PU-PA’ TAWNDAN TAWH KISAI NGAIHDAN - II
Written By : K.Lianthansang @ K Thansang Zomi

PU-PA tawndan leh ngeina kichiantak i neih pen uh, i hihna (Minam) taklangtu ahihdan i phawk chiat ua, kepbit leh puahphat apoimoh dan i thei chiat ta uhi (Khenpi – Khatna apan in). Puahphat leh Kepbit kichi,Vei-le-Tak bangbang di ahi hi. Tawndan toh kisai a ‘Kembit’ i chih chiang in, ‘Museum’ khawng a Khangsawnte’n a muhtheih di ua kepbit di cih ahi kei a, himahleh Sukmanglouh a, a meaning diktak toh zattouh det di chihna ahi.

Tulai khovel toh i Pu-pate uh hunlai a kibang nawn hetkei a, amau hunlai a tawndan ana neihte uh tulai hun ah, ‘Apply’ theih nawn mawklouh pawl om hi.Tuabang ahihman in, i hihna taklangtu dia i zat uh, i pu-pa tawndan leh ngeinate lak a bangteng pai a, bangteng zanglai ding i hia? Theih haksapi asuak a, himahleh ngaihdan gentheihna dia, ‘Rights’ nei i hihman in, ngaihdan sekhe khawm in, a laktheihteng valh sawmleng i chi hi.

I theihsa uh mahbang in, Zogam ah Zosuante kia i tengkei ua, business tuamtuam bawl in, State dang apan in, ‘Ngal saute’ hong lut zung-zung mai uhi. East India Company te’ le India a hong lut tung ua, India gam vaihawmkhum dia hong pai ahi kei ua, Business bawl a hong pai ahi uhi. I dinmun uh hong kibang maimah diam a..? Huchi bang kawmkal ah, Sual gamtatna khawng leng hong maingal mahmah mai a, ‘Zohmeng, inn a zualna dia a khenuai, sathau kinuh sek bang in, hiai sualna pe’n sathau ana kinuhkha’ hiding hi. Sualna a tam dungzui in, Khutlum kikhakna, Sisan-naisan kisuahna, Luang kikhamna chihte toh kisai a, i Inndongta zatdan uh etthak tuak mahmah omkha ding a bang hi. Huai i chihna bel, Khutkhelhna om chiang in, Indongta level in i kihou ua, Sum i kiliausak ekh uhi. Himahleh, hiai in, sual gamtatna leh khutkhelhnate a bengdai zoukei, Sum liau ekh in, a thuaktu di pen sukha ban mahmah lou a, a ‘iik ah le nam thamlou’ ding hi. Huchibangte ,Police khut ah pekha top maile, bang a chi dia ? Nopni-Dahni in Inndongta pen mangthang tuanlou ding ahi. Huai i chihna bel, Namdang toh tengpolh i hi ua, Indongta neilou toh ki ‘Deal’ kha le cihna ziak ahi.

Huchibang hial i ngapkei leh mohna nei leh migiloute bang chi’n i suaktaksak kei thei ding ua? Khutkhelhna (tupmawng hilou) te ah Inndongta kizang henla’n, tupmawng a thilhih (Numei pawngsual) chihbang te Police khut ah lutsiang vet leh navak huai mahmah ding hi. Huaibanah,Tupmawng hilou, ahihhang a mohna kichiantak neite (Zukhamsa a gari tai, Mitung a liam-le-baina tun, sihtanpha tun) tungtang leng Police khut ah lut henlan,Tupmawng hilou a, khutkhelhna ahihleh Indongta khut a lutsak thak theihlouh tuanlouh ahi.

Hichibang dandeuh in, Inndongta in mohpuakna khenkhat, Police te khut a pekhe khen zek leh bel, i Pu-pa tawndan uh i kepbit kawmkawm un migiloute suaktalou dia koihtheih ahi hi. Upalamte’n ‘khuaksa zen leh Tal-Sawn zen’ in hon ngaihtuah le uh, tuasang a hoih zaw tham leng om ding hi.Huaiziak mah in, hon ngaihtuah taktak le uh i chi mahmah hi.

Tuabanah, inndongta neiloute toh i buai khak chiang a bangloh ding chih bang leng hon ngaituah vengveng le uh i chi hi. Ngaihdamna kichi nuam in, manpha mah leh Migilou in chu a tuhgah a aat ding mah ahi hi (Dan toh kituak in).Khovel na-na-na ah chu, ngaihdamna ziak a i kisuahtaksak gige ua leh khelhna pe’n hong maingal mahmah dia, innsung nasan ah vai hong hawmthei maimah dan ahi hi.

Hotel houlimna khawng a i chiakpih vengvung sim uh, adang khat ahihleh, ‘Mou kihelna leh kileina, banah Dansiangthou a kitenna leh Kitaipihna’ chihte ahi nawn hi.Saptuam lam leh khotang lam a dante in itung ah vai a hawm ua,himahleh phatuam taktak lou abang hi.Hichibang hun a zat di’n pu-pa tawndan kichiantak om himahleh,azawng-ahau kal ah gap om neuh-neuh abang hi.Tuabang ahihman in,miteng in haksa hetlou a i zuihtheih ding ua,dan bawlthak leh puahphatthak hileh i chi mahmah hi.

Zomite sung a, Paite-Zomi kichi pawl lak a, hichibang lam saideuh a i theih uh, Paite Tribe Council in Mou vanken thu hoihtak in hon taklang ua,Vanken toh Van-got a kibatlouh dan te hon taklat ziak un a i kipahpih mahmah hi. Adiak a mihausa deuhte’n, Gari, Innmun leh thil tuamtuam khawng a kikengsak ua, hiaipen Mouvanken hilou in, Mou Van-got ahi a, miteng in i theihchiat uh a gintak huai hi. Hithei liai hileh,hiai van-got te pe’n a khawnung a i kipiak ding uh ahi zomah hi. Huchih kei mawk leh hichidan te,’Tawndan’ a ngai mawk di hang a, mizawngte’n Mou khazoulou khong di i hi uh.

Dansiangthou a Kitenna toh kisai in ennawn lehang,mite houlimna ahihleh Pasal in kiten chiang a Coat silh zetzat in, numei pe’n in moupuan a silh pe’n i paidan uh ana hita a, himahleh hiaite pe’n English te hihdan apan i laksawn uh ahi, i chi nawn uhi. Mou vanken thu ah leng,Vaite tawndan ahi i chi zel uhi. Himahleh, i vek un i zui-zel thou ua, i paunak uh, ‘Sial in siik-siik leh Dawn-dawn a thuah’ kichi i zuihoih khopmai uh..! Kikhenna toh kisai in leng, Dan kichiantak i neih ua, number theih zah-zah kigenkhum chihte i omsak nawnlouh ding un hoih mahmah hi.Tua mahbang in, Kitaipihna (Zi gukna) toh kisai in leng, Saptuam dan in hon gak mahleh,Custom pansan a suk vaiveng ngai ahihman in, dan kichiantak bawltuak hi.