Ka neutung, ka senlai hun apan kuamah kana eng mahmah kei a, haksatna chih lam himhim kana phawkkha vetkei a, ka duhduh ka nezou a, ka deihdeih ka pa ten hong leisak zou mahmah ua, nuam kasa petmah mai hi. Ka lawm ka vualte teng sang in sum bang ka hau zaw gige mai a, huaiziakin lawmvualte laka a Boss pen ka hi gige mai a, lawm leng kahau petmah hi.

Nungak lam alah ka deihdeih ka tangzou hi. Gari hoihtak mai khat tawh a langlang ah ka pawt a, sum bang hau zaw mah kahihman in nungakte'n hon ngaisang mahmah ua, melhoih hetlou pi himahleng tulai pau leh ka Luck petmah a, nuam kasa mahmah hi. Skul kai ding in gari ngen in ka kuan a, ka bag ah book paw vetlou in puan kikhekna ding ka pawjel hi. Skul kai dia kuan gige himahleng amun ka tungzou ngeikei a, ka nungakte tawh kithuzak in sun nitum in gamlak bang, hotel bang leh zu zuakna khawng ah hun kazang bei gige uhi. A hihloute adin amun vaang mahmah bang napi in Lamka na nana achu RP, SP, DENDRITE, ZU, etc atam mahmah mai hi. Huaite ka kham chiang un nuam kasa ua, kuamah ka eng himhim kei uhi.

Mi huat deuh khawng ka neih chiang in lawmte ka kaaikhawm a, zu bang a duh zahzah uh pia in ka vaw sak zel a, huntu ding ka hauh mahmah ziakin kuaman hon chou ngam hetkei uhi. Banah mihausa tapa kahihmanin kuaman ka tung ah thilsia ahihngam hetkei uhi. Kholai pawtna peuh ah lah ka hauhsak ziak mah un deihsakna ka tang gige a, mi teng bang in hon tana u bawl mawk ua, tanau ka hau mahmah mai ua, banghiam program ka neih chiang bang un uaptu ding ka hau mahmah uhi. Kei mawhna a Case bang ka neihkhak chiang un ka pa'n a heutu lian lamte sum tamkhop vape zel in a vualzou in ka pang gige mai ua, khovel ka zang nuam petmah mai hi.

Ka hinkhua nuam mahmah hinapi in pawl sawm leng ka zou kei a, himahleh ka pa'n Certificate hong leisak a, pawl sawm zou khat chu ka suak peuhmah hi. Naupang chik himahleng nuam salaw khengval kahi diam Meithai khat tanu kava kitenpih kha hi. Himahleh kanu te'n hong deihsak hetkei ua ka zi hon va koihkiik sak uhi. Meithai khat lungsim natna guan chu kahi peuhmah hi. Himahleh sum hau akihih chiang in hong it tu ding nungak ka hau mahmah mai a, poi sakna himhim leng ka neikha vetkei hi.

Hun leh nite hong paizel a, nikhat ka pa damlou in hong buai mahmah mai hi. A kiang ah ka omden a, ka pa ziaka hiaizahtaka nuam sa ka hihlam theilua ka hihman in. Doctor kiang mun tuamtuam ah ka paipih ua, himahleh lamet na bangmah omlou ahi dinga inn a ki enkol ding in hong pai kiiksak ua, lupna tung ah a lum dapta hi. Huchi kawmkal ah ka sanggam neih sunsun ka upa in Overdose in hon beisan phut zawmah hi. Ka lung uh akham mahmah a, lah hihthei ka nei kei uhi.
Ka pa lupna ngak a omden ahichiang in a Contract teng leng a semzou nawnkei a, awl in ka buai hiaihiai mai uhi. Pastor leh Saptuam Upa te bang in hon vehveh mai ua, ka pa adin thumna hon neisak gige uhi. Nidang bang hetlou in ka pa'n a lupna tung ah Bible khawng hong sim gige a, ka neutung apan ka pa'n Bible a phen a, thuhoih hon hilh ka zak patna ahi a, ka lungsim hon sukha petmah mai a, khasiat tawh kipah ka thuah hi.

Nikhat ka nu tawh hon sam a, a lupna gei ah kava tu uhi. Huchi'n hong tutou a, "Ka zi it mahmah leh ka tapa iit mahmah, bang teng hileh Pathian lam pii bawl a, Pathian ah i kipiak uh ngai ding ahi. Hon sihsan pah ding ka hita a, ka sihnung a na omding dan uleh na hih ding uh kon gen ut hi. Nidang a meithai tagah I bawlsiat tengteng uh khawng tungah ka kisuanglah lua a, ngaihdam honva ngetsak unla, na nuta un nava kizui ding ua, kei theih gige na ding in anntang bag khat chiat nava piak ngeingei ding uhi. Kikhopna khawng nana pi bawl dingua, kuamah simmawh lou in Pathian muang kawm in nana khosa ding uh a,” hon chi a, azoh ka liang ah akhut hon nga a, “Bawi aw, hon ngaidam in aw, kei napa in dikloutak a sum mu a, neekguk na tawh honna enkoltou kahihmanin kei diktatlouhna gah lou a na u in OD in honna sihsan a, nangle khamtheih na hih a, poi kasa. Kei na pa in na neu uapan Pathian thu a honna chiil a, thilhoih honna sinsak hileng hichilou ding nahi, kei na pa mawhna ngen ahi, hon ngaidam mahmah un aw bawi….” Honchi a, etna ding mel leng thei nawnlou in ka nu tawh kapa ka kawi ua, ka kikahhuan mai uhi.

Ka  pa thugen in ka lungsim hong khoih petmah a, nidang ka hunlui a nuam sa mahmah a, hausa ka kisak mahmah khawng ka kisiik mahmah mai hi. Ka pa hausa ahi a, kei mihausa hilou kahi chih khawng ana phawkkha lou a hinkhua ka zat khak tengteng khawng ka ngaihtuah a, kisiikna ngen in ka dimta hi. Huchi’n kei leng kibawlthak sawm in pan konla a, ka hinkhua teng awlawl in kon kheek tou hi. Kibawlthak chih thil haksa ahihlam ka thei a, mittui luang zungzung kawm in ka kibawl hi. Kikhop hunteng bang in ka kikhawm gige a, tuailai lak bang ah kava kihel a, mite’n lamdang honsa mahmah uhi. Tuailai pawl khawng a ka kizat tung in mi khenkhat in kipaktaka honna vai dawn ding kasak lai in “Hiai pa le gintak huai ding atel de aw, hoih zou mahmah ken teh, nuihzat huai maimai….” Khawng hon chih san ua, azak ahak a, ka puak agik mahmah. Himahleh hiaite ziak a lungke maimai lou ding a thupuuk khin kahihmanin lungke lou in pan ka la thak semsem hi.

Khakhat bang hoihtak a hinkhua kazat nung in ka nu leh pa bang a kipak petmah ua, ka pa bang in “Bawi aw, lungkhamtaka si hilou a, lungnuamtak a si ding ka hita, ka kipaklua…” chi’n kipahpih thu bang hon gengen mai a, khasiat huai bang kasa mahmah hi. Huchi’n ka pa’n le a natna thuakzou nawnlou ahingei dinga, leitung a hinkhua zang nawn lou ding in a muan Toupa kiang ah hon khawlsanta hi. Ka pa sih hi puakhak kasa mahmah mai a, ahita zongin ka pa’n kei hon vuui hilou a kei a tapa in kapa vuui kahihman in kipahhuai kasa a, Pathian in Pa dinmun a ding thei ding a hong muang a ka pa hon laaksakta ahi chi in ka ngai a, Innsung mawhpuakna teng ka zoh a, ka nu hoihtaka kep ka mawhpuakna ahi chi’n Challenge dan in ka ngai a, naktak a pangthak ding in ka kisa hi. Upa nai hetlouh ka hih tawh skul le hoihtaka kaithak ding, panla thak ding chi in haanlung chiam in Pathian kiang ah thuum kawm in hinkho thak taktak zang ding in kong kisata hi…. Huchi’n………..