Pipi itna (Grandmother's Love) -  By Thangbiakmuang Guite.

Nu itna athupi dan leh amanphat dan genlouh in leng ithei ta uhi. Nute itna toh tehtheih hial kei mah leh itna thupi mahmah ahih hang a i nawlkhin leh mi tampi tak ten i ngaihdau mahmah uh Pipi itna ka ngaihtuah chiangin thupi kasa mahmah hi.
Neulai hunte ngaihtuah chiang in Pipi hong kep leh don in ki om tam mahmah hi. Pipi dohjohna, awlmohna, ngaihnatna leh tute itna ka ngaihtuah chiang in thupi kasa petmah hi. Amaute salam et in, upa-ta in sep-le-bawl te semjou nawnlou in omta mah le uh, Pathian vualjawlna thupi tak ahi chih haih vual hilou hi. Tute itna jiak in, ahih theih tan uh sem teitei in a om uhi. Akhen chiang in, mite’n dawn ding leh nek ding apiak te uh amau vuak in dawn ngamlou, nengam lou in ka tupa/tunu ading chi in anek taang uh koih khia in tute pejel uhi. Hiai bang itna mi tampitak ten kitheihmoh bawl a, ahaat nawnlou,  amau ki kemjou nawnlou Pipi te thusim hetlou a i om khak ding uh lauh huai kasa hi. Ajak theihna uh chauta, thu jathei mang nawnlou leh atheihsiam na uh hatnawnlou ahih man un thu ahon dot ciang ua “Pi tektek thuduh” khawng chisuk ek maimah te ihi hia? A damtheihna uh hoihnawnlou, asa uh chaugawp leh hatnawnlou ahih man un meh/nek lim deuh bang lunggulh sam ua, kisuang lah pipi a, hiai/huaite ahong nget chiang ua “Duh gawl” chi suk ek jomah lai ihi mai mah hia?
Pipi hong itna-te kitheihmoh bawl mi tampitak om hikha ding ihi. Innsung tamtak ah Pipite, Pupte nawlkhin leh pampaih in om uh a, amau ading in asih kuan uh jaw- lungjiinna leh gentheihna hun leh ni ahong hi maimah hi. Ahong omlouhsan ding uh ngaklah pawl bangle ki om jomah lai maithei maw. Pipite, pupute Pathian vualjawlna ahi chih itheih louh khak ding uh vangsiat huai petmah ding hi. Laisiangthou ah “mihing damsung kumte kum 70 ahi a, hatna jiakin kum 80 leng ahi thei hi” chih imu hi (Sam 90: 10). Amaute hatna jiak a damsawt ahi ua, Pathian vualjawlna ahi chih imangngilh louh ding uh ahi. Pipi itna athupi dan leh amanphat dante athak a thei a, amaute enkoltu leh dontu muanhuai hiding in Pathian in hong vualjawl chiat hen aw.