I upmawh hetlo pawl khat in building inn hong lam gaih’; pawl khat in bike, car leh a tuamtuamte  hong  nei gaih’. A neizo I saksimte peuh inn leh lo-bei peuh hong leh om mawk theihna Zomite khopi khat ahi I Lamka hi. Tua bang kawm kal ah’ nungak leh tangval kawmlkal siatna, zu leh khamtheih buaina, nu leh pa ki khenna tawh kidim. I biakinnte uh lah hoih semsem, Pasian nasem lah tam semsem, NGO lah ki behlap in bangteng sem uh hiam cih lah ki theilo: Mite’n koi pan in sum mu uh hiam cih lah kithei tuanlo a hi belbual I Lamka hi.

Lamka Police  ka ut hun tam thei  mahmah hi, sihna tan tung ding a om kei leh  FIR cihte bang om khawllo, van mang leh lah zon kul selo bang phial hi. Ka neulai  zu-check a nitaklam teng a Meitei Leikai teng a a vak cihte uh lah om nonlo lel. Sep ding tom tuam mahmah leh kilawm kasa mawk hi. Deihloh pen in sihna khat tuak om leh zong Inn dongta leh Innpi cihte kiho in kilemna om pah hi. Zu leh khamtheih mat cih lah om se nonlo, a man ding tamlua hi lel. Ei duty ding teng mipiten duty khin nuam mahmah leh ki lawm ka sa mawk hi (Hong khumlut thei ding a om mah diam m aw.. ka ut lua… ).

Hospital lah Doctor leh nursete meeltheih/ ki theihpih bek leng Govt in a supplyte free a muh theih hunkhop om ding hi lel. I ut leh eitang in mi a sem ding sawl theih ziau lel. Sum kisap pian leh ei mimal clinic a damlote sam in minor surgery khong bawl pak leng  sum muh ding hi lel. Gutate a ding a zong a hoih mahmah zato innpi khat zong hi, CT Scan bel guk ding om non sam kei ven, Ultra Sound leh X-Ray Machinete guk theih kha lai ding hi (A semte lah ut huai, guatate lah ut huai veve…ka buai…).

Na sum muhna a hoih a hoih kei zongin ki pawl nate bek hilo in biakna pawlpi ah Upa bang hih theih baih mahmah lai kha ding ahi. Sum omlo in ki pawl khempeuh  zangkhawl sim hi, nekna a tam leh pawlpi hat a cih bang un maw (hehehe).

Zu leh Khamtheih zuakte a ding tulaitak in a diak in sum muh hoih hun ding laitak ahi, triple price in zuak leng zong a leiloh uh’ phamawh lel ding hi. “A mantam na e” a hong cih uh leh lah na “Nute uh panlakna hang hong tam hi ei” cih theih ziau ding hi (Bike, car, building innte ki leizo leh lamzo pha ding… hmmm).

Social worker lah a dimpi om, tulai bel news ah a min uh hong tuangtuang non sam kei in. Minphatna leh muh nang om nonlo hiam bel cih thei sam keng. Zong muh zeuhzeuh khong nei uh hiam cih zong thei tuan keng. Neihsa omlo a ki kalsuan theilo hi veng maw, petrol man ding kisam zel ding ai mah ve…

A mangthang dekdekta hi leng kilawm sa ing, State hiam UT mu mawk peuh mah leng I Lamka a hong khangto zaw diam? I gam sung puah nang in sum hong lute a hi ding banglo in I zat ciang siatna in I inn sung, veng, pawlpi leh minam sung hong susia hi diam?

I Zomite paunak in “Inn-gua hahlo, gamgua hah” na ci hi, ei mau innsung mahmah en man nonlo, khua leh tui bekbek I et na lam in I khangnote siatloh tampi om kha ding hi. Nu le pa in hun-ong neih loh man in ki khenna tampi hong piang hi thei ding hi. Nu le Pate tate tawh hun a neihloh/zatkhop tamloh man un a lungkim ding leh a deih teng lei nang piak man in khamtheih zu leh sa hong zawngsang uh hi kha ding hi. Khualai teng ah I duty zo phial zong in ei mau inn ah duty man kei mawk leng phattuam-na taktak a hong piak takpi mah ding hiam?  Gutate’n a van  leh sum-guk  masak pen uh amau a mah hi, ei mau innsung pan hong kipan khia hi.

Khatvei bek zu leh khamtheih zuakte I Pastor, Upa, makaiten “bang hang in zuakna hi uh hiam?” cin a va dong ngei uh diam? Nek zongna ding a dang lampi om lam khatvei bek I social workerte un a va counseling ngei uh diam? Ki zuakte ci’n I mindaisak kha mah ding uh, amau zong a ut leh deihteel pen hikha lo ding hi: Lamka ah 90% percent bang Christian ki hi ding hi, Christian nuntak zia leh I sum leh pai muh nate uh a kituak diam, cih I ngaihsun kha ngei uh diam? Crusade, Seminar, Camp nei khanlohna hong tung, tua khanloh in kha 3 zong daih zolo mawk’  a ngeina mah bang leuleu.

A ka zelzul Lamka Zomite khangthakte I khopi suang ah a hong manthan lohna ding in Nu leh pate mawh puakna lian pen hi. Na sum leh pai muhna/ Income, na Upna/Faith, cihtakna/Trustworthy nangbek tung hilo in i Tate tung mahmah uah zong hong kilang ding ahi hi. I taten a gah hong nek ciang in kim leh pamteng va ngohse kei ni. Tua man in “Eimau innsung ciat ah duty zo phot ni, sum leh pai ah citak ni, biakinn a kikhawmte bek hilo in a Thuzuite hi ni”.

“Naupangkhat a neulai in lampi man tawnsak lecin a teek dong in lampial nawlo ding hi.” Paunak 22:6