Lamka Khopi Siat Gawpna Bulpi | By Thangbiakmuang Guite

Khotang siatna igen ciang in thiltampi tunkha (genkha) thei hi. Etsakna ding in: Nekgukna, diktatlouhna, numei-pasal kal a thangtatna, zu-le-sa a kibualna leh adang tampi genkha thei hi. Tua ahih man in hiai laigelh ah, tulai a ibuaipih mahmah, khotang sesak tu hi a itheih zu-le-sa leh khamtheih toh kisai gen lel ding ihi.

I gamsung, i khosung leh i inn kuan sungte i et chiangin nidanga muh ngeilouh leh zak ngeilouh tampi tak te muh theih leh zak theih in omta hi. Zu-le-sa, leh khamtheih chi tuamtuam a kibualnate uang deuhdeuh. Numei-pasal kal a thangtatnate uang semsem. Hiai dan thilte namuh chiang hiam, ahih keileh najak chiangin na lungsim ah bang hong om a? I gamsung leh khotang siat gawpna bangjiak hiin nathei?

Awle, bangteng hileh igam leh khotang in hoihlam sangin siatlam manoh ahi cih kuapeuh in itheih chiat sa uh ahi. Nidang in, sisan kilaknate (tualthahna) mulkim huai sa in, gen ngam in leng a om ngei kei hi. Tu chiangin bel niteng simthu ah simtheih leh athu jak dingin om gigezouta. Zu-le-sa leh khamtheih chi tuamtuam a kibual omsam mah leh tulai bang tellouin,ahih sunsun ten leng pilvang takin mite subuai khalou dingin ahihdeuh uhi.Tu chiangin bel, zu-le-sa te’n innkuan sung ah nongkaina, zi-pasal kal a ki muan mohna leh kikhenna, banah khotang buaina hong tun hi. Nidang in, khang nou tungte zu-le-sa a kibual leh numei-pasal kala kibualna chihte zak leh muh in om ngei lou hi. Tu chiangin bel, naupang chikchik nangawn in leng hiai bang thilte ahinpih ta uhi.

July 2013, in mi 50 te lakah hiai bang dotna kana bawl hi: “I kho tang siat gawpna bulpi pen hi a natheih bang ahia?” Hiai bangin dawnna muh theih in om hi: Mi 71% in khotang siat gawpna pen “Innkuan sung kikepna ahoih joh louh jiak , innkuan kikepna alohsap jiak ahi” achi uhi. Mi 24% ten ah “Hun awng tam ineih luat jiak uh ahi,” mi 5% ten ah i thilmuh leh i thil ette uapan ahi (TV, Social Networking) achi uh.

Hiai atung a ngaihdan lak khawmna tungtawn a i muh danin igamsung leh khotang bawl hoihna
ding in “INNKUAN”apoimoh dan leh “Innkuan sung” mah a pat diing ahih dan muhtheih in om hi.Innkuan sunga ki sinsakna a omlouh chiang hiam, ahih keileh ki sinsaknate aloh sap chiangin bang teng sukha hiam chih saulou in i en ding.Banah, Pathian in hun lem ahon piak nawn chiang in hiai isun jom diing uh: Innkuan sung a ki sinsakna gahsuah leh alohchin theihna dinga bangchi panlak ding.

Innkuan sung a ki sinsakna alohsap chiang hiam, ahih keileh ki sinsakna a omlouh chiang inhiaibang thil-te muhtheih in om hi:
1. A tangpi et in, innkuan sung a ki sinsakna a hoihlouh chiangin,khosung leh gamsung su buaikha ban hi. Tua ahih man in, Nu-le-Pa te mohpuak thupi leh lian mahmah ahih dan athak in muh theih in om hi. Nobel Peace prize ana mu Mother Teresa kiang a hiai bang dotna abawl adawnna ngaihtuah tham ching mahmah hi: “Khovel ah lemna ibawl (itut) theihna dingin bangchi panlak hoihnasa a?” Hiai bang in Mother Teresa in dawng hi: “Na inn ah pai inla,na innkuante it in.” Hiai in agen noptak bang hi hiam ichih leh, i kho tang leh gamsung a LEMNA leh MUANNA ahong om theihna ding in INNKUAN sung a pat ngai hi.

2) Innkuan sunga ki sinsakna aomlouh chiang hiam ahih keileh alohsap chiangin, Pathian deihlam zuikhalou kisuak hi. Ajiak tuh innkuan sunga ki sinsakna apoimoh dan Laisiangthou ah muh theih in om hi. Innkuan sung a Nu-le-Pa mohpuak tate lampi dik a pi, tate lampi dik a apaitheihna ding ua sinsak, thuhilh leh taihilh ahi. Paunakte laibu pumpi i et leh Pa’n tate athu hilhna, lampi dik a kawk muhna muh theih in om hi. Ephesate 6 leh Deuteronomy 6 ah leng insung a Nu-Pa te moh puak tate thuhilh leh lampi dik kawkmuh ahih dan imu thei hi. Paunakte 22:6 ah hiai bang imu thei: “A paina ding lampi ah naupang chil in, huan a upat hun nangawn in leng huai apan a paimang kei ding hi.”

3) Innkuan sunga kisinsakna a lohsap chiangin, tate’n maban kalsuan dingdan theilou in, lawm hoihloute pawl in ahun uh ahon zangpan uhi. Thuhilh tuding neilou ahih man un, lawmte thu ngaikhia in, lawmte thudot ina hon neita uh. A tawpna jaw i theihsa ahi, zu-le-sa ah kibual in, khosung leh inn kuan sung tok buaitu a hong himai mah ta uh hilou hiam? Tun maw, amaute mohsa in na ki koukou diing? Laphuaktu in ana gen mah bang in, na tapa/tanu kahna jaw hiai ahong himai mah ta diing hi: “Nu (Pa) aw, naupang neu kahih lai in, tangtawn hinna thu hong hilh hile chin zaw… kei tua bang in om kei ning.”

4) Innkuan sunga kisinsakna a omlouh hiam ahih keileh kisin saknate alohsap chiang in, innkuan sung ah buaina tuamtuam a hong om ding hi. Bang buaina?: Nu/Pa leh tate kal ah kitheih siamlouhna, Nu leh Pa kala ki theihsiam louhna te om in,innsung khat a om khawmte,lungsim kigamlatak in a om ta ding uhi. Innsung tuh hotel/restaurant bang lel in ann nekna leh giahna mun mai a zat ahong hi diing. Hiai bang innkuan adiing in, “Innsung nuam tuh vangam naipen ahi” chih gamla mahmah mai ding hi.

5) Innkuan sunga ki sinsakna a omlouh chiang hiam ahih keileh ki sinsaknate a lohsap chiang in, innkuan sung ah ki khenna, Nu leh Pa kala kikhenna, Tate leh Nu/Pate kala kikhenna ahong om ding hi.A tawpna jaw,mai jumna ahi ding a, mite laka kihel nuam nawnlou in ahong om panta ding uhi.Hiai bang innkuan ading in jaw lungziin huai mahmah ding hi.

Bangjiak a inn kuan sung a ki sinsaknate nawlkhin a om ahi di? Bangjiak a inn kuan sung a ki sinsakna te lohsam ahia? Niteng (tuni tan) a ituah touh ahih man in, a dawn na zaw nangle na theilaw ding hi. Na dawnna pen, mi dawn na toh hong kibang khol lou maithei hi, ajiak tuh mimal in ihinkhua a i tuah touh te hong kibang khol lou ahih jiak in. Khen khat te, nasep buai jiakin inn kuan sung deihbang in enkol manlou in om uhi. Inn kuante sangin nasep awlmoh leh thupi ngaihjaw tamtak i om uhi. Nasep buai paulama nei a, inn kuan sung enkol manlou nahi hia? Tate toh nahun manpha takte bang jah vei na zang khawm ta ale? Pathianni chiang a biakinn kai lel hunsa maimah ding na hiam? Na tate Pastor pan thuhilh na ve chi maimah na maw leh?

Inn kuan sung a kisin sakna ahoih in jaw, khotang subuaitu chia i min loh gige te abeita ding hi. Abul apanloua,a dawn hiam? Ahih kei leh alai zangtak hiam a i pat sawm chiang in ki lop sam jeljel hi. Tua ahihman in, abul mah a i pat ding uh ahi. Saptuam heutu te, khotang heutu leh Nu-le-Pa ten athak a “INNKUAN” poimoh dan thei a, innkuan mah piibawl thak dingin ki chialpi ni.A hong gah suah theihna dingin I pan khawm uh poimoh mahmah hi in ka thei hi. Kalsuan khawm tou in,inn kuan sungsia tawpna bawl thakni, khotang siat gawp na bawl hoih thak nawn ni.Huchiin, I innkuan sung a dam dinga, I inn kuansung a dam chiangin i khosung a dam ding,i khosung a dam chiangin i gam pumpi a dam ding hi.

(Personal note: Na innkuan asiatgawp mah bang in, kou innkuan leng ase gawpta. I inn kuan sung te uh se gawp ta hilou hiam? Kigen tuahna vengvung na te tawpsan in, I innkuanchiat ah kik thakni in, I inn kuan sung siat gawpna bawl hoih thakni).

Email: This email address is being protected from spambots. You need JavaScript enabled to view it., My Blog: http://wigobeyond.blogspot.com