SETAN KA NA BIAK LAI IN… by C.Lian Langel

“Toupa nou leh dawi nou a dawn khawm theikei ding uh; Toupa dohkan ah leh dawi dohkan ah an na ne khawm thei sam kei ding uh” 1 Korinth-te 10:21
Setan biakna kei mimal muhdan saulou in hon kum zek leng ka ut hi. Lamka a Setan biakna a hong than tunglai in, midangte mahbang in kenleng lamdang leh chizathuai ka na sa mahmah sam hi. Bia taktak mah uh hi di’n leng ka koih a, ngam uzong sa mahmah ing. Ahia hoihtak a I ngaihtuah kik leh, Setan leh Dawi I chih a tuam hilou in akibang ana hi maimah ua, mi kibang sapdan tuamtuak ana hilel tak hi. Setan bia I chih chiang in Dawi bia chihna leng hipah ahi chih zong ka hon khonung theih nawn hi. En Setan biakna chidan a I gen leh I zak chiang a, eilak a thilthak leh thiltung ngeilou mah bangsak in ki hipah gekgawk maimah. I pu I pa te’n dawi le kau (Setan) bia ahihdan uh laa bang inle I sasa vele, huaiziak in Dawi/Setan bia khanggui a kipan hi peuhmah hang, utkei sim mahle zong. I gamsung ah tuni tan in dawi-zawl chia gen ding tam lai hilou maw? Dawi-zawl chia I theihte bang uh Setan-zawl chileng I lakdan uh tuamzel leh kilawm ka sa hi. Ahia, Dawi toh kizawl I chihte uh Setan toh kizawl hilel ahi uh chihthei ni. Dawi nei I chihte bang uleng Setan thilhih theihna neite ana hilel tak uh aka. Tuban zaw a noutawina ‘Dawi’ chia sam nawnlou in a mintak mah ‘Setan’ chi’n sam ta le? Dawi pen ngaineu zaw in Setan pen sang koih zaw mah kibang.
Khristian I suahnung uh kum 100 bang valta ngal a, bangziaka I gamsung a Setan biakna hong omthak/kigen thak phing mawk eita, bangziak a Setan biakna a kiknawn di (?) I  chih chiang in patauh huai mahleng ahi. Kum 100 val zek Setan biakna akipan in Jesu Khris biakna ah I kihei ta a, hiai ah ngaihtuah dia hoih ka sak bel, I mimal a Jesu Khris I biakna ah I biak Khris a lungkim na diam? Hiai kum 103 vel Khristian I hih sung uh a kimkhat tuak in khen le, kum 50 masa, I pi-le-pute’n Gospel tangthupha ana san tunglai ua a zubel te ubang khensia a, a biakna luite uh (Setan biakna) a nungngat san ngam lai uleh tua eite hun/dinmun, a kumkim 50 nung a Khris nung I zuihna ah, I pi-le-pute mahbang un enleng I hindan lui  bangbang I kilhden ngam ua, banglam ah kikhekna I neisam a? Khris biakna ah I pi-le-pute’ chihtak bang in eite I chitak uhia? I pi-le-pute’n Setan a biak lai ua a thilchiin hoihloute uh Khristian hongsuah chiang un nawse ngam ua, eite’n bang nusia in I  nungngat san ding bang I nei a, nutsiat ding le thei tuanlou a, kikhekna di le om tuanlou, thilteng ngaizam vek maimah ta ki himai lou maw? A minpu lel leh bel hawm lel I hih khak ding uh lauhuai mahmah hi. Hon suangtute’ chihtakna ziak a kum 100 val bang hawi a ki om le himai thei eive maw kuan a thei a. I Khristian hihna uh suang khengval, a min chauh ngaina leh pibawl i bang ta uhi. Etsakna di’n, Setan biakinn kichi bang I gam ah a langtang in hong ding khe mawk hita zenzen leh, a mihoih leh biakinn kaikaite sang mah inle, a zudawn theileh a khamtheite mah in Khristian gamsung a om di’n kilawm kei chia ngai siamlou in va buden in va haltum ngammawk di’n ka ki gingta hi. Hiaidan hi I Khristian khanggui paidan uh hi a, Khristian chu hi lawtel hilele, omdan leh gamtat dan ah Khris mel dawk kiikeii lou, hihna chauh buaipih den maimah.
Hun hongpaizel in… Setan biakna khangthakte lak ah hong kigen tualtual in I patau a, akhen in I lauh bawl lai zaw mah ua. I zak nung uh kum tam pai nailou himahleh, Setan biakna akipan a Piangthak ding bang hong om hial a, I bildoh mahmahte zong hong suak uhi. Ahia kei ngaihdan in bel, Khris a pianthakna i neih chiang in Setan’ nungzuihna/biakna akipan piangthak/suakta ki himai lou hia? Setan biakna hong kigen tunglai in Denrite a kham man uh ahi ka na chi sek a, himahleh, a taktak in bel ka pansan ding a omlouh ziak in ka gelh/gen khe ngamkei. Himahleh vangphat huai tak in ka chi dia, Lamka lak a Setan biakna a heutu kichi khat hong piangthak in, amah toh ka houlim theihna ding uh hun hoih Pathain in hon bawlsak hi. Huai akipan, Denrite/Correcting Fluid I chihte hip a khamna pen Setan biakna kipatna/mengmuh na bulpi khat ahi ka na chih sek pen ka pomchian ngam taktak pan hi. A tangpi in Setan bia ana kichite kha hiai denrite hipte hi tangpi un ka mu hi. Denrite khamna in thil ahiloupi hiam leh thiltung loupi bang thiltung taktak bang in hon musak in hon omsak theimawk hi. Lawm li leh nga a kipawl khawm a Denrite I hip khawm chiang in, thiltung loupi bang a tak a tung bang in kithei vek theimawk hi. Huan ah, tulai a denrite khamte’n power nei bang ki sa mawk ua, a gal ua electric bulb vak bang sumit in suvak theidan in kithei ua, ahihke’h khapi nangawn bang kainai chenchen theidan in kitheihna nei thei mawkmawk uhi. Hiai thil a hihlai uh mi pilvangkhat in va mu mawk leh haihuai sa mahmah ding a, himahleh a kham khawmteng in bel a lawmpa un power nei tatak mahsa ding ua, amah leng power nei tatak ki sa mawk ding hi. Huaiziak in Setan biakna bang leng Denrite a khamchiang un a hih taktak hikei mahle uh, Setan in a tak a thiltung bang in musak mawk hi. Eite lak ah tuni tan in mi pilvang, khamtheih bangmah hihlou, eite’n Setan biakna chidan a I theihte a kigolh kha taktak kichi ka theih khak ding om nai ta dih kei mahleh, Denrite kham le hilou a dawi (Setan) thilhih theihna nei, dawi (Setan) toh ki zawl chih ding I gam ah ka theihkhak om tham a, nangle na theih om mahmah di’n ka gingta. Na theih keileh hon dong lechin.
Denrite I chih Setan’ vanzat khatbel hi peuhmah ahihdan chiang mahmah. Ka houlimna uah Setan biakna di’n, mihing sisan Denrite a kham chiang un a theihlouh kal un laksak thei chi hi. Huai ahihna ah kei muhdan in Setan biakna a kithoihna leh a dangdang a kigen kha sekte, a denrite khamsung mah ua thiltung hi tangpi in muhtheih hi. Huan ah, eilawi lak a Setan biak I chite’n a gendan tangpi uh I zakdan in, I biak sawt dedeuh chiang in Mihing Sisan bang leh Naungek bang a Setan kiang a kithoihna bawl ngai chi uhi. Ahihleh, naungek a kithoihna a bawlte uh koi a kua naungek hi di? Mihing tamtak a kithoihna a bawlte uh kuate hi peuhmah di uh, mi 100 bang valta di hia (?) a gendan ua a tatak a thiltung hileh naungek khat lel hiam leh mihing khat lel a kithoihna a na nei hile ule theikhe ngal le kilawm hia maw? Khamlung hi’n muhtheih a, amau bel thiltung taktak mah sa ding ua, ka taktak mah ahi chi di uhi. Zuau gen leng ahi sam kei ua, zuau gen chia ngoh theih mawk leng hi tuanlou uh. Ahia, denrite kham teng in Setan a bia uh chihna le hituan samlou zel.
Hiai dan ka hon chih chiang in I gamsung ah Setan biakna a omkei chi ka hi zenzen kei, himahleh a taktak a mihing a kithoihnate I lak a tung nai zenlou ahihman in vangphat huai chilam ka hi. I ngaih nep lebel a tungkei ding I chi ngamkei, ahih didan teng Setan in Denrite khamna tungtawn a theisak/mengmusak zouta ahihman in. Khristian sahkhua zuitamna mahmah, vengteng a biakinn 2 leh 3 om na mun a thiltung leh thuthang di’n bel thupi lua in gintak a haksa mahmah. I gamsung siatdan I gen theichiat a, Setan/Dawi leng hong maingal gawpta eive I chih thoh nimnem maimah hi. Setan a pil a anungzui I hihlai in leng a nungzui I hihlam a hon phawksak kei a, amah I na biak lai inleng a bia I hihlam nangawn I theikei. Pathian deihdan a lah omlou, Setan bia a kigenkhak chia pawna mahmah laitei ihi hia? Setan biate mohsa a I gengen lai in eimah kivel thak ni, I gamtat leh hindan in Setan’ deihdan zui a a nna semsem leh utlou pipi a ana biabia kha I hih mel theihlouh ahi. Pathian bia leh Khris nungzui I kichih lai in Ama deihdan in I om taktak na hia? I changtel in Pathian leh Setan nou dawn khop theihlouh ahih dan chiangtak a hon hilh ahihmanin, khat zaw samsam a I dawn ngai ahi chih a athak in thei ni. Pathian deihdan a lah omlou, Setan nungzuih lah ut deklou zel, a kal ah kuamah lam panglou in I om theikei chih phawkni. Pathian deihdan a I omkei leh Setan nungzui/Dawi bia ki himai lou hia? Huaiziakin, a minpu lel omdan leh Pathian biakna akipan thoukhia in ki lamthak ni. Setan bia ki chite leng Pathian biakin ah Pathianni teng in kikhom gige thou uh chi uhi. A nung I zuih peuhmah bel I bia chihna hi a, Setan biakna ah a langtang in kigolh kha kei lele, koi kilkhat hiam ah kuamah theihlouh leh eimah mah inle I theihlouh kal a Setan adia gin-om mahmah, a makai muanhuai khat I na hikha ding ki velchian thakni. Banglam ah Setan nung I na zui kha nilouh a? Setan ka na biaklai in a bia ka hihlam na ngawn ka na kithei mahmah kei, a nung ka zuih lai inleng a min ‘Setan’ kichi bang ka haw mahmah sam, himahleh, Khris in A hon suahtak sak chiang in ka mit a hong vak pan, nangla? Toupa’n panla thei chiat di’n hon vualzawl chiat hen!