Zawl-Zong kichi THE(ganhing neu) khat ahi a,lianlou,khuttal mai chia khawng lel a lian,vom sim bilbel ahi hi. The toh kibang in kha nei ua,lengthei uhi. Ahihziak in the pen ham zoizoi in thawm nei mahleh Zawl-zong pen a ham ging lam kitheilou hi. The pen singhiang leh singnah khatpeuh ah bawm thei ua,zawl-zong ahihleh singkung lian huntawk khat ah, dingtan khawng a sang in ahon in bawm tiltel uhi. Singkung chikhat kia a bawm nuam,khat peuh a bawm lou uh ahihman in a singkungte pen Zawl-zong kung/sing kichi hi. Mual dung leh tang tung lam ah kimu khollou ua,luikuam leh mun daam (liap leh vot) ah kimu tangpi uhi.
Zawl-zong toh kisai in Upate'n gendan leh gintak dan ana nei ua,tua toh tulai khovel vai genkak sawm i hi hi. Khangluite' gendan in hiai Zawl-zongte pen mihon lak a i khahkhiak leh i nungak/tangval deihtaak pen va boh geih chi uhi. Tua minu/mipa a boh khak penpen toh leng kingai in kiteng kha nuam uh,peuh chi uhi. A tak hia zuau chih pen genchet theih hikei mahleh a gen uh tuh gensa a hi peuhmah phot hi. Zi-le-pasal zonna taktak di'n bel ahih uh gintak huai lou hi.Ken leng experiment ka bawl khak hetlouh ziak in ka theihna hiai tan ahi. Zawl chih pen a mun leh mi dungzui in a zatdan leng tuam thei hi. Indongta a zawl a kimatna,khua khat leh khua khat a om tuak (kitanau bawl a zintun nopna dia) zawl a kimatna khawng ahi hi. Hiai ah ZAWL i zat pen lawm genna hithou mahleh nungak-tangval kal a kizawl ngaihna pen genna ahi zaw.
Tulai khovel ah Zawl-zong khah method kuamah in zang nawn di un a taksan huaikei. Himahleh khovel khantouh dungzui in banglam hiam ah zawl-zon dan tuam tuam om tou thou adiam chih theih leh kilawm kasa hi. Tuma hun kum 40/50 paita lak vel apat in tangval in a nungak deih pen kiang LAITHON zang in a itna thu genta hi. Hiai laithon tungtawn a zawl-zon dan in hun sawt kuamtak,hiai a gelhpa a pian nung dong i lak uah mun a luah hi. Huchi'n,hun hong pai zel in telephone i gam ah hong lut a,tua zoh in mobile phone in theihlouh kal in aneu-alian hon pumtuam man hi.
Khovel hong khang dungzui in khat-le-khat kithuzakna nuam tuan mahmah a,a phattuamna lam a tam zahzah in a zangkhialte'adi'n a siatna leng a tam hi. Mobile hong lut a,message pack hong om in,kuapeuh in kithuzak tuah olsam kisa in nuam kisa chiat hi. Tangval in nungak hoih a sak te houpih nuam taleh, a phone number neih ding lampi zong masa pen hi. Tua dan mah in nungak in leng a hih thou. Kihou,ki-message in mobile phone tungtawn in tulai tuailaite zawl i kizong tuah kheukhou uhi. Khantouhna in hon behlap in tulai diak diak in social networking site tuamtuam facebook,twitter leh adang dang in hon pei nawn hi. Whatsapp,messenger,nimbuzz,line leh adangte'n leng zawl-zonna ah tuailaite hon makaih mahmah chi leng zuau lua hi di'n ka gingta kei. Facebook ah i limlakte uh i upload ua,kuapeuh in a muh theih di un i koih uhi. I limlak koihte uapat i mizia ding uh bangtan hiam gen theih mawk hi. Tua ziak in,khovel sia i chih pen a sung a teng mite i siat ziak uh hi lim inchin, i limlak te apat mite'ngap thoh leh"easy"dia koih in i om hia chih kivel tuak kasa hi. Mite'muhnop leh kipahpih di zong a lim upload tuailai leh khangthakte i hihman un social networking site-te tulai Zawl-Zong i chilou thei kei. Whatsapp ngial bang kizen mahmah,limlak,video,sound leh message kikhak pah theih tawm tawm hi. A zangkhial i chi diam,a zang manpha te'n facebook tungtawn in zawl thak muhloh ua,khat mai a lungkim lou in message ngaihzawng,facebook ngaihzawng chi in min tuamtuam pusak zomah uhi. Limlak kia mu a kingai chih mahtak kingai kuitung a tam kei ua,a tak a hong kimuh hial chiang un lungtung lou i kikhen kik chih bangzah hiam ka theih a om hi. Nungak-tangvalte kia gen i hikei a,koppih neisate nangawn leng i kisum tuankei ua,nupa khenkhat adi'n kinakna,kiselna leh kikhenna tanpha a tun hi.
Hichi vingveng khovel a teng i hihna uah, tuailai zawl-zong lai leh zong musate'n leng a zong ding dan diktak in kizong le hang chi in i kingen hi. Tua pen bel Siamtu Pathian dong kawm a zawl-zonna ahi. Kei leng a pilvang pen ka hikei a,a thei pen ka hi sam kei. A zangkhial pawl ah ka tel hia chih pen kei'mohpuak ahi a,tua mahbang in TULAI ZAWL-ZONG te zatdik leh zatkhelh pen nang'mohpuak ahi. Khat in i zatkhelh chiang in mimal kia minsiatna hon tun kei a,insung mite kholak ah ui ek-khu bang in i koih kha thei a,i minam pihte namdang lak ah maizum in i koih thei gige hi.