ZOHUAN BAWL NA LUNGLUT HIA? ~Dr. R. Sanga
Mangkang pau a “Farming” kichi pen ei pau in “Zohuan Bawl” chihna in koih le’ng i gennopdan toh kituak lianlian diing hi.
Thupatna:
Naupang neuchik ka hihlai akipan tangval hihtan dong; aphamsa, ka Pu Damsing Laingek makaihna nuai ah Zodawn khawta khat ah ka teeng uhi. Nekzonna haksa leh nasep-silbawl kong bangkim ah biang a khaw-ul kai zoihzoih a nasep hun atam thei mahmah hi. Kum 1970s hunlai vel in bel Zohuan (Zolou) nei a kivak haksa lawmlawm lou hi. Buh-le-bal ahoih a, kham apiang mahmah hi. Khawsung milip nekzonna kibang, Zohuan bawl 98% vel khawng kihi diingdan ahi. Buhbuk nih-le-thum nei zong khawsung ah mi bangzah hiam huai hunlai in ana om tham uhi. Kawl a nisuak sim a, azu-aham thuak a Loukuan in; nungak-tangval Loukhou a kilawm dupdup mai, midangte khawsakna zong phawkpha baan vet lou, kua mah eng lou, midangte in zong hon eng tuan sam lou uh ana hidan ahi. Tantawk a lungkimtak a khawsak bel ahunlai a diing a nuam petmah hi mai…!!
Zodawn Nekzonna leh Siamsinna: (With Reference To Mualnuam Village)
Kum 1969 akipan Mualnuam khua, Thanlon Sub-Division nuai a om, khawsung mite kituaktak a tenkhawmna khua ah inkuan in ka teenglut uhi. Phalbi chiang a huihzang hat mahmah, ni suakpah het lou, tumdoh, mawltual pamzek a ‘Kawl’ kilawmtak kikham zihziah Thanlon leh Mualpheng tangdungte agaal a kimu zii-ziai, Zodawn khua a diing a Inn tam huntawk ahi a; Zin-le-leng angahthei mahmah a, amaute’n zong nuamsa in, nikhat/ninih anituan chiang un a tlangnel pahpah sek uhi. Nekzonna pipen ahihleh Zohuan bawl ahi a, Zolou khou a kivak in, kumteng a hihdan ngeingei mah: Louvat, mangtawm, buhtuh, loukhou, buhmin chiang a buh-at, buhseek – akumnawn chiang a zong tuadan mah zui zel, kikhek tuan lou, Heipi leh Tempawng taathiam zihzeh ngai, tua chibang ngen mah a nekzonna paitou ngitnget ahi hi.
Mualnuam khua ah High School aom hak mahmah mai a, khawsung Hausa, aphamsa Pu Tualkhohau Memorial Junior High School (i.e., Class VIII) tan ziltheihna aom lel hi. Tua ahihman in Siamsinna lam ah tuantualtak in ana omtou nilouh hi. Siamsinna toh kisai kum 1975 vel akipan khawsung biik a diing in khanlohna thupitak om in; Awlmohna toh High School piching bangchileh kineithei diing hi hiam chih ngaihsutna sinlai naupangte leh sinsaktute baan ah aphamsa, Pu M. Kaizathang Guite leh Hausa khawnbawl upate nasatak a pangkhawm in Manipur Sorkar ah ngetna lai thehlut in bohzuitou nilouh uhi. Huchi in Junior High School apan Upgradation Order No. 23/4/73-SE(1) dated 2.3.1980 dungzui in Tualkhohau Memorial Government (full-fledged) High School ah dopsang in hong om thei khongkhong hi. High School ahong om akipan Matriculate tamtak hong suakkhe zungzung in, khawsung mi Graduate level azou zong hunkhop om samta hi. Kum sawmsung bang High School gahsuah hoihtak om hinapi in bangziak pentak hi hiam chih zong theihbut louh phial khop in tuni chiang ah hiai, High School pen a segawp dimdem maimah hi…!! Bawlhoih zoh diing zong bang lou khop a kisia in sinlai naupang diing zong om lou phial in Mualnuam Tualkhohau Memorial Government High School hehpihhuaitak dinmun ah om nipnep maimah hi. Siamsinna lam ah kiakniamna thupitak Mualnuam khua kia hi lou in, Zodawn khuate ah om tou lellel hi. Adamsakna koilam a hong kipan diing ahia? Gamdang leh Nam dang mite akipan hong kipan diing hi lou in “Nang leh Kei” a hong kipan diing ahi chih phawk chiat le’ng apiangkhat hong om theipan diing hi. Imphal a hong kipan diing hi lou in, Delhi a hong kipan diing zong hisam lou hi. Eilak mahmah a hong kipan diing hizaw hi…!!
Zohuan Bawl Thil Kul-le-Poimoh Ahi:
Vai dangka laipek kine thei het lou ahihman in Zohuan i bawl keileh tunung chiang a bang kine peuhmah diing hi hiam? Zohuan bawl lou a sum kiningching chikchiang a nei mahmah diing? Sumsinna lam chile’ng ei pawl kisiam vet lou zel, zankhat thu a hauhsakna lel ngaihsutna anei mi tamzaw hi maimah… Zohuan bawl diing in hauhsakna akiphamoh masa kei a, hausa diing a Zohuan bawl kisam hizaw ahihlam tuni in phawkthak chiat le’ng i chi ahi. Michih in hauhsakna a deih chiat ngei in agintakhuai hi: Huchi ahih ngalleh tuni a bang hih a, bang bawl diing chih pen dotna poimohtak ahita hi. Kei mimal muhdan leh ngaihdan in bel eimah mimal khut nasep gah mah a kingak diing ahi chih lungput a nei a, mailam nawt a kalsuan kisam hi. Sorkar nasepna pen loh muhna diing in ahoih a, aphatuam mahmah chih thudik ahi. Himahleh Sorkar nasepna michih in ngah zou lou, sepna leina diing a sum nei lou mi tamzaw hi zel, mahni mimal siamna leh hihtheihna a Sorkar a sepna angah zou mi hunkhop om mahleh huchibang a siamna leh chitna nei zou lou mi tamzaw, Zodawn ah om mitmet lai ahihman in Zohuan Bawl pen alungluthuai lel hi lou in, thil kul-le-poimoh petmah ahi hi. Banghang hiam chihleh, siamsinna pen aman tam mahmah napi a poimohngaih petmah diing bel hi zel ahihman in akul-le-poimoh hun a sum zat diing i neihtheihna diing in bel bang hiam khat ei mah mimal in i bawlkhiak kisam masa hi. Tua diing in Zohuan bawl diing a kalsuan in, mitsuan thei chiat le’ng a lungluthuai lel hi lou in i khawsakna leh nekzonna toh kisai a thil kul-le-poimoh petmah hizaw ahi. I gam, khua-le-tui kepbitna hoihtak hizaw mah lai…!!
Mun leh mual kichian anei lou mite a diing a Zohuan bawl kichi baihlam het lou asuak hi. Zomi Economic Policy and Development Agency (ZEPADA) malakna dungzui in Hausate toh Kilemna letmat bawl in Zohuan bawl a lunglut kuapeuh a diing a kong zapi honsak in om hi. Khawsung mi kua hiam khat peuhpeuh Zohuan bawl alunglut taktakleh “Land Lease Deed,” Hausa toh kilemna suaikai in chiklaipeuh in Zohuan a bawlthei gige hi. Haichii chiin diing dungzui a “Land Lease Deed,” hunsung kum pen kinga lel diing hi. Gam neih louh pen paulap a neih hun ahita kei hi. Leitang pen kine mawk thei lou ahihman in Hausate in zong a khaw-zongte a diing a Zohuan bawlna diing a gam leitang piak diing aphal lou aom uh gintakhuai het lou hi. Aziak bel ‘royalties’ piakdan diing paizia pen ‘Land Lease Deed’ ah kimtak a gelhlut a om diing ahihman in lungmuanhuai mahmah hi.
Thukup Khenkhat:
1. Zodawn, singtang khuate a Laizilna mun (Schools) a semtute (Teachers) Sorkar in loh apiak uh ahihman in asepna mun chiat uah om in ginomtak in sem chiatle uh kuamah a thangpai om het lou diing ahihman in vualzawlhuai mahmah diing ahi.
2. Khawsung Hausate leh School Teachers khat peuhpeuh kigul-luk mai lou a, siamna, pilna leh theihna Pasian in vualzawlna apiak ziak a Sinsaktu a pang kuapeuh in Sinlai Naupangte itna ziak a asepna mun khua chiat ah Pasian bia in pahtawina naupangte toh neikhawm diamdiam theile uh i gam adam diing hi.
3. Khawsakna niam lua dinmun a om khat peuhpeuh dinmun saangzaw a dopkang ahihtheihna diing in Zohuan Bawl diing in lungput nei in, mabang pan le’ng insak-inkhang kuamah peuh ankhing-tuibuk kikholtuah thei diing hi hangh…
4. Mahni khut nasep gah mah a kingak diing ahi chih theisiam in kuhkaltak in sem le’ng i khua-le-tui kembit diing hi hangh…
5. Hausate leh mipite kal ah tuma saang a hoihzaw seem lemna leh kituahna aom gige theihna diing in Pasian lau a, bia in khawsung vaihawmna pen itna ah kibulphuh ahih gige diing ahi. Itna in hazatna nei het lou, hoih lawtel ahi. Pasian in mi kisatheite a dou a, mi kingainiamte adomkang chih thudik Kibulphuhna a nei gige diing in kihanchiam thak chiat ni.