PU-PA’ TAWNDAN TAWH KISAI NGAIHDAN - III
Written By : K.Lianthansang @ K Thansang Zomi

ZOMI te’n, namdangte bang in, i pu-pa khang apat in tawndan leh ngeina i na nei uh chih i thei ua, i Tawndan lak ua poimoh mahmah khat, ‘Phatuamngaihna’ kichi saulou in kikum nawn leng i chi hi. Phatuamngaihna i chih in ahuap alian mahmah mai a, himahleh tomchik in hilhchian dek leng; Lam-et neihziak hilou a, thilhoih ahih ziak a sep ahi, chi leng chiang huntawk mahmah di’n a gintak huai hi.

Phatuamngaihna kichi, ei Zomite tawndan khat himahleh, Meiteite (Talpakte) leh Vaite (Ngal saute) sang a phatuamngaihna haulou zaw i hi dia aw, chihtheih hun tam mahmah hi. Hiai kon genziak ahihleh, Bus leh Gari tuam-tuam sung hiam khawng a i tuan leh, Namdangte’n Numei leh amau sang a upa zaw leh teek zawte tutna a awn pahpah mai uhi. Eilak ah huchibang a vang mahmah zel. Namdang toh i kibatlouhna uh, Buk-kak touhtouh sawm bel i hi kei uhi.

Nopni-Dahni (Siatni-phatni) toh kisai a, ei Zosuante phatuamngaihna leh a kepbitna ding lam kikum zual leng i chi hi. Job Card in i Phatuamngaihna uh bangtan in hon sukha a le? Akua-akua hon sukthadah mai hilou in, i phatuamngaihna uh mi khenkhat chihdan leh ‘Su Zero’ hilou hiam? Hiai kon gen ziak in, miteng phatuam ngailou ka chihna ahi zenzen kei a, i phatuamngaih DAN uh, phatuamngaih ZAH uh, phatuamngaih theihna HUN leh MUN uh kibanglou ahi lel hi. Niamkiak lam manoh chu i hi peuhmah uhi.

Zomite’n khantouhna lam i manoh deuh-deuh ua leh MISI a tam deuhdeuh a, huai toh kiton in HANTOU dia kuan na ding hun nei kitawm deuhdeuh hi. Hantohna toh kisai in, Nidanglai leh tulai a kibang nawnkei chih a chiang mahmah mai..!. Khobing a i omlai un, kumkhat in a tampen in mi 10 tan bang kisi hi (Huai le, kholian deuh te ah). Huchi ahihleh, kumkhat a hantou dia, ni 10 lou kuanlouh chu haksa lawmlawm lou ding hi. Hileleng, tulai hun in bel, misi tamthei lawta ahihman in, phatuamngai diakte’n tha tampi a seng namah ua, thil baihlam hi hetlou dan ahi.

Hantou dia kuan manlou i chih chiang in ah khenkhat te’n,” a phatuamngai tak-tak kei a eive” a chi maithei uh, hilehleng, mi thunuai a nasemte adia bel, hantou di’n kuan uttawk le uh leng, a pute un a khahkhiat kei ualeh thil hitheilou ahi. A pu’n khahkhia hi tawk leh leng, minu-mipa pe’n sum tampi a, asiamna pilna a leisa ahihziak in, apu’n athoh chihna suak ding hi.

Huchi thouthou,kum bangzah hiam paisa (2011 vel) a kigen hiauhiau bang in, sum kithoh in, hantou di mi guai lehang himailou maw? Mi bangzah hiam in sungkuan kivakna di tanpha a le zangthei di ahihman un.’Phatuamngaihna kisuangsawn leh gahtampi suang’ himailou di? Huchi’n hihleng, tua phatuamngailou chi a i et heihaite leng, sumthohlam a phatuamngaipen ding le hikha thei uhi. Ahihkeileh,Taksa mahmah a kuanloute phatuamngailou chi thouthou ding i diam? Sum thoh di chih ziak a sumthoh di neiloute a di’n, tha mahmah a vakuan theihlouh chih hituanlou ahi. Sumthoh pe’n ‘aloutheilou’ dan in koihkei le, phatuamngai taktak leh taktaklou hong kilang mai ding hi. Mi phatuamngaite val chih om ngeilou ahi. Huaiziak in sum thoh di i neihkei leh leng tha mahmah vathoh na di mun tampi om ahi (hantou a kilohte kiang sese hilou). A valkhak ding uh leng lauhuai lou a, vallou di ahi uh chih hangsantak in i genngam hi.

Khang hong pai zel di lam gal et mawk le (Khang nih zoh khawng chiah), JCB khawng le hon zang khamohlou di uh ahi. Ahih keileh,Young Paite Association (YPA) ‘Diamond Talk’ a agendan un, ‘Haanpi’ kichi khawng hon bawl di uh theihsa ahi, tu a i Hanmualte uh dimlet dia kisata ahihziak in. Tu-le-tu dinmun in bel, sum kithoh a thalak ngai hiallou in i paithei hamham lai ua, tuadan a i paitheih sung uh i paisak hamham ding mah uh leng ahi hi. Khovel kipeikual pen khawl mawklou ahihna ah, tuadan a i paitheihlouh hun uh hong tunghak nawnlou di ahi a, i tawndan uh zattheih nawnlouh leh zattak nawnlouh (update nawnlou) te paihkhiatlouh theihlouh hong hiding ahi cih theihsa ahita hi.

Tua ngaihdan i taklat pe’n huai hun chiang a, a aaktui pumpi a paihlou a,a aaktui sung a, a eng(yellow) pen bek i humbit (kepbit) theih dingdan ngaihtuahna lel ahi. Hantohna ding in, phatuamgaitak in tha i thoh ua (vengsung mi a sihkhak chiang in), huai mahbang in, phatuamngai tak in,Sum kithoh lehang phatuamngaitak a hantou dan in i kipomthei diam? Gentehna di’n, Gamdang a, Missionary nasem a kuan i om ua, huaite bangziak a kuanthei ahi ua? I chih leh; amau Pathian in a sawlbang leh talent apiak pansan a kuanthei ahi ua, sum-le-pai ah huhna i pekhawm siau-siau uhi. Huchi hileh, sum-le-pai a Missionary vaak te Indirect a Missionary leh Pathian gam nasem himai dan uh ahi.

Tu’n Missionary vaakte Pathian gam nasem ahih ua leh, hantou dia i sawlte uh sum piak di thohkhawm te’ Hantou chi in i pomthei ta di uam?Hantoute sum pe di omkei leh toutheilou di ahihman un, sumthoh kichi le phatuamngaihna mah ana hi veve a, i tawndan uh sumangthang i hi tuankei uhi. Tulai in Sum in thil ahihtheihdan i naktheihlua uh hilou maw ? Adiak a Manipur a teeng tengteng in..!!.Huaiziak in, i tawndan uh kepbit taktak i ut leh, paihkhiat ngam pawl i neih a ngai a, huchih keileh, itselua a i tawndan mangthangsak zaw kha ding ihi.