Tua Naupang.. | By Nenem Gwite.
Hun bangtan hiam paita in lawmte apan tua naupang thu kana zakha hi. A tuung in bel huchitel in kana thudon kholkei a, panpih theihna om leh panpihtu hithei di’a om chu panpih tham e… chidan a lungsim koih in lungsim taktak kana pe kholkei hi. Hunte paizel in a kal laklak in athu kiza zel a, dam ahi cih leh a van poimoh hi a ka theihte bang uh lawmte mah toh thoh khawm in ka khak zel uhi.
October 5, 2013 zingsang a hong hi a, huai ni programme bangbang hiam ka neih man in kei’ buaibuai in ka buai a, lawmte apan I Naupang uh tuni in Lamka hong tung ding cih thu kaza guih a, bang chidan a? Bang tan om di? Bang…? a thuchiang bel ka theikei. Awl a lawmte’ kiang a dot a, amahmah leeng mit a va muh ka sawmta hi. Himahleh huai’ ni in bel ka va mu man kei hi. Nitak in lawmte apan sms ka ngah a, zingchiang dak 1:00 pm in naupang pen HOME a khakna nei di cih ka mu hi. A omdan bel, hiai naupang tagah, a omna luite’n a deih nawnlouh uh omna diing bei, lawmta bangzah hiam kikum a hiai (Lamka) a a taakna diing ngaihtuah ka hi uhi.
October 6, 2013 ni a hongtung a, hihtheih hau hetlou di himahle’ng naupang pa’ mel bek va muh ka tumta hi. Van neih dandan tawikhawm hoih diing ka chihman un, ka van bawmte uh ka hon pheklek panta a. Numei’ van lak a pasal naupang’ van di ka hon zon mawkleh, a lemgeih muh di a haksa thou ei…(hahaha) Bang hoih di ahia chih ngaihtuah kawmkawm a ka van teng k’on ban et leh bedsheet, towel, dial(muffler), sahbon(soap), halou (toothpaste), hanawtna (toothbrush), sam sathau (hair oil) leh van neen tuamtuam ka kaikhawm zou ningneng saam hi. Huaiteng tawi in tua naupang a zaan-giahna lam k’on manoh ta hi.
A giahna inn ka tun in lawmte bangzah hiam ana tung khinta ua, kei leng lut in ka lawmte’ kiang ah ka van tawi ka pia a, naupangpa ka kan leh atung masa lawmte’n nektheih lei di’a pawtkhiak pih uh ahih thu a hon gen uhi. Huchi a sawtlou ka om nung in lawm dangte leng ahong tung panpanta ua, naupangpa leng lawmte’n ahon lutpihta uhi. A nektheih leite a tunnate’ naute hon ban hop daudau a, huaizoh in “Bawi hong pai dih… Chibai aw” chi in chibai ka buk a, “Nang min bang a?” chi a ka dotleh “KAILIENMANG” chi in kinsim in a hon dawng a, zachiang chiah louh ka hihman in ka dongthak a, chihleh ahon gen nawn hi.
Lawmte toh van tawikhawm theih dandan ka tawite uh bangzah hiam hongpha a, huchi in innteknu kiang ah “Aman van hon nei himhim hia” chi a ka dotleh innsung lam ah ahon lutpih a, sik singlem khat hon lak kawm in, “A van teng le zan a ahong tunphet ua ka na sawp siang uh ahi” chi’n hon dawng hi. Huchi a a singlem ka hon phet un Mangboi in kintak in limlak (photo) khat ahong lakhe zat a, a ang ah a pom a, hon en liakliak hi. “Bawi huai bang lim e… koita k’on en” ka cihleh pau hetlou in a limlak ka khut ah hon pia a, huai lim ka et leh thakhat in ka awm a hong bing a, ka ngaihtuahna abuai pah a, den mahmah a ka houpih a ka muhsa himahleh tua lim ahon lahkhit in ka en thak ngam pahkei zezen hi. A lehlam ka nga a, awl in lim ka en thak nawn a, khitui adai mahmah hi. Ka maai a naupang ding om lou hi leh ka kideek hetkei diing. Himahleh…!! A dot didan le ka theikei a, sawm leng ka sawmkei hi. Huai lim ah naungek pasal khat in apom a, a kiang ah numei khat nuihmai tak in a ding hi. Kipak leh lungsim nuamtak a lim kila khawm teng Mangboi toh anu leh apa ahi chih haihvual ahikei. Gen di ka theikei. Tua limlak, naupang in deihthoh tak a akep thinthen ka zahtak loguih a, hoihtak in a singlem sung a ka koih kiiksak kawm in, “Hiai ah I koih nawn diing aw Mang” chih teng ka gen thei lel...
Huchi a sun hun ka zat bei nung un, Home a va khak ahong hunta a, himahleh vuah azuk nilouh ziak in ka dak chih hun un ka paikhe thei takei uhi. Naupang in a lu bang naa ahon sa lua a, banah a khut bang naa ahi chi in naa salua akal laklak in ahong mitsi tenten zel hi. Luna damdoi khat inteknu’n a pia a, “Bangteng hileh ann ne sa in I pai sak di uh, amah adi’a a om ngeilouhna a va kha mawk diing I hihtoh amah adi’n a lemzaw di” ka chi ua, ann ka khonung buaipih thak lunglung uhi.
Huchi in Mangboi in ann ahon nezou a, vuah inlah theu sawm chi tuanlou ahihman in, thumna leh khakkhiakna hun ka zang ua, tua zoh in auto ka sam ua, Home lam manoh in ka taipihta uhi. Auto a ka taina uah, “Mang na vante… na chabi… na poimoh khawng manghilh na neikha hia, na manghilh leh hoihlou di ahi aw” chi in ka kan sauhsauh ua, amah leeng ahong ki-maimai a, “Ka chabi omlou, ka annekna table a om hi di” chi in hong pautau lua a, kou leng patauh huailou ahihdan gen in ka khawl ua, gari neu a tai lawmte’ kiang ah ka gen ua, ava lathak uhi.
Amun ka tun un Mangboi’ kivualpih di naupang tampi leng ana om sauhsauh ua, aman leng kipah mel hon langsak hi. Mi nih in ahong naih pah ua, ahong houpih uhi. Mang inleng nuihmai tak in amaute ana houpih a, hiaimun a ta diing kisak ziak hia, ahihkei leh mundang koimah a lawm-le-vualte’ lak a talou, kou ava khate’n ka genbang ua hiaimun a lem-etna a neihziak hia ka theikei, kithei ngeilou himahle uh zahkaai ngeinguilou in hong kihou pah uhi. A lawmthak tampi ana omte’ kiang ah muamkhum(sweet) bang ka hawm zaizai ua… Huchi a hun bangtan hiam ka zat nung un paisan ahong hun ta…
Paikhe taktak di’a ka hong kisak tak un kou a va khate mahmah in leng ka pona ua, mihing’ hihtheih lah tawmlua ahihman in khenkhatte bang in a meel diing mu ngamlou in ana paikhe pah uhi. Chibai khawng ka kibuk ua, hiai hun chet ah chu, naupang’ mel a et ngam huaikei. Patau leh thawmhau ahihna a hong lang lian mahmah a, khat en zel khat en zel in ahon ban et mai a, bangmah lah genthei tuanlou, a gen diing leeng omlou… patau in a daak leplep mai hi! Den a gamlum tak a omkhawm laai, a mit-hah apan tangkhat ahihna hong kiphawk guih hi in ka mu hi. “Mang… Pupute’ thu hoihtak in na hon mang di aw…” ka chi theilel a, aman leeng “Awle” hon chimai a, adang gennuam bang in om mahleh huaiteng a gen a, bei ahimai hi. Ke’n leeng banghiam genbeh diing ka ut a, himahleh ka gen diing a ka theizoukei. Tomchik a maai a ka en a, a mit-hah apan ahon phalkei. Bangmah lah gentheih a neikei a, ke’n leeng lah a lam-et diing leh a taktak a a kipahna di gen diing ka theikei a, haksa ka sa mahmah hi. Ngaihtuahna a paisau mahmah. Hiai naupang chik, kizen leh feltak amah ut ziak leh ateel hi hetloupi, hoihtak a kep a poimoh laitak a, anu leh apa’ sihsan ziak leh amah vangtahna ziak a alang-alang a kaih a om, damtheihna chau tak, bah tak a naupang om, amah a kitheih (nai)louh hang a lam-et diing tawm mahmah tuani a a tawpna diing in ka en a, ka liing phial hi.
‘…A iit huai a naupangte na-ngawn in zong a thuak…’ chih laa a i saksak, muangmoh hikei mahle’ng a taktak a ka muh in ka hinna ahon sukha a, haksa ka sa mahmah hi. Zankhua in ka ngaihtuah a, hihtheih lah ka nei tuankei… thumna lou-ngal. Alehlam tak ah, kei bangmahlou ka kicih lai a, thupi leh ka lungkimna tan hi hetkei mahleh, panpihtu a ka napan theih hampha ka kisa a, Pathian min ka phat ahi.
Tua naupang a hong khanglian diing a, a natna a hong kithei di’a, huai hun chiang in a natna in a damtheihna saupi a sukha man di’n ka gingta. Huai hun hong tun di ngaih ngamhuai kasa kei. Ahihkei leh, a natna a theihsiam mantan a hinna in a daih diam chih leeng ka muangmoh zeel a, huchi ahih diing leeng ka phalthei tuankei. Chikmah a ka muh ngeilouh himahleh, a thu a ka zaak phet hilou, mit a ka muhte’ ziak in ka ngaina a, ka iit petmah. Mihing’ ngaihtuahna ah mabaan a neikei, himahleh, mihing’ ngaihtuahna kheel a thunei, thilbangkim hihthei Pathian’ kiang a ka thumna a ka lat chu ka hihtheihsun ahimai hi.
“Toupa aw, tua naupang panpih in…”
.