinawlkhin law di hiven..! Zoudawn lam leh Lamka zaang a i nekzonna uh haksatdante i kikum zual di'ng.
 
 Zoudawn lam a nekzonna tangpi ahihleh, Mual leh taangte Meetgiau ahi mai hi. Nu-le-pa tamzaw, 'Mualmet High Skul ah kai ua, Pen din tukawi leh tempawng' zang uhi. I nekzonna uh, gammang kepbitna toh kimelma ana hizel hi. Himahleh, I nekzonna a deihtelna omlou hiven.! Hol halkei mawk le, LPG Refill lah kidaih mahmah lou ahih cia.!! I louhal chiang un gam vatlouhte a katsiat louhna di'n pilvang mai ni maw, i lou neihdan lah tawpsan thei vuallou i hih chiah. Gua leh Mau te khanghat zaw ahihziak un, Sing sang in gua leh maute zangtang zaw le, sing leh lou kembit i hipah ding, I gam uh se leh, van kheng bang a kheng theih hilou di ahih man in.
 
 Lamka zaang lam tung khawm nawn le, hiaimun a i nekzonnate uh a tuamtuam ana hinawn hi. Himahleh, a haksa diak teng i gen ding uh. I Lanva dung ua Suangtum laihkhiat chihbang, Cement tok a kiloh chihbang, Suangtum seek neen a zuak zel chihte a haksa pawl ahi. Deihtelna omthei leh kuan suang gikpi a va domdom dia eita? Government in hiaite a khaam ua, hoih mahmah, himahleh a khaam kawmkawm un, kingakna tham ching ding, Scheme bangbang hiam hon ngaihtuah khe le uh i chi hi.
 
 Suangtum laihkhiat ziak in Lanva lui a kang dekta a, Singtum laihkhiat ziak in, i gam uh a lum deuhdeuh a, vuahtui a tawm deuhdeuh banah, huihsiang a tawm deuhdeuh hi. Himahleh, hiaite i hihna ah, tuasang in pilvang zaw deuh leng chinuam i hi. Suangtum omlou in Government in leng Lampi a bawl thei kei. A zatna di a tam mahmah, huaiziak in Suang zatna atam a, suang zang a thil i bawl chiang in Sawt daihdeuh di'n aw.? Suangtum mai toh (Alkatara tellou), Lampi bawl kei le, bawl thakthak ngailou dia, suang bangzah hiam ki save di hiven maw.! Aban, “ZOGAM MASALA – V” ah kikum nawn ni….!!