Ka Awng Nawn Kei…..!! Written By : K. Lianthansang @K. Thansang Zomi
Hauhsak ziak chih dia lah School kai na a ‘Tuition Fee’ lel le ki pezoulou dekdek. Tuition Fee di deih ziak a Sum-le-Pai zong in School or College kai kei le lah, ‘Kailouh Fee(Absent Fine)’ natawm le piak ngai, huai le ki pezou lou a..!!. Ka Melhoih ziak chih dia lah Mi neih bang in Mit, Naak, Kam, Muk, Bil chih-te nei mahleng, a pangkhawm siamlouh ziak un, ‘ Reject’ na di tam lawzel ing a..!!. Taksa hoih ziak chih dia lah mi’ toh teh a ‘Chiang kang’ toh kibang. Hiai Lawmta te’n hon ITNA ziak uh kathei siamkei…!!

Ka Senchiil pan a, kei honna deih ahi ta uh chih le ka haih kei. Zosuan-te tenna teng ah hong maingal mahmah ua, hong inteek pan mahmah uh ahi chih le kahaih kei bok. A ITNA huang uah mi bangzah ana kailut ta di uam chih zaw theikhang, sui(investigate) but di le hinawn ken te..!!. IT tu di leh gum-tu di tamtak aneih ziak mah ua, Inntek tak a hong om(pang) le hithei uhi.

Ka poimoh hun a ka sawk bat leh zat theih gige di’n a om gige ua, a ITNA’ huang ua lut khak a baihlam tuak khop mai.  Ka lawm-le-vual te tungtawn(through) in kana theikha sam a, himahleh a bul-abal un kathei chiang kei.  Ka ki meltheih hoih mahmah ua, himahleh hon maingal louh na di un pantheih tawp in ka na pang sam hi.

Mit-tam mahmah zaw ahi ngei di ua, kei ma in le mi tampi a ITNA huang uah ana ki ‘Tawtah’ ta uh. Kei hon Propose(try) pen uh le atawpna hi di’n ka gingta kei. ITNA’ thu zaw gensiam mahmah ve uh aw..!!. Pau tuam-tuam zangthei ua, a ITNA huang ua koltang te himhim in a sih tan dong un IT den thei hilhial uhi. A ITNA kha(spirit) ua a matkhak te uh, ‘Chief Agent’ in zang geihgeih ua, huaite tungtawn in mi tamtak Khempuk(kalpuk) zel uh hihtuak hi.

Nikhat, Laithon(Letter) hichibang ka mu hi ( A kim sip-sip in thei nawn kei mahleng, katheih dandan tamlou kon gelhkhe di):

To,

Muhchiil Pan Sinlai Honkuai,

Na kiang ah thu tamlou kon gennuam ua, hehpihna leh theihsiamna toh honna simsuaksak ding in konngen masa uhi.

Na kiang a kagen ut mahmah uh, lah kou kam ngei a kagenngam zoklouh uh tuh, nang kon ITNA thu uh ahi. Hun sawtpek a kipan kon ngaih leh deih uh  nahi a, himahleh na lungsim loulam khawng genkhak di kalau ua, banah School naupang nahih lai ziak in kana kidek bawl uhi(midang ahihleh School naupang hi le uh leng ka hawi kei uh). Himahleh, tu’n kou leng ki thuzoh zou nawnlou in, nakiang ah, tuma a nalawmte tungtawn a kon gen cheuh sa uh sunzom kawm a kon ITNA thu uh hon gen kahi zaw uhi.

Hiai Khawvel ah anuam hi’n haksa hitaleh, thuak dia na nu gilsung apan nong pian apan konna deih uh na hi ta. Bang chik ciah ITNA thu hongen le ung nathei siam dia aw, chi’n na Kum zah khutzung kuai zen in kana Sim(count) zel uhi. Kum 13 nong phak in, kou pawl honna It sa na lawmte pansan in ITNA thu kon gensak ua, tua kum 17 naphak tan dong in dawnna kipahhuai kangah ngeikei uh.

Midang toh na kibang kei chih kathei uh. Mi atangpi a kou hon It te bel kum 13 – 18 kekal mi(teenage ngen ) ahi ua, nang’ bel tutan pha in non It theikei bilbel mawk hi. Kou lawi toh Itna gui khaubang a kizop khawm anop dan theilou nahih leh hon hilhthei lua kahi uh. Nang kon Iit in kon deih mahmah ua, kon tangzoh na di un, chance ka hau nawn kei uh. Ka kinepna uh hon suk buching saklou di na hiam Lawm aw?

Kou hon Itna ahihleh, Sihna tan dong Itna ahi. Ka Itna ua ki palpuk te a thounawn a tawm mahmah uh. Lungkham mangbat natuah hun a hon panpih di’n mansa in ka om gige ua, na kipah ni in le hong kipahpih dia mansa a om leng ka om uh. Hauhsakna na deih leh leng hon panpih thei kahi lai uhi. Khatvei bek hong kingaih tuah thak hamham lai ve maw?

Na zakdah di genkhak leh gelhkhak kaneih ua leh hon ngaidam ding in konngen uhi.

Laikhaktu te’,
Nang Ngai A Duangvul;
Khamtheih, Nekgukna leh Guktaakna

Hiai Laikhak kamuh tung in, ka hi meimuai zozen a, gen di pen le kathei kei. “Hiai Itna pen Itna Dik ahi dia aw? A Tongdam uh Naubang a na Sang mawk leng ka Maban di bang ahi dia aw ?” chi in kabuai mahmah hi. Kei mah kikhut dot a ‘Dawnna’ kapiak ma in,  Ka Nu-le-Pa banah ka muan deuhdeuh te ka simsak a, amau hon thuhilhna leh gen te uh tamlou pansan in, ken le Laithon kon gelh tei ta hi.

(Ka Laithon gelh, ahi bang-bang in anuai ah I taking ding):

To,

Awlmoh Leh Vei: Khamtheih, Nekgukna leh Guktaakna

Non Laithon khak uh ka na muh tungtawn in, ka tenna gam ua hong inntek mahmah nahi uh chih kathei a, hiai ah natheih di ua hoih, thu tamlou kon taklang hi. Hehpihtak a atawp tan non simsuak sak hamham uh ka ki nem(lam-en) hi.

Ka kiang a ITNA thu non gen pen uh ka ngaih tuahtuah a, ITNA dik hi dia gingta lou kahi. School Naupang Nangawn hawi neilou a, na ITNA huang sung ua na kaihlut mawk pen uh thil dik ahi kei. Kou Zosuan-te, mi bang a tam kahi naikei ua, ka Gam ua Laisiam leh Makai hong hidi sunsun te nou angsung a non hichi kaihlut sak mawk pen uh ka pawna mahmah a, Ngaihdam theih vual hi’n kon koihkei…!!

Ka Makai masa uh khenkhat te’n, a theihsual ziak uh leh Kou Khangthak te honkhual batlouh ziak un, na ITNA uah ana kipalpai mah le uh Kou Khangthak te bel tua dan a kipal pai maimai di’n honkoih dah mai un. Muvanlai bang in, kou Zosuan te omna tung ah leng un la’n, nou hon IT tu di zongzong mah le uchin, na boh na di mun uh na mu nawn kei duh..!! Huaiziak in, hon IT na ki chih ua leh kou, Gospel Centinary lawmthei hial a om te lak zaw hon nawse mahmah mai ve ua, na et-lah mahmah uh ‘Khangthak-te’ lah Ka Nam leh Gam uh a ding a Khuampi poimohtak ahi ngal ua.

Nang Khamtheih aw, ka Gam uah kuamah khem zou nawn kei ni teh..!! Ka Nam leh Gam uh na suksiat phet hilou in, ka Innsung uh na susia a, Innkuan nuamtak a omlai bang na tokbuai chiitchiat sek a. Huaikia le ahikei, Innkuan hausatak a om te nekang tu le nang mah nei ve..!!. Kou Zosuante ka hai nawnkei ua, nang khemzoh di kuamah ka omnawn kei uh. Na thil hih tawpsan ta in aw Khamtheih?

Na Lawmpa uh bang a, Nou Unau( Nekgukna leh Guktaakna) in le Ka Gam ua Vai hong hawm sawm nahi uh hia? Mipi khual lou leh Maban saupi ngaihtuah lou khenkhat na khemzoh ziak ua hong hichi maingal na hi zaw uh hia? Na Lawmpa uh’ Khamtheih in Guktaakna te ka gam uah a samlut a, tuni chiang in Ka gam uah hong pumdim ta uh. Himahleh, tuni apan in khemzoh kuamah na nei nawnkei duh…!!

Nang Nekgukna aw, Guktakna’ sanggam khat nahi chih ka haihkei. Officer khenkhat na khemzoh ziak a ki Innteksak mahmah nahi maithei. Himahleh, kou Khangthak te’n Neguthei cheuhcheuh makai te ka deih nawnkei uh. Na Itna huangsung a na-na kaihlut sa teng  zaw na tantawk ahi ta. Huaiteng ah Lungkim dan  ana kisin mai ta in aw. Nangziak mahmah le hi di eive maw, ka Gam ua ‘Development Work’ khenkhat in sawt adaih louh phetlouh ‘Table Work’ a abei mai sek..!! Makai ‘CHETHEI’ te ziak in thil kibawl peuh ‘SETHEI’ pahpah a, huai zaw hun paisa ahi ta. Maban ah zaw, khemzoh kuamah neinawn kei niteh..!!

Ka tawpna pen dia na kiang ua kon gennop, ahihziak a apoimoh lou hituan lou a omlai. Nou ITNA thu non gen ma pek ua ITNA thu hongen a om a, Kei ziak a atapa tang neihsun ‘Sing Cross’ a kilhlup hial le khawk salou a hon It a om. Amah ahihleh Pa.Pathian ahi a, a tapa Jesu Christ tungtawn a ITNA thu hongen ka na sang ta. Ken le ka ITNA ka na Pethuk ta a, Sanmun muangsa kahita.

Huaiziakin, ITNA thu uh zaw hongen nawn mahmah kei un, “ Ka Awng Nawn Kei..!!”.

ITNA thu himhim gennuam nahih ua leh Pathian’  hon ITNA thu gen zawta un aw…? Ka Laithon chinglou tak non simsuak sak ziak un KAKIPAK.

Laikhak-tu,

Nou-te Hon Awlmoh leh Vei;
HoihDeihBukim

Laithon khakzou chu kahi phot a, a muh ngei uh leng ka lam-en. Ngaihtuahna neithei leh ‘ABC’ simthei chiang a di’n zaw theihsiam a hakkei di. Huaiziak in, ka Laithon khak in Na a sep a, tunung chiang a Zogam hong pallut ngei ka gingta. Ka Gintak ziak mah le ahi dia, lungnuam tak in ka omthei ta hi.

2302 – KAKIPAK - 2014