ZOHUAN BAWL THILHOIH LEH PHATUAM: LEMONGRASS
~ R. Sanga
Thumapi:
Nasep-silbawl kong bangkim ah chihtakna leh kuhkalna tel lou in lohchinna om ngei lou hi. Mi lohching i chihte kua-bangte hi peuhmah diing hiam? Sum-le-pai hau, nek-le-dawn toh kisai kiningching huntawk neite pen mi lohching ahi uh chih mitamzawte ngaihdan ahi kha diing e…! Mahni mimal kivak zou leh neih-le-lam hau-lelu hi khol kei mahleh niteng nek-le-dawn tasam lou a khosakna mumaltak neite pen mi lohching khat ahi i chithei diing hi.
Hauhsakna leh lohchinna kichi thu tuampi khat ahi chih chiamteh di’n ahoih hi. Mi kimkhatte’n hauhsakna leh lohchinna thil kibangdan in koih kha sek uhi. Hauhsakna pen ahihleh a tuampian vilveldan in ka koih hi. Nektak vai kiningching nei leh kizentak a innsung kemsiam di’n bel nasep-silbawl kong bangkim ah kho-ul kai zoihzoih a sep diing, taimatak leh kuhkaltak a sem diing; Ginomna toh kithuah lungluttak a i nasep chiat ah kingakna tham a sep diing pen nasemtu khat peuhpeuh mohpuak ahi.
Thilhoih Leh Hoih Lou:
Leitung ah thil nih aom: thilhoih leh thilhoih lou om hi. Michih in thilhoih hih a ut chiat uh agintakhuai; Himahleh mi tengteng in thilhoih ahih khol kei uhi. Setan khemna dou zohlouh ziak leh gitlouhna khovel in hon tuam kimvel ziak in thilhih ut louhpen hih a, thilhoih lou hihzongsang mi tampi om sek uhi. A sep louh diing uh sem leh bawl a aom ziak un khotang hinkhua atokbuai ua, guktaak-laktaak chiing zongsang a gitlouhna chiteng hih niteng in apung hulhul maimah hi…!! Tuni a bang sem a, bang bawl diing chih nasan thei lou, mabaan ah nasep sutzop diing bangmah neituan lou zawmah lai…?
Nidanglai hun a neekzonna pen singtang Louneihdan ngeina (Jhum Cultivation) ahi a, tulai hun a diing in chiintuak hinawn lou bang a ngaihsuthuai ahita. Banghang hiam chihleh, kholum-le-vot kikhek lamdang lua, gam zapipi kumteng a sing-le-gua phuk a, haltum gige chih pen thilhoih lou leh mulkimhuai ahihman in, State Sorkar leh akisaipih thuneitu kuapeuh in ngenteltak a geel detdet hun petmahta hi. Singtangpa Louneihdan ngeina pen ah khamkhop piangnawn lou ahihman in tawpsan vengveng a, Zohuan Bawl diing chih pen thilhoih leh phatuam ahi. Jhum Cultivation pen sing-le-gua kumteng a kihaltum gige ahihman in “Ecological Imbalance” piangsak thei a, tuinaak teng kangsakthei in, tuidawn diing beisakthei ahi chih hiai anuai a limte (pictures) akipan baihlamtak in mulkimhuai lua ahihdan na muthei diing hi:
Zohuan Bawl Thilhoih Leh Phatuam Ahi:
Kumteng a Loumun kisuan kual zihzeh ngai lou, khatvei a setdet theih Zohuan bawl (Farming) thilhoih ahi. Zohuan bawl diing a kisa, kuapeuh in haichii chiin diing pen ngaihtuahsiam poimoh masa hi. Kholum-le-vot, lei hoih leh suangsi lei ahihke’h suah-le-tum doh gam kiphah zihziah hiam, kensia hiam gamjang hiam ahihleh leitang pianzia theihchetna diing in etkhiakna (soil test) neih masak thil poimohtak ahi. Agam leitang pianzia leh omdan hoihtak a theihchet ahih chiang in haichii chiin diing baihlamtak in theihtheih hi.
Kum 2008 akipan Tangpijawl ah Aromatic Plant chikhat, Lemongrass (Symbopogon Flexuosus) kichi Loupa gim namtui Zohuan bawl ka na pan a, tunitan in gah asuangthei lai hi. Hiai anuai a limte (pictures) Lemongrass chiinna mun, Tangpijawl Zohuan ahi:
Singngat khokhung ah Zohuan bawl behlap in, Innkuan bangzah hiam in aphattuampih uhi. Sumtang a punna gen diing tampi om kei mahleh khateng a nasepman ngah zel, nasemtu numei leh pasal hunkhop in neekzonna toh kisai lungbuaina nei lou in niteng in Zohuan ah nasem a kuan in atate uh laizilna sunzomsak theiden uhi. Tua pen kia zong apunna hipah lian in ka tuat lel hi. Hiai anuai a limte (pictures) pen Singngat Zohuan, Lemongrass chiinna mun ahi:
Jhum Cultivation Saang In Zohuan Bawl A Phatuamzaw Hi:
Bangziak a Zohuan bawl thilhoih leh phatuam hi hiam? Singtang mi tamzawte i pu-i-pate chiindan ngeina mah tunitan sunzom nilouh a Jhum Cultivation mah pibawl lailai, niteng neekzonna toh kisai kawl a Ni suak sim a haksatak a Loukuan nung a leng kumkhat khamkhop khoukhia kitawm mahmahta ahihman in gahtamzaw ngah diing, tua baan a thadamzaw deuh a septheih Zohuan bawl thilhoih leh phatuam ahi. Innkuan khat in Hectare khat ah Lemongrass Zohuan baihlamtak in bawl thei hi. Tha tampi alut kei a, sum senna zong atam bok kei hi. Kum khat in gah kilawm hun angah thei hi. Hectare khat ah bul (saplings) 45,000 akipan 50,000 tan Lemongrass bul asuantheih hi. Bulkhat in atangpi a gen in 2 Kg or 3 Kg asuang zou hi. A kumkhatna ah nihvei ki-at in harvesting kibawlthei a, a kumnihna akipan akum gukna tan in livei ki-at thei leuleu hi.
Bulkhat in 2 Kg lel suang hitaleh a kumkhatna ah atawmpen a tuat in (i.e., 45,000 x 2 x 2) = 1,80,000 Kg Hectare khat ah, Zohuan bawltu khat in ngahthei hi. Hiai pen a thautui (Lemongrass Oil) hi lou in, bio-mass/grass ahi. Bio-mass 1 Kg ah 0.50 paise in zuak hitaleh kumkhat in (i.e., 1,80,000/0.50) = Rs. 90,000.00 ngah diing chihna ahi. A kum nihna akipan kumkhat sung a livei ki-at thei ahihman in (i.e., 45,000 x 2 x 4) = 3,60,000 Kg Lemongrass/bio-mass ngah diing chihna ahi. Huchi hitaleh, 1 Kg of grass pen 0.50 paise a zuakthei ahihman in (i.e., 3,60,000/0.50) = Rs. 1,80,000.00 kumteng a Hectare khat lel Zohuan bawltu in ngahthei diing chihna suak hi. Singtang Louneihna ngeina (Jhum Cultivation) ah Hectare khat ah hiai zah khoukhia kuamah om lou himhim hi.
Gross Return For a Family Per Hectare:
|
Sl. No. |
Particulars |
Hectare |
Quantity. |
Rate |
Amount |
|
Lemongrass Bio-mass |
1 Ha. |
45,000 x 2 x 2 (1st Year) 1,80,000 Kgs. |
0.50 paise |
Rs. 90,000 |
|
Lemongrass Bio-mass |
1 Ha. |
45,000 x 2 x 4 (2nd Year) 3,60,000 Kgs. |
0.50 paise |
Rs. 1,80,000 |
|
Lemongrass Bio-mass |
1 Ha. |
45,000 x 2 x 4 (3rd Year) 3,60,000 Kgs. |
0.50 paise |
Rs. 1,80,000 |
|
Lemongrass Bio-mass |
1 Ha. |
45,000 x 2 x 4 (4th Year) 3,60,000 Kgs. |
0.50 paise |
Rs. 1,80,000 |
|
Lemongrass Bio-mass |
1 Ha. |
45,000 x 2 x 4 (5th Year) 3,60,000 Kgs. |
0.50 paise |
Rs. 1,80,000 |
Jhum Cultivation bawl a hun tengteng beisak saang in Zohuan bawl pen thilhoih leh phatuamzaw ahihdan baihlamtak in muhtheih hi. Innkuan khat in Hectare nih/thum baihlamtak in enkolzou mahmah diing ahi chih achian hi. Hiai atung a kigen alehnih/alehthum a tamzaw gahsuang diing chihna suak hi. Banghang hiam chihleh, singtangpa louneihdan ngeina pen kumkhat a thumvei/livei tukawl tawi a khohsuak teitei kiphamoh ahihman in haksa petmah hi. Lemongrass Zohuan na bawl aleh bel akumkhatna ah nihvei lel khohsuak in zong hun mahmah hi. Akumnihna ah khoh ngainawn lou, a kumthumna ah khatvei khousuaknawn lechin hun mahmah zel hi. Huaiziak in Innkuan khat in Hectare nih/thum baihlamtak in enkol zou mahmah diing ahi chih achian hi.
Thukhupna:
Lemongrass Bio-mass pen kua kiang a piak a, kua in hon leisak diing hi hiam chi in lungbuai het ken, Distilleries thum hiai laigelhtu in a neita hi. Angels’ Place Campus ah Distillery khat leh Singngat Zohuan huangsung ah Distilleries nih om hi. Nangmah in Distillation Plant na neihtheih aleh hoih seem, na neihtheih kei aleh chiklai peuh in ka hon leisakthei gige diing hi. Aziak bel Pioneer khat hihna zar in…!! Azuakna lam toh kisai buaina diing bangmah om lou hi.
Zohngeu nou neibang mai a kumteng a Louneihna mun kisuan zihzeh ngai lou a, munkhat a setdet diing Zohuan na bawlbaihleh nang a diing a thilhoih leh phatuam petmah ahi ngeingei diing hi. Jhum Cultivation lah gahsuangnawn lou, sing-le-gua haltum gige pen khawlum-le-vot kikhek gawpta, tui neek diing nangawn omnawn lou phial hita, Lanva lui lah kang gawpta, singtang lam a khua tamtak tui neek haksa lua, Imphal phaijang nangawn ah tuzet in chu tuidawn diing kingah zounawn lou; Water Tanker 12,000 litres Rs. 800.00 a leitheih pen tua bel Rs. 2,000/3,000 in pungtouta hi. Kingaihtuah hun petmahta hi.
Sing-le-gua kepbit thilhoih leh phatuam ahi. Lamka leh asehvel gamkeu gawpta, Lanva Luinaak lam a suang laakna munte khawng ka mit a ka muh chiang in mulkimhuai ka sa lua: Ei-le-ei kituisabuah hi hangh chih hon ngaihtuahsak hi. Bangziak a Lanva Luidung a Sing leh Suang kilabei thei mawk diing hi hiam? Mipi vantang tuidawn diing laaknamun leh niin-neng taisiangtu Lui omsun, khopi kilawmna ahih baan ah; Tuinaak pen Mihingte a diing a hinna naak ahi. Lamlian kiim leh Luidung humbitna leh kepbitna toh kisai mimal thuneihna khenlam ahi chih phawk a, banghang a akisaipih thuneihna neite’n tunitan a kembit thei lou lailai ahi ua? Mipite kiphin hun ahita. Lanva Luidung vengbittu diing Manipur Sorkar in thuneihna leh thahatna nei lou hia le..? Autonomous District Council Chairman & Members, Village Authorities leh NGOs tuamtuam pangkhawm a nasatak a panlaak pah ahih keileh Lanvalui Tuinaak kang sipsip diing a kisa ahita hi. Mabang pan chiat ve ni e, Lawm aw…!! Ccpur DC koi a om…?
Zohuan Bawl pen Gam leh Nam humbitna leh kepbitna diing a zong thilhoih leh phatuam ahihman in Hausate hi in Nam makaite leh Pawlpi tuamtuam, kuapeuh kingaihtuah hun ahi petmahta hi…!! Gam hing dipdip i muh chiang in lungsim ahahdam a, ngaihtuahna athaksak a, chidamna hon tunthei hi. Manipur Hill Districts huapsung ah Jhum Cultivation toh kisai Hill Areas Committee (HAC) thuneihna nuai a om ahih toh kiton in [Ref. The 2nd Scheduled Matters of the Manipur Legislative Assembly (Hill Areas Committee) Order, 1972 Sub-section No.(5) & (6)]. Agriculture toh kisai aphatuam diing ‘Canal’ or ‘Water Course’ baan ah ‘Jhum Practice’ leh ‘Shifting Cultivation’ toh kisai HAC in singtang mipite a di’a thilhoih leh phatuam bangchibang in ‘Plan and Program’ gelfelsa anei a? Kum 40 vaal paita hunsung in HAC in Louneihna toh kisai in bang asemkhia a? ‘Jhum Cultivation’ kheekna diing a HAC in “Five Year Plan & Budget and Program” kichiantak bawl diing a “THUNEIHNA” nei ahihlam Tribal MLAs teng in phawkthak thut uhenla, hong kisiak mahmahle uh achihhuai tel mai …!!