PU-PA’ TAWNDAN TAWH KISAI NGAIHDAN - IV
Written By : K.Lianthansang @ K Thansang Zomi

ZOMI te’n i pu-ipa uapan a tawndan hoih taktak ana tawnpih ua, dan bangmai a ana zat te uh, a khangkhang in i na kipesawn tou uhi. Himahleh, tawndan hoih taktak i chihte leng, tulai khovel toh kituak nawn chiahlou pawl om in, paihkhiat leh khenzek ngai pawl om a, akhente lah behlap ngai thepthup pawl om hi. Huchibang kawmkal ah, khenkhatte bel, chiik zaw sem a zuih dia hoih pawl om a bang hi.

Nopni-Dahni a phatuam ngaihna nasatak i suah sek tungtang mah uah, bangchi leh phatuamngaihna i suah pen a tangtute’n (zalzoutute’n) tuasang in a hamphatpih theizaw ding ua? Bangchi leh phatuamngai pawlpite’n i nasepna tua sang a chiik zaw in i langsak thei dia? Hiai dotnate a dawnna di ngaihtuah khawm in kikum suk himhim leng i chi hi.

Phatuamngai Pawlpi (Philantrophic Organisation) te a hong-om uapan in sivuina ah amau inntekna ala ua, a hon paipih dandan uh chu i tawndan uh ahita mai hi. Huaiziak mah in sivui dan toh kisai in dak hiaizah tan a site (a dak zah le thei sipsip lou zel) ani mah a vui di chi a, hun bikhiah i neih uh bangleng, i tawndan ahita hi. A zawng-ahau kal a gap omsaklou a khuimat chit-chet leh paidan feltak nei a kivaipuak ding tupna ziak ahihman in, dak chiam i neih uh ahoih mahmah a, hilehleng (eipau a word huat huai i sak chiat uh), alehlamtak ah huai in i tawndan lak a hoih mahmah, ‘phatuamngaihna’ pen sudau kha houh ahi dia aw, chih theih ton om hi.

Mihingte munkhat a ki-omkhawm gige lou ahi chih miteng in i theih mahbang un, misi om chiang in khualgam apan siluang hon delh chenchen om ding ahi chih i phawk uh deihhuai mahmah hi. Misi pen a dia, anu-le-pa, azi-ata, asanggam leh pi-le-pu bang leng hikha maithei, huaite ngaktuanlou a misi i na vui bang uh ei tung a tung dia (tamtakte tung ah tungkhinta) i ngaihtuah leh i it mahmah mel, chikmah chiang a mu ngei nawnlou ding chihna himawk ahihna ah, naa mahmah ding ahi. Khualgam apan siluang i puak vengvengte uh bang leng dakchiam abei ma a, a hong tun nak leh a hong tun phet chiang a vui ding chihna suak ahihna ah, intekte a di’n laidip teipi a sut bangmai in naa ding hi..! A zawng-ahau kal a, kideidanna om selou a zuih hivet leh….? Khat tung a NISA a, khattung a VUAH azuk chiang in zaw….!!

Dak chiam i neihpen a hoih luatna omtham mahleh alehlamtak ah phatuamngaihna i suahna ziak uh hiai i DAK CHIAM un bangmahlou (Zero) suah khasek hilou hiam? Lusuuna tuakte hehnem dia kisa in, tuplouhpi a athuakna uh behlap khasek houh i hi duam? Dakchiam i neih uh zui zoulou in, Inndongta in ‘Kou leh kou ka kivui mai ding uh’ bang chita zenzen le uh leng, Phatuamngai pawlpi i kichih ngal leh inntekna i lakpih mai ding uh hilou hiam? Tawndan sang in Mihing a poimoh zaw kei a hia? DAK CHIAM NEI A PHATUAM NGAIH ZAW, phatuamngaihna taktak ahi kei di chile uanglua i hi dia hia? Mihingte tung a Phatuamngaihna suah sang a, Dan (huai le ei-le-ei i kibawl) tung a phatuamngai zaw i hi kha diam?

Inndongta in si kivui dek lehleng, sivuitu dingte phatuamngai pawlpite mah (phatuamngai taktak ahih ua leh) ahih thou man in, dak chiam nei sese kei mai leng, Phatuamngaihna i suahna ziak uh semkhapen zawlou ding idiam? I phatuamngai pawlpite’n mi theisiamlou ahi zenzen kei ua, tulai in leng, khualgam apan siluang hon delhte, A HITHEI TAN IN a ngak ua, a kipahhuai mahmah hi. Hilehleng,Siluang vuikhiat hun ding pen, Inndongta khut ah koih le bang a chi dia? Inndongta in, siluang pen Muatzen in hon koih hial di ua hia? Hiaipen phatuamngaitak in nungthuap zaw leng i tup uh semkhapen mailou ding i hiam?

Misi i chihte, Bible gen bang a a khualzinna uh zou toh kibang ahi ua, a khualzin nanung pen uh (Last Journey) pen thupi ngaih hamham mai le, aziak tuh hong zin nawn mawklou di ahih ziak un. Huchi hileh, i tup diktak (Phatuamngaihna) mah i sepkhak mai hilou in, i tawndan hoihtak mai, phatuamngaihna tawisang a kembit kha leng kihi zaw ding hi. Zanhak ding, Lengkhawm ding chihte kingah zoulou dia gingta i hih zenzen leh, kikhahzan mai leng PHATUAMNGAIHNA TAKTAK hong pawt ding ahihna ah, lungkham huailou ahi. I phatuamngaihna uh kingaknatham chinglai mahlou di hia? Ahihkei leh kingaknatham ching thak nawn mailou di hia? Lametna i neihziak lel in phatuamngaih suahkei peuhmah leng ‘Khristian hindan tawisang’ kichi kizuikha pen mailou di maw?

Nekna di a omleh Christian i hihlam uh bang kihamhaih khazual chihte omsak kei peuh leng, i gam nuam mai ding ahi. Phatuamngaihna i neih hoih mahmah ziak un i kipak mahmah a, tunung chiah bang thuthu in i phatuamngaihna uh hon tokbuai diam i chi a hiven. Mipite theih dia hoih mahmah ahihleh, Khualgam hiam a sihna i tuah leh siluang omna mun a, phatuamngai pawlpite thuzak pah mai ding ahi. Khopi lam a vasite khawng, a dawn ding in, Kangvai lam i manoh nainai zel uhi. Kangvai a siluang dawn dia kuan hinapi, siluang hong tun tak chiang a, taisuak vangvang mawk chih khawng ki-om zeuhzeuh abang. Mawlluat ziak hia pilluat ziak? Hiaite i tawndan uh hikei mahleh etkai poimoh mahmah hi. 2013 July kha hiam in Bungmual te khat in Ambulance ana lei a, a ut-ut in hire theih ding dan ahi. Phatuamngai Pawlpite’n leng ‘Ambulance’ bang neithei le maw?