Tuunnu' vang hi Ngaih aw~Hatlang Mungpu

Niangbawi a hong naak kah luat ziak in ka thil gen ka sun zom thei nawn kei hi. A kah naziak diktak ka theikhe zou kei. A zakdah ding thu ka gen kha a hiam, chih ka dot chiang in bel gen kha lou ka hih lam hon hilh zel hi. Ke’n leng a mit a khitui luang khia te awl in ka nulsiang sak hi. A lung hong nuam deuh ta ding ka chih in ka hon houlim pih nawn hi. “Nupi te’n kha kua (9) sung vingveng gim leh tawl tak a, nau ana paai bang ua nangle ka lungsim tawng ah kha kua bang ana teeng ta na hih lam na theih hoih sa kahi Niang” ka chih leh Niang in “N’on thil gen zaw ka theisiam lua, hi lele” chih toh khasiat hon thuah nawn bang chu keia di’n le a nuam kei tel mai!

Niangbawi bel mi kisa phuh litlet mi ahi. A vunte ngou in mam hinhen hi. A samte sau in ngaih bang mahmah a, a taksa tung asiangthou thei bang pen in kem gige hi. A mit hah nem in, huai in ka lungsim luah zou pen hi. A kamsung pan a suak khia ‘aw’ te ka bil ah neem in khum dii-dii hi. Sakmel lawmnou Zolianu’n ka sinlai gubang hon zen lua chia! Singdang lianu zatam te sa’ng kei zolianu mah et in lawm ve chia! Naupang khenkhat in, mi a ngaihsang te un EK nei lou ding bang in na koih uhi. Kenzong hiai naupang te bang in ngaihsutna ana nei nuam phial ing! Ka taktak eive, ENGLISH te, KOREA te kua ahi tuan ua?

Niangbawi te’ inn ka tun gige pen ka TUAILAI lapawl zil pih te a pa’n demna ka ngahna pipen khat ahi hi. Hawhlou ding ka chih hang in, ka kideek zou samkei hi. Kalawm-kavual te’n zaw kei’ theihlouh tan thil ana thei hi ngei ding ahi ve ua! Niangbawi a ki pan dawnna kipah huai lua mulou himah leng kava lenglat akiam tuan kei hi. Ka khonung ngaihtuah chiang in bel, huchi bang munte ah TUAILAI HEUTU, UPA, PASTOR, chihte ahoh mun deuh na di un ka mu khonung hi.

Ka lawmpa MINLUN inle ka dinmun hon ngaihsut sak chiang in ana lung himawh peuh mah ahi ding! Amah bel ka neu a pat ka lawm hoih pen ahih bang in, tutan inle ahi denlai hi. Lawm hoih mahmah ka hih hang un ka lunglut na lam uh ki banglou peet mah hi. High skul ka zoh ua kipan in ka kaikhawm thei nawn kei uhi. Amah science lamah pai in kei pen commerce ah ka pai hi. Ka lunglut louhna subject ana lakha kahih lam tu’n ka khonung theih pan hi! Ka lawmpa pen aneu aki pat in midang toh kibat het louhna nei hi’n ka theithei hi.Thil hou chikchik a I ngaihsut te ama’n ana thupi ngaih mahmah thei hi. Thil neu chikchik zong ‘ngun’ tak in ana sui ngiatngiat hi. Ka neu a pat kana lunglut mah bang in tu in ken DUMDE FILM COMPANY ka hong khia a, tua ah Director nna ka sem lel hi. Ka lawm pa’n le aneu a pat ana tuui na mahmah damdawi lam toh kisai nna sem a, ka chil kivei na lam tuak uh sem kha ka hih man un, ka nasep uah nuam kasa un, lawh zong ka lawhching mahmah uhi.

Niangbawi kiang a ka itna simthu khaubang ka sut lai nite lunglai ah tham den veh aw! It chihtak a zaw ana it kha kahi ngei ding! A haksa tel mai maw itna sinthu leel ding! A hi zong itna hang in zeh in ka zum zong, gen lou thei lah kahi ngal kei a! Lawmte gensak di chileng lah PA huailou deuh a bang a! Itna ziak mah zaw hi, a hon kai tuntun mai sam ka chi! Ka gentung lai bang zaw ka ling derhderh sam aka… Mi maimai houpih leh I iitte houpih kikhiat dan tu’n ka chiang chet! Lei leh van ki khiat dan toh kibang kasa! “Niang, meel k’on muh chil pan sinlai ah tham den cia, ahi zong na siang ah itna simthu k’on leel ding zeh in zum ve’ng! Sanmun muangsa na hihlouh dan ka theih in kasinlai nuamsak tuam e.. Zehzum khuallou in na siang ah ka itna sinthu hong leel ing, nau bang hon sang ve maw” ka chih zoh chet leh ahi, kham vuallouh a ahong kah! Ka khemkhem hang’ a tawp thei zok kei! A hon muhdah ziak a kap ahi diam? Ka ging ta kei..

Hunte hong kivei zel in, Niang te’ inn a lenglat ka khawlsan tuan kei hi. Bang ziak a, ka itna thu ka gen chiang hong nehnou sek hiam, chih ka theikhe zou mahmah kei hi. A hi a lah, ka theih nuam pen ahi gige hi. Awl- awl leh a hem a ka dotdot hang’ gen haksa asa tel mai! Tu in a u’pa Muanpu toh khosa lel ahi uhi. Anu leh pate la? A pa’n kum thum paisa in mualliam khin santa a, anu’n bel tukum bullam hi’n ka thei. Hehpih huai na uh e, tagah nu-le-pa bei a om! Hichi bang a mihingte’ omding Pathian in phal ahi ding maw! Nu-le-pa toh ka khosak khawm hang un haksatna ka tuah hun atam mahmah mai! Niang’ haksatna hiai teng a bei mai hi di’n na gingta hia? Teuhlou mai! Hiaite khawng anep lua thil ahi lai!..

Hichi bang haksatna, thuakgimna, lungzinna, mite’ muhsitna a tuahte ka muh in, ka itna a pung in, alian hulhul in kathei hi! Itna taktak zaw hichi dan ana hi maw! A hoihlouhna pente uh I itna pen ahi daih mai kachi! “Singdang zatam te’n tongsia hong leel zong ngaih aw, anbang kon itna vanbang sang hi e, gibang khenna simthu leel keini maw ngaih” A ki lawmsak na dia aphuah uh kasak leh, a taktak ana hi maimah ve! Ka gen tung in dawnna kaki nep bang mukei mah le’ng, Niang inle a guuk a hon na vei mahmah ahih lam ka khonung theih thakthak hi. Ka ki-it tuah peetmah ua, ka ki-itna hang un mite gen siatna te bangmah in ka sim kei uhi. Hun ka neih sunsun chiang in Niang teh kava leengla gige hi. Itna sinthu khaubang suut khawm in, nuihchiam lel in hunte kazang zel uhi. A nuam tel mai! Ka itna thu, ka gen tung lai a ka zumdan leh ka nervous dan khawng ka khonung suut chiang un, nuam kasa ua , ka nuikhawm zaizai sek uhi.. Veng-le-pam in le lamdang honsa hial uh abang! Hiai innsung ah hichi bang husa aki zak louhna hun sawt kuam tak ahih man ahi ngeiding! Zawlla tuamtuam bang kasa khawmsek ua, la khenkhat bang ‘ei tegel a di mawngmawng a, a phuah uh ahi di’ chih bang ka omsak zozen uhi. Kua’n le kou honna thei kha di le a d’uam ah! Thilhoih lamlam ka ki pia ua, maban ding bang saupi ka gen khawl sek uhi. Himahleh maban ding eikhut a om mahmah lou ahih dan ka khonung theih thakthak hi.

Genlou di kachi na a, ko’n gen thak mai di. Kua mah kiangah ana gensawn kei le uteh. Nitak khat ka mangngilh thei hetkei hi. Ka damsung in zong mangngilh zou di’n ka ki ging kei hi. Coffee dawn kawm in tutna sau khat ah ka tu khawm uhi. Tua coffee pen ei’ tualsuak ahih ziak hia, lim kasa peetmah hi. Gamdang bangzah hiam ah leng ki thonkhia(export) hi. A ki thon khe zah et in gamdang ah zong ‘demand’ sang mahmah a hih tuak ve. Maban a kiteen ding thu bang ka hong kikum taktak bang u zaw ‘ahi di sa’ dan in ka koih mai uh! Tua nitak chet zaw bang ziak adiam ka thei zou kei. ‘ Lawmlou omlou khang ki dang ta’ chih la bang ka ngai ua, kaki siam tan mahmah uhi. A hih hang in Pathian ma’ ah siam ka tang tuan na d’uam ah!!!Pil huntawk kaki sa mahmah hi. Bang ziakin la? Ka sapum aki siatzak gawp louhna ding a ki ven dingdan thei hi ve’ng! Niangbawi nute’ leenlai inle tua bang a lungsim zangkawm hi le uh, hiai leitung beek ah hichi tel a gensiatna leh tuambawlna thuak lou ding hive un! Banah, asuan-a-khak te unle hichitel a thuak lawh sam lou mah di hi ve un!! Sihnung ding thu bel thutuam in koih le.. A hihhang in sihnung chiang ding pen lunghimoh huai zaw abat ton om! Bang ziak in maw? Tangtawn I chih ki panpan ding hi ven!

Tu nitak chiah in zaw thuguuk kichi himhim a om nawn kei chi leng khial lawmlawm di’n kaki ging kei hi. Ka lungsim ua ka puak gik uleh ka vei te uh chiang deuh fikfek in kaki hilh ngamta uhi. Tuni ahi MITE’N Niangbawi te ahichi tuam etna ziak uh ka theih pat. “Kei mohna hang hikei chileng kei honsuang tu kanu mohsa lua ka bang zel dia hiven!” a honchih leh lungsim piching kasa mahmah hi. Kei ama’ dinmun a ding hileng ka nu pen nak mohsak mahmah di’n ki-um ing! A hih hang in Niangbawi in anu a itdan thute a gengen theih pen thupi sa peetmah ing! A hitak a gen in, Niangbawi’ pa sihna thu pen ama’ mohna dan in ka koih thei himhim kei mawk hi. Niangbawi’ pa adik a, ami hoih pumlum kachih nabel ahi zenzen kei! Hichi bang mihing zaw NU le ana hidah mai leh, bang kachi lungsim hi. Niangbawi ka en a, mahni khelhna ziak le hilou a hichi bang gimthuakna athuak ka ngaihsut sak chiang ka pona peetmah hi. Hih theih lah bang mah kanei ngal kei a! Pasal pitou himah leng ka mit a pan khitui ahong luang hial hi! Amah kia hi leh thutuam lai, a u Muanpu’n bang chikchiah zi amu zou mahmah dia awi? NU’ mohpuakna lian hina tel e! Khovel in hichibang nu a poimoh kei tel! Pianglou bang hi le uh khovel anuamtuam ngot di chu! Khelhna gah, akhialte’ ki puak di’n hoih kasa tel! Bang hang a NU’ khelhna amah kia’n aatlou ahi di? Bangmah khelhna neilou naungek tuisik in ama’ khelhna hang a, a thuak ding phal ahi mahmah diam?

A hong pichin deuhdeuh chian’ Niangbawi in zong mite’ bawldan a hon thei hoih semsem hi. Mi hinpih banglou zen a kibawlna in Niangbawi’ hinkhua sutom in ka ngaihsun hi! Khalam hi’n salam hileh kuama’n phawk kha mahmah lou abat ton om kasa hi. Amau unau’ hih khelh ziak ahih louh dan lah kua man a haih ngal kei ua!

Ka gelkholh sa uh mah bang in tuni dt.14 February, 2074 dak 2.30pm geih in Lamka vangkhua aki pan ka hong kipan khia uhi. Koia hoh aa bang hih dek hi di’n non gingta? Hun tomchik sung in Mata Dam ka hongtung phei pah uhi. Hiai mun ah hun tomchik ka om uhi. Lia-le-tang te’n nuamsa hina tel uh e! Amau’ nopsak zawng chiat in hunte zang uhi. “Hichi omleng mite’ muh a kilawm lou ding ahi” chih a om sekei! Banah, “nou omdan kilawm kei” chia mi omdan teng va soisel ding le kua mah omtuan sam in kamu kei! Hichi bang zaleen gam a ngabang ka leen khak pen hampha kisa mahmah ing! Tui piau gei lak khawng ah lia-le-taang phe seuhseuh te’ nopsak dan ka muh chiang’ ka tha thou mahmah hi. Kuasih-kuahin phawkphalou a om tuailai khangnou te’n nuamsa hina mai zen uh ee! Kou leng Niangbawi toh hun nuamtak saulou hiaimun a ka zat zawh nung un maban sawn nawn ding in ka hong kisa khe nawnta uhi.

Gari a tai kawm in la tuamtuam ka ngaikawm uhi. A tawldam huai tel mai! Huihte siangthou peetmah hi. Hichibang a Zohuihkhi ka diik chiang singdang ka-eng tuankei! Lam sak leh khang a sing hing dipdip te bang sing hi peuhmah ding hiam? Sing a zaat-zaat a pou te, a-et mahmah in zong ki lawm in nalh mahmah hi. Tua singte coffee ahi deuh tangpi uhi. Dakkal 2.30 ka tai nung un ka hohna ding mun uh katung ta uhi. Tua laitak in ka pu’n a damlai a hon thugen ka phawk khe thakthak hi. A kholui utoh Lamka kikar dakkal guk/sagih lakvel pai tangpi sek uh ahih dan agen ka za kha ngei hi. Gintaak hak kasa! Ka pu’n lah azuau hon hilh ngal di’n ka gingkei zel a. Amau hunlai a lampite bang ana chi ahi diam maw, chih bang ka ngaihsun hial hi. Tu’n bel lian in mam hinhen a, luun peetmah hi.

Guite kual kaphak un kalung uh nuam in, zangkhai mahmah hi. Ka pu’n adam lai a agensek thilte a vang mahmah hi. Buh kichin’ na LOU(singtanglou) muh ding himhim a om nawn kei! Singngat Sub-Division sung tengah COFFEE a ki chiing tangpi deuh hi. Mualte hing dipdip in kho hun (lum-le-vot) nuam hun lel hi.Niangbawi toh tua singnuaite a zohuihkhi siang nung hiauhiuau na mun a, hun ka hon zat khawm bang uh zaw ngilhni chikleh tuang atung thei nawn mahmah dia! Ka tung ua singkung a vasa nih(2) phe leklek kamuh chiang bang un ka lungsim uah bang hiam hong om khat a om hi. Itna simthu khaubang sut in nunnuam in ngabang ka leeng khawm uh bang zaw kua mah ka pawimoh kei tel mai uh!

A taangpi in mite khosa thei mahmah uhi. Nidang a “farmer” ka theih dan toh tua ka theih dan ki bang nawnlou peet mah hi. Tu’n bel kapu te hunlai bang in “hausa” akhang-akhang a ki luah sawn hi nawnlou hi. Mipi te’n deihtelna kichian tak zang in khopi hi’n khota hita leh khosung vaihawm tu ding hausa kitel thoh chiat hi. Hiai bang DAN aki zat tung in ka piang naikei hi. ZOGAM kichi I lungtunna bang in piang khe naikei mahleh Phualpi solkal in ZOMITE ei-le-ei kivai hawm theihna bangtan hiam a hon piak aki pan hiai DAN kizang pan ahih dan ka laibu sim te-a ki pan in ka theithei hi. Gammang aki pan I pawtkhiat na uh kum za-le-sawmsagih-le-li (174 yrs. i.e, 1900-2074) lakvel hi panmah leh ei ZOMITE ikhan dan uh ka muh chiang in thupi kasa peetmah hi! A hoih lam ah nakpi tak in ki khangtou a, tua mah bang in a selam in le hon hawi tuan sam kei! Huai tuh ahi di mah in ka ngaihsun hi. Khovel a nungta lai ihih sam chiang a!

Ka paneu te veh a hoh himah le-ung, amau toh hun ka zang khawm tam kei uhi. Ani zing in Niangbawi toh kapaneu’ tapa pa khat toh ‘Hauzasing’ sihna lui guam lam ah kava hoh uhi. A tangthu kia a izaak himah leh I mit kha ah sahang toh akisuallai bang uh hong dawk thei mawkmawk hi! Hichi bang LUI tangthu akigen damsung a kamuh khak man un, Niangbawi toh ka lungdam mahmah uhi.

Nunnop lai nite a tom ngei mai. Ngai-in malbang kou zongleng sulkik simthu lah leel lou dia maw. Mihing te nuntaakna hichi lel ding mah adiam!! Nuihchiam leel a, nau bang I nuih khawm lai nite ngai na’ng ee. Thuaksiam ahak ngei mai! Zalna lai khuntung a nunnuam a sambang zal a, sangbang iki nouh ding haibang ingak , athawn lel ahi tamai maw ngaih! Na nua chiang ah taang sanggah gamgua bang hing zou ding ka hiam aw, ngaih?

“Thangvan ah dawn bang kituak ni aw ngaih” a honchi khia bang zaw taang sanggah sinlai gubang in hon zen lua sa’ng! “ Niang, na laukha hualkhau bang khih theih hi leh zaw” chih louh kan gen di a vaang mahmah! Mangbat huai chih louh kan a dang omtuan loupi! Ka mit ka nuainuai na a, ka manglam ahih louh dan ka chiang mahmah! Kua mah a di’n heet khak ngam hikei mah leh ka angkawi in ka tawp tonton mai hi. A thuak hak tel mai! Ama’ pan theihna tawp ah zaw Niang le pang thou mah e. Himahleh mihing’ tha haatna toh ki khaam taang zou mahmah lou ahih lam aki lang mahmah! “ Lung nuam tak in khaubang chiah mai in aw ngaih, tung thangvan ah dawn bang kituak ding hi hang!” ka chih zawh phet in a laukha in tung thangvan lam hon zotsan ta hi. Simlei tung a sakmel kimu nawnlou ding chih ka ngaihsut chiang’ ka khasia a, ka hehtha lamlam bang a suak hial hi. “Sian aw na lemgeel theihsiam ahak ngei” kachi a, Pathian bang ka mohsa nuam phial hi. Pathian zaw mohsak vual ahi kei! .Niangbawi sihna tawh kisai in Ka lungsim nuamlou sak mahmah khat tuh SIHNA chihna mun ah SUNGNA aki chih mawk pen ahi hi. Banah, mi tawmchik peetmah kaki pei leklek uhi.

Niangbawi’ khakiak zoh sawtlou nung a ka lawmpa Minlun’ hon thil gen in ka lung hon kam in, hon su nuam mahmah kei veh aw. A kikhel sa zaw ahi. Mihingte’ thahat na a let taang theih liai hi leh lentang nuam mah hi ve’ng! Tu’n zaw a tam zaw tham in phat tuam pih peetmah uhi. “Na zekai lua a ahi” chia lawmpa va mawk mohsak theih lah ahi tuan ngal kei a! A mah le zaw kei toh Niangbawi honna khual luat na lam a, huchi tuk khop a, ana pang ahih lam ka haih kei! Lawmta ki-itna le zaw lian hina tel ee! Hichi tuk a keia dia ana panna ka ngaih sut chiang, lamdang bang kasa a, ka kipahna a lian petmah. Niangbawi’ hinna humbit man keideuh mah leh hiai ka lawmpa’ khuak aki pan piangkhia “damdawi” in mi tam hinna hondam hina tel e!

Ngaih na nuachiang a khattang sawlbang hei zaw ana ngei mai. Nangngilh ni lah tuang tung ngeilou dia.. Sambang zaalna lai khuntung ah nunlui mualliam sate suutsuut ve’ng. Khattang lungzuan kasial thangvan pan maimit na hon suan ngei na’m?

Lupna tung a ihmu theilou a, kaki heihei na lam in ka maimit laukha ah ka hunlui te uh ahong lang dundun hi. Zuansialching’ restaurant a SIHZOU LEH SAKHI SAHOU POK ka neek lai bang uh ka ngai tuanse hi. Chiamnuih gen a, nuamsa tak a ka nuih lai nite uh ka mitkha ah ahong langlang mai hi. A nuihmai hiu-hiau te’n ka lungzuan heh hon nem mahmah in ka thei hi. Tua mun a ka tut kawmkawm un Niangbawi in “ khristian dansiangthou a kiteen hoih law lele, innsung in hon zir lou lua ahih chiang in ki guuk thoh mai ni maw , iki teen chiang in” a hon chi hi. Ka thupi dawn kei! “Vanken lambang a le n’on theihsa kahi, bangmah zaw kilamen din ko’n gingta kei na a” a hon chih leh ka lungtang hon vut zou mahmah in ka thei.. Hichi bang in kenle ka dawng thuk tei hi “Na lung khamna te a hou kasa, hi lele ka hon mohsa kei. Mi tamtak te le hiai a buai ahi uh. Nang chauh hilou! Ka ngaih dan kon gen di, ana ngai in aw” ka chi hi. “I kiteen chiang in moupuan di’n NAMPUAN na hon silh dia” ka chih pat leh “ a hoih law nguut di maw, tua ki zang derdorte zaw westernte’ hihdan I chiin(copy) uh hi lel a maw” a hon chih pah leh “ lek-lok te, ko’n gen khin photkei dia” kachi suk pah nawn hi. Ka khonung ngaihtuah leh kaki siik na alian tel! Awl a, kamdam a ka gen di zaw hia maw, ka chi a lah, thilteng aki kheel khin vekta! “Vanken ichih nidang a ipi-pu te ana ki ken sak teng uh hoih kasa, ahih ziaka huailai a kizang, tulai a kizang nawnlou te tuh tulai a huaite’ taang a I zatte iki kensak lele sia kasa kei, adangte zaw ta-le-nau neih zawh nung a iki piak bel thil hi thei tham ahi” kachih leh “ kenle na thil gente dik kasa thei lawtel I minam in chiin dan in ki nei leh ka chi lua, azawng- ahau adia hoih penpen dia gingta kahi” chi’n hon dawng a……