SIHNA | Jimmy Guite
KOI A OM AHIA  : Lam-et  utlouh lah niteng hunzatdan khat suak thei mok si-dak a hong ging nguainguai a, ‘kua a misi, bang na a si ’ chih tuh dakging zakhateng lungsima dotna masapen ahi. Vengsak nungak ‘Lutang-na in asi’ achi ua, vengtawlam ah pisal khat ‘gilpina in asi ’ achi nawn ua; anung sawtlou in ‘tangval ovardosi asi om ei’ chiin tangkou a hong om zel..... Banah, pitek-putekte ‘teknat asi’ chih ahi ua, huan, mihing hinna adia poimohpen  tui hinapi ‘tuikia asi’ chiin misidak a hong ging zel.. Leitung mihingte sihna ziak hichi bilbial ahih mok leh  mihing sihna koitak a om ahi peuhmah ding, mihing hinna abei chianga mihing pen  ‘si’  kichi aihleh mihing taksa pumpi koimuntaka hinna om hi ding hiam chih khong kana ngaihsun vel maimai sek hi. Nungak in  lutang-na sih pih, alu a hinna om nawnloua si chih theih ding abatlai in damdawi hih khengval, pitek-putek teknat asi, gilpina, khe-na, tuap-na, lung-na... tuabang zel in mihing tuamtuam  sihna ziak  akibang het kei. Aw sihna, koi a om na peuhmah ale, kuamah chial leh ngaihnat hetlouh  lah nialvuallouh in niteng,hunteng leh dakkal teng in mihing hinna na la ziahziah tazen a !!!
SIHNA LEH MIHING : 2011 March 13 nitaklam dak 4:30 in natna/noplouhna neiloupi khovela nu manpha pen ka nu kum 100 melmu in khawi leh etkol manlouh in asi hi. ‘Tomkhachik bek ki-enkol kha hileh lungmuanhuai deuh ding hi a’ ka chih kheukhou lai un pa pilvang khat in ‘ na hampha lua uh, kou ka nu kumkhat phial en-kol unga sum leh pai bel thutuam; amah lah gim, a kemtute lah tawl..banghun in leng sihna ah zaw lungkimna om tuanlou ahi. A si pen tawldam taka asih tuh a damlaite  tawldamna dia Pathian vualzawlna ahi zaw’ a hong chi a dik mahmah dingin ka ngaihsun uhi. Ahihhangin, ka nu pen atu-ata ten itlawlai ka hihman un bangtan hiam bek kem le ung lungmuang tuam dinga ki ngaihsutna lungsim ah a bei thei taktak kei mok hi. Sisan paibuai ziaka puksia ka u pasal (elder brother) kum thum val lupna tunga anpia, zun-leh-eksiaka kakepdet uh 2012 June kha in  a hong tawl diaka, mun tuamtuam a om unau-sanggam taikhawmte’n, ‘tutungzaw hon paisan taktak ta ding eive’ chi a dipkua a kha khat ka buaipih nung un leng ka lauhthawng bang un a hon paisan mai kei. Inkim-inkiang nu-leh-pa pilvang leh  sungkhat-laina te’n leng ‘Pathian kiangah pekhe mai ni, amah leng a tawl gawpta’ a hong chih chiang un, ken bel khelaha ngailawlai ka hihman in ‘mihing hinna piakkhiak theihna ken nei ka hia,  laksak theihna thuneihna Pathian khut om hizawlou hia’ chih khawng maimai ah kana kingaihtuahbuai manzela; a latheitu in a lak mateng  ngaina takin i kem ke, i mohpuakna hiven, ka chi leulau zel hi. Ei lamet banglou ahi Pathian in lemsa nailoua  bangtan hiam beek hon dampih lai ding hinteh chia kikhamuan kawma koumau mun chiat zuana paikik nawn,  ngaihmuang taka  ka omlai un 18 September 2012 zinglam dak 1:30 in a honna paisan liuleu zel... lungkimna leh hunta mah e chihna a awm tuan kei. Sihna tungtanga mihingte lungkimna koia om hi peuhmah ding hiam chih gumzonte adin  lamsautak pai ngai nilouh ding a bang maimah  tel  !!!
AGU ANA THUAKSIAM AHAK: Vengsunga misi In ah  misi tanau-lainate hehnepna chiin ‘halh in unau nguai nivak ah leng in, nungchiangin thei ni theisiam vek ni...’ chih la khawng phatuamngai taka vasak a haksa hetkei na a mahni insung ngei apan it leh ngaih te’n hon paisan hial chiang un zaw halhzoh mokmok ding ana hikhollou mah hitah chih in om hi. ‘Hiai lei zaw tangtawngam a chinglou,lungkham  naubang kahna  ahi Toupa...’ chih chiang tuh a pawmpah theiha, himahleh ‘omnawnlou ding leitung lungkham buaina, huibangmaua gibang kikhenna...’ chih lamlam bel sihna i angpawm laitaka zaw theihsiam haksa mahmah zel ahi a chih uh mikim ah hikei mahleh mi tamtakah bel dik thei mahmah ding bang hi. Tuabang khopa mihing ngaihtuahna leh lungsim teng zou dimdem hiai sihna zaw, chiallouh lengla,ngaihlouh sungtang,kipahpih theihlouh mikhual, na hi taktak aka. A hong khualtam sung sawt hetlou lah anung-gu in honzen sawt mahmah tel hi,  a thuakkha mite’n  chi chiat ding  uh hiin a ngaihsut theih hi... aw sihna gilou !!!
MIHING MASA LEH HINNA : Kristiante Laisiangthou Holy Bible in,  “Toupa Pathian in  leitunga leivui in mi A bawla, a nakvangte ah hinna hu A ha luta; huchiin, mi mihing a hong hita ” (Genesis 2:7) chiin ana chiamteh hi. Thugenpa, David tapa, Jerusalem kumpipa’n  Eklijiasti 12:7 ah, “ a om bangbang in leivui lei ah akiknawna, kha bel a pepa Pathian kiang ah a kik ” chiin ana gen hi. Huai Pathian mahmah in it/sikha Johan kianga a kilaklaiin, “ Alpha leh Omega , a masapen leh a nanungpen, a bul leh a tawp ka hi “ chiin Amah leh Amah hihna A kigenchiang hi. A omdan bel, Pathian tuh thiltengteng kipatna leh tawpna  ahi. Hinna pen Pathian in mihing masate kianga ana  piak ahia, sihna leng Pathian thuneihna ahi chih i pawmlem theihdan ahi hia ???
SIHNA MANPHA : Leitunga sabiak-pusa om teng in mihing leitung hinna khenah tangtawn-gam/hinnathak  om ahi chih gingta in tuamun tun theihna ding lampi ‘hotdamna’ sinsak in a nei chiat uhi. Huai tuh leitunga mihing hinkhaw masa sanga lunggulhhuai leh thupi hinkhaw thak, hinkhaw masa toh nakpitaka kilamdang ahi chih a muhdan uh kisinsakna ahi. Pathianthuawilou gawtmun-meidil lut dingsaa i koih hon suangtu pi-leh-pute hun in leng tua tangtawn-gam kisinsakna na omkhin thamta a ‘pialgal/chiaugal, phamsa laukha lengvan kaina’ chih thugen leh laphuah na nei thamta uhi. Kristian laigelhtu Lehman Strauss in ‘Sihna’n i itte a lakmang chiang in’ chih a gelhna ah “ Rel khawlmun ah kuahiam i ngaih mahmah khualzin ding iva kha a, hon pailiamsanta e, chia thomhau taka i khakkhiak (byebye) pen a tunna ding mun atun chiangin ana vaidawn mite’n, e na hong tungta maw chiin kipaktakin ana chibai ding uhi; tuabang tuh ahi Kristian gingtute sihna” chiin ana gelh hi. Sam laibu  in     “ A misiangthou sihna tuh Toupa  theih/muh in manpha ahi ” ( Sam 116: 15) chiin ana gelh a, Sawltak Paul in misite tungtangah “ Muattheia tuhin a oma,muattheiloua kaihthohin a om. Pahtawilouha tuhin a oma,thupitakaa kaihthohin a om.Hatloua tuhin a oma,thilhihtheihna neia kaihthohin a om. Salam pumpi-a tuhin a oma, Khalam pumpi-a kaihthohin a om.... huchia, hiai muatthei in muattheihlouhna asilh a, sithei in leng sihtheihlouhna a silh hun chiangin, huai hun ngeingei in ahi  ‘Zohna in Sihna a valhzouta’ chih thugelh ahong tun ding. Aw Sihna, koiah ahia na Zohna.... Aw sihna  na Gu koia omta ahia “ (I Korinth 15:42-44,54,55)    chiin ana gelh nawn hi. Huai tuh ahi leitunga hingdama omlaite adia lam-etna kipahhuai !!!
Vanlui sesa zattak nawnlouh pen  vanthak hoihtak toh  khengthei mi omleh hampha na mah e, kichi chiat ding hi. Sumsia vuai nitnet zattheih dia lam-ethuai hetlou zanga lauthawng kawmkawma   vanthak  lei thei mi tuh sumsia a zattheih ziaka a kipahna banah a vanleithaka a lungkimna toh lungdamna thuahnih nei in kipak a nui hemhawm kawm in eive dawlmun apan Inlam zuana a kik zel  !!!

“ Misite, a sikhinsate; a damlai, dama omlaite sangin a hampha uhi “- Eklijiasti 4:2.
02102013