Zan kikim khen dingkuan huihkhi hong lang hiauhiau a, maimit siing theilou in ka zalna laikhun pan ka thou hi. Inntung lam ah ka kaltou a, kha vak pha mahmah nuai a Zohuihkhi siang diik in lungzuan zatam tawh taikhua val ding ka ngak hi.
Kei pen vangphatna ziakin solkal nna sem kahihmanin ka buai thei mahmah mai hi. Himahleh lawmhoih petmah "Lunpu" kichi ka neihman in ka nasepna ah hon huhzel thei hi. Kenzong Lunpu, mi genthei mahmah ahimanin ka lawmhoih ahihna tawh khateng in anntang bag khat bang ka leisak gige hi.
Nitak khua hong mial chiangin ka lawmta un ka khokhung lamte uh nungak melhoih mahmah Kikim kava hel zel uhi. Amel hoih, kamsiam le pil mahmah ahihmanin lengla bang ahau thei mahmah mai hi.
Ka hoh mun deuhdeuh chiang un ka itna alian deuhdeuh mai a, banah a sepna nei chidanin anu bang in hon deihsak bawl tuam mahmah mai hi. Kikim lah kamsiamlua ahimanin hon ngai ding bang in ka muangmawh khazel hi, a hoihlam kipia in.
Nikhat ka lawmpa Lunpu kia "lawm, Kikim ka ngailua honva gensak mai ve aw.." ka chi a, Lunpu bang kiguih zawzen a, "lawm, Kikim kianga huai bangthu va gen ding ka ngam mahmah kei, hon theisiam maive aw..." chi'n kisuanlah mel takmai in hon gen a, kenle ka lawmhoih pen ahihna tawh ka theisiam pah hi.
Ka lawmpan lah gen ngamlou, ken lah ngamlou, lah ka ngailaw petmah zel a, ka lungsim in puak in ka puak thohmai a, nitak bang ihmu ngeilou, ann nasan hoihtaka ne zoulou in ka taksa bang a daang zou hial hi'n ka thei hi.
Achang in kava hawhzel ua, ka muh mun peuhleh ka tanlouh ding na kasa semsem hi. A ni hong thakzel dungzui in ka itna a thak semsem a, nikhat a khatvei muhlouh lel ding leng haksa kasa lua hi.
A tawp in kidek zou nawn mahmah lou kahi dia Kikim kiang ah ka itna thu liing pepelh kawm in kava gensuk tamai hi. Ahita zongin Kikim in, "UMuan, kei bangleltak non na ngaikha a ka kipaklua. Himahleh tu le tu in zaw ka hithei naikei ding, hon theisiam phot in, lawmta hoihtakin om zawni..." honchi a, ka zum tawh ka maiteng a san gai a, etna ding mel le ka thei nawnkei. Haksa sa takmai leh lungsim na petmah kawm in innlam ka zuan mai hi.
Nikhat kava hawh zenzen uale Kikim nu vuak ana om a, ka houlim nilouh ua, Kikim ka itdan, taisan zou mahmah lou ding ka hihdan ka gen a, huchi'n aman "Muan, na inndongtaate hon sawl in, Kikim kana thuzoh mahmah ding.." hon chi a, keile thumu kisa in kipaktakin ka pai a, lampi banga ka guk nuih suksuk mai hi.
Kikim nu hon gen bangin ka inndongta te uh ka sawlpah a, hoihtakin ava kihou thei ua, kipaktakin innlam hon kiik nawn ua, ahun le ni ding khawng le hon genfel ngal uhi.
Kipahna in ka pumdim a, nitak bang ihmu theilou zawzen in ka thoupah a, ka lawmhoih Lunpu kiang kava taipah hi. Lunpu heipi khat liangbat in loukuan din ana kisa a, thil omdan teng ka hilhvek a, ka thian apang ding nahi kachi zawmah hi. Aman le hon en a, amit san gilgial in nui utlou sasa a nui hile kilawm in, "lawm aw, kipahhuai na e maw..." chiteng lel hon gen a lamdang kasa mahmah hi.
Sun in Kikim te kava hawhtou a, anu le pa tawh ana om uhi. Ka lut leh Kikim in a room lam hon zotsan a, kamkhat lel le houpih manlou in anu le pa tawh ka kihoulim kha uhi. Kikimte inn ka utna pen hi gige mahleh tuni chiah inchu ka lungsim a nuam thei mahmah kei hi.
A nitakin Lunpu Kikim kava samkhe saka, ka pawtpih uhi. Munkhat ah Lunpu ana paikhe din ka ngen a, amah le paikhe pah in Kikim ka houlim pih hi. Sawtpi ka houlim zoh nung uh, a tawptawp in a thuguk hon genkheta, "UMuan..." chipan a mittui hongluang a, chikmah a hon kawi ngeilou in hon angkawi a, "UMuan, na lawmhoih Lunpu, tagah genthei ahi a, ka hehpihluat ziakin kum 2 paisa apan kana kingai ua, ka kikhenzou mahmah kei uh. Amah lah nang panpihna toh hing ahimanin ka kal thu uh hon gen ngamkei a, ka nuten nang hon deisak utawh kimu le kimu theilo in ka om mun tuak ua ka kapkap mai uh..." aban agen zom thei nawnkei.
Ka lungsim ana petmah mai. Ka lawmhoihpen, tagah ahih zomah toh ka khase sak utkei, kenla Kikim ka taisan zoukei..." ana petmah. Ka om ding dan le ka theizoukei.
Atawpin Kikim khut ol in ka lakhia a, utlou sasa in ka kinuisaka, "Kim, khase ken. Kon itlua a, kon itluat ziakin na utlo lampi na tot ding ka phalkei. Bangteng hileh minsiatna ka tan lele ka tang zaw dia, nang tawh ka lawmhoih Lunpu na kigawm theina ding un pan konla ding aw...." ka ci a, ol a tonpih in kava kha hi.
Inn zotkik bangzaw haksa hina maizen e... Sian lemgel louh himai inteh maw....ci'n ka mittui tawh ka lupna ka zuan mai hi. Lupna tung a ka lum a, ka innkuanpihte lungmuangtak a ihmu a nak ging hiahhiahte kazak chian, hon theihpih uh hile hon thuakpih law ding uhia chihpeuh ngaihtuah in ka khasiat asuak deuhdeuh maita hi. Ka lukham bang ka mittui in a kawt dimdem mai hi.
Zingkhua hong vaak a, keile kisuhalh in innkuante muh in lungnuamtaka omdan in ka om a, kei thuak banga ana thuaksam ding ka lawm hoihtak Lunpu bang ka hehpih mahmah a, a inn uh vaphak a houlung va kuppih ding chi'n awl in kavak khesukta hi.
Lunpu kong ka tun in ka etleh a kong chabi ana kikhai a, ka lung hon sunuam kei mahmah mai hi. Chihna ding thei tuanlou kahihmanin a innvengte ukia kava kan leh "tuzing baihtakin lou akuan khia" honna chihsan uhi. Ka lung abuai mahmah mai a, ka simmawhna hilou in tagah gentheitak khat kei ziak a lungkham mangbat athuak ding ka phal theikei a, vualzawlna le dong taak kahi kei ding ka ci a va zonkhiat ka sawm hi.
Inn a paitou in pawtna ding kin kanei chi in ann ka ne masa hi. Ka nekzoh phet in Kikim kianga kava paitou ngala, "Kim, i pawtna ding poimawh a om a, non zuih teitei ngai ding ahi.." kava chi a, athu theilou ahichian a ut khol hetkei chih ka thei a, hilele a nute a lauhman in hong kisa in hong zuita hi.
Lamdung ah apau zawsam omlou in ka kizui nilouh uhi. Gammang lam kong naih deuhdeuh chiang un lausim ahingei dia, "UMuan, koi a hon hawhpih sawm e..?" honchi a, kenle "ka lawmhoihpen leh na itpen Lunpu loukuan na vapha ding i hi.." chiteng in ka dawng a, bang lungsim nei a chihzaw ka theikei, hon en tou a, ka khut hon len a, a mittui hong tak khe keuhkeuh hi. Kenle kintak in ka romol kala a a mittui ka nulsak hi..
Saukhop kon paizoh un alou ka tung ua, Lunpu in honna mupah a, lamdang sakna toh hon en a, hon naih ngamkei chih ka theihmanin Kikim a loubuk ah ka lutsak a, ken Lunpu kava pi hi.
Loubuuk ah ka thum un ka tu ua, gen ding thei ka omkei ua, anuai lam ka ngavek uh, mittui nuullou ka omkei uh, hilele a kilangsak ngam ka om tuansam kei uhi.... Atawp in, Kikim tawh Lunpu ka naihphei a, anih un ka kawi a, "Eiteng zaw i vangse law tuam uh maw, eikal chitchiat a hiai bang thil hong tun sese, kei kana hailua a, noukal hon kan masalou in thil kana saupai lawkha a, hon ngaidam unla, ka sawmsa teng uh ka phelkik dia, nou tegel adin pan konla thak ding aw, na nih un kon ngailua..." chi in keile ka kidekzou nawnkei a, ka vek un kikawi in ka kikahkhum mai uhi.
Bangtan hiam nungin Lunpu in, "lawm aw, nangsa kei khialzaw ing, Kikim ka itlua a, ahitazongin gentheitaka ka khosak pih sangin midang la hilou, nang ka lawmhoihpen tawh na kiten uh lem kasa..." honchi a, ahitazongin ken "nang amasa zaw nahi a, ka lawmhoihpen nungak tuhkhia ka suak dia, ka damsung in nuam kasa kei den ding. Huaiziakin, nou tegel ding mah nahi zaw uh," kachi thuk a, a pau thei ka om nawnkei uh. Kikim la gending, etna ding nasan theilou in a mittui in a pumtuamta hi.
Bangteng hileh kisuhalh in innlam zuanphot ni uh kachi a, awl a kisa in ka thum un innlam zuan in kapai ua, lampi banga gen ding thei omlou, achang bangin ki entuah in ka kah nuih veivuai zel uhi.
Inn ka tunphet un ka office sap pa kiang uh kava pha a, transfer kava ngen hi. Vangphathuaitakin ana lem a, inn paipah in ka sungte kianga thil omdan teng ka theisiam saka, ka kiten ding ule ka khawl phot uhi.
Ka thum un ka kimu nawnkei ua, ka ommun chiat uah haksa sa chiat in ka omvek uhi. Ni 3 bang hong paizoh in ka transfer order hongsuak a, zin din ka kisa pah hi.
Ka zinni ding hong tunga, Lunpu tawh Kikim kasam a, amau le thumangtakin hon kha uhi. Station ka tung ua, haksa kasa chiat ua, apau khuk omlou in khitui naptui tawh ka kikha khia ua, ka kimuhtawp tan uh ka ki en vungvung mai uhi...
.