Biak-Inn Sung Ka Tangzou Ngeikei! by ZM Tonsing

Nidang a ‘Leitungbup Zomi Nam Khawmpi’ (World Zomi Convention) ana kineingei ahihlam ka theikha sam a. Tua Leitungbup Zomi Nam Khawmpi a 3veina Manipur’ khopi nihna, Lamka khopi ah October 25-27, 2013 sung a i neih ua leh hiai bang khawmpi 2vei ngut ana kineikhin der-ta ahihlam ka theikhe phing hi.

Khawmpi masate a ana kitel khalou a kihihna ah tutung a i khawmpi zatpen uh kei a di’n tehpihbei ahi mai hi. Nidanga te toh teh in a houlua, athupi zo-tham, mi a tam/tawm zaw, a gahsuah a thupi/thupi kei zaw di, amasa te kaan om kei chi’a phunchiak thei dia ana ki-omlou ahihman in tutung The 3rd World Zomi Convention chiah bel kei a ding in ‘tehpihbei’ ahi mai!

Sepna ziak in sun-hunte ah va kihel theikei mahle’ng nitak hunte ah bel kipoimawhsak chihna le hilou in pellou in ka va tel gige sam hi. Thugen dite lah siamvek; ngaihnop huai chiat, mun tuamtuam a tel ut-huai lah khatkia kihi boksi. Buai thlak a om khopmai, aka ch’aw? Tarik 25, October 2013 nitak paibaih deuh in Heutupa Damkhothang thugen ngai diing in vuahzu-daikai nuai ah ka va Thingkangphai hi. Biak-Inn neuziak chihna le hituanlou in Pathian thutak ngainuam mipi a tamluat ziak in Biak-inn  sung pen kei leh midang tampi a ding in mun-awng a om kei. Hiai hun in leng programme kipan bel hinailou hi. Biak-Inn sung tanglou, vuahzu nilhnelh thuak a, ding kawm a kong a kikhawm himahle’ng nopsak ziak zaw ahi peuhmah dia kikhop hunsung bang tom ka sa zozen hi.

“Kei hi ka mel mukha nailoute’n ka min a zak chiang ua upa mahmah di khawng a hong ngaihtuah uh ahi. Damkhothang kichi upa minlua a diam ah!” heutupa Damkhothang in hon chihleh ka na kizephawk ngal ngei! Ke’n leng a mel ka muhma a tua a gen bangbang ngaihtuahna ana neitei gun mihing khat ka na hihziak in.

Vualzawl a i om theihna dingin chu ithuak phot a ngai a, i supphot banah haksa tawpkhawk bangleng i tuah masak phot ngai ahi. Haksa bangkim i tuah a, i phut phot ngai ahi. Haksa lah thuak peihlou, supna di mun a lah peih tuanlou, eimah angsung leh mimal’ nopsakna dikia khual a ngaihtuah in vualzawlna hontunlou ding hi. Aban a genzelna ah, Eilawi in beh-le-phung nak limbawl lua hang a kisuneu gawp ihi uh. Beh Khawmpi, Beh Thumkhawmna, Beh Fellowship!

I selfish dan uh- Pathian bia chi’n Beh Thumkhawmna nei, hiai thumkhawmna ah behdangte tel theilou di himawk! Pathian be ut chiatchiat! Vualzawl a om theihna diing in innkuan, tanau-laina, beh-le-phung banah lawm-le-vualte taisan a, ahaksa pen leng maituah dia ikipiak masak ngai ahi. Huchilou a, a nuamnuam tel leh lam-en a, thoveng tak a om hit-hiat in mimal, pawlpi leh minam a ding a vualzawlna hontun khollou hial ding hi.... Ka gentamlouh hang in i gam-le-nam a it a, a vei mahmah lawi ka hi. I gam-le-nam ka it leh vei luat ziak in ka ‘khitui’ a luang mun mahmah!

26 nitak in Pethuel a kikhawm di’n ka kisa nawn leuleu hi. Khua a noplouh banah  a vot zawkmah toh Biak-inn sung tan uthuai ahihman in zanitak(25) sang in ka kuanbaih zotham uhi. Kuanbaih huntawkthou ka hihman un Biak-inn sung tan chuh a kilam-ethuai lou keihial. Himahleh a mun ka tung ua, ‘lam-etna lian, kinepna thawm’ ahi zel. Biak-inn sung gentaklouh Projector a akapna mun uh Sunday School Hall nasan le  tanzoh ahi deksuai kei. Hiai bang a nepte ahi lai. A Biak-inn huangsung(compound) uh ka siik/tuat khaklouhna d’uh awlsam hina maizen e! Hiai nitak le kikhop a tomzel tel ngei e!

27-ni la chu gense le ngailou. Amun rang deuh a tungpah tingteng i chihleh eizia-toh mi’ zia kibanglou hia, ahihke’h kei sana awl(?), Programme zatna di mun naihna lampi bang ana kikhaktan khin!  Direct a Community Hall zuanpah bhengbheng, huai mun a le mi ana dim dekzel! Amu nuam a mipi kitu depdup, lah muhtheih dia omlou nilouh zo-mah. En heuhou, lah, bang en ka hi ua chih theihlouh! Projector a kap pen pai ngeilou hiven! Tutung khawmpi a Unau Mzr ate’ lapawl, a lasak uh ka muhleh zaak in ka ngaihtuahna ah thilkhat hong om khemkhem hi v’aw... “Min zaw laa asak chiang ua sa petmah uh eive maw, melse zen a sa hawi-hawi uh eivoi!”

November 1-3, 2013 in Dorcas Veng EBCC ah Lamka South Division, Baptist Youth Fellowship khawmpi 7veina neih in om hi. Hiai hunte ah leng vatel sam mahle’ng lapawl a lah panglou, khawmpi palai lah hilou, thugentu lah hituansamlou amipi a vatel ka hihna ah ngeina dan in Biak-inn sung tan ahaksa! Biak-inn sung tan sunsun nikhua a lah tutna tangtuanlou, ding zezaw nilouh! Ahimhim a, Biak-inn sung hi’n hitase keile zong Balcony khawng a numei niiksiing vehvuh teng a va tut selhsolh pen nalhkei deuhmah mawle? Puantuak mah ahi (amau ka haza chihna hilou hial). Amailam a tute a dia Balcony lam maimit suankhak chiang a....! Sssssshhhhhh!

Huai Biak-inn sung ka tan zohlouh khawng zaw kei zekai ziak hi, kenle ka theilua. Ze-kin in kuanbaih leng biak-inn sung kei a di hilou chihna thu omlou hi. Huan, kuanbaih zo lai le’ng ka phulouh VIP-te’ tutna nasan le tomchik bek ka va luah di chih hilou in ka khekol beek in a hetkhak di kiphallou chihna thu a omkei. Huaiziakin, a sung ka tanlouh ka khase theikei a, ka khase kei himhim dia, ka kingaise tuansam kei diing! Tuanaksang in, kuanbaih huntawk a ka kitheih nikhua a le a sung tangzoulou a ka om pen ahoih ahi, ka chi.

Khovel in a simmawh, kuaman bangmah a le a ngaihnawnlouh lai ua en Athu siangthou za-nuam, theinuam leh ngainuam a kei tiltel, gawng gigeuh, munlian uap hetlou di nasan tutna di mun-awng omlou khop a Pathian lam i zotpen uh nakpitak in ka kipak zaw hi. Huan hichibang Pathian phawk leh ngaina, Pathian lau leh Athu theinuam leh zui-ut minamte lak a ka na piankhak pen hampha ka kichi lou theikei! (Selah!)

Hilele maw, ka lauhthawng na om eive! Hichibang hunbi ahihke’h khawmpi chiangkia a Pathian thei leh phawk, Athu ngainuam taktak mah banga hiai hunte kia a ‘Belam Vunsilh’ ihih khak d’uh lau lailai hive’ng aw, ken zaw. Singtang ah i om a, hunteng a kikhawm tam gige hihetlou napi’n mikhual om chiang a tam chihtak a tam. Biak-inn lian huntawk sim heuhou, nidang a mipi a dim zoh ngeilouhna mun a mipi ta zoulou! Mikhual awi! Huchilou kal a lah kikhop chia mi va kisimmah bat a om. Sim kihi hetlou na pi’n etmai a le a kikhawm zah theih maimah a om eivoi. Ka Dah!!!
11/11/13