ZOMI te'n i tuah uleh i chiin tangpi te uh tamlou kikum leng i chi hi. Hiai a igen di thute ahih leh London War Museum a om leng ahikei a,Bill Gates Computer sung ah leng kimu zoulou hi.Himahleh,'Today's Zomi Version' chihtheih hial di khop a i zuih nainai uh thute ahi hi.
Khovel a gam changkang mahmah,America(USA) gamte bang in NGAIHTUAHNA i nei ua,Party leh Concert chihte bang i nei deuh zut uhi.Huai kawmkawm in,Korea gamte bang in i KICHEI ua,i ki changkang sak mahmah uhi.Himahleh,Gammang apan i pawtkhiatna uh sawt nailou ahi ngei dia,Zawng(Monkey) bang in i OM khanak uhi.
Computer Age a om ihi ta ua,aneu-alian a teek akhang in Melmuhlouh Tongsan(Mobile) i toi sauhsauh uhi. USA President,Barack Obama toh dinmun kikim a,mipoimoh omhial di'n agintak huaikei hi. Obama in Kikhopna neihsung a,a Phone a Switch Off theih leh en bangziak a Switch Off ngamlou di? Poimoh lua ahih leh kikhawm dah vet mai le,Biakinn sung khawng a phone honggin kangkang chiang in nuam chiahlou hi.
Moukhak,Moulop,Inn hong,Hansuang hong chihte a Nekkhawmna sai chihte i kidemna uh hileh kilawm nawn hi. A hihzou te'n hihluat di ahi,himahleh Lamka Post hiam,Manipur Express hiam a CHIALNA bawl a,hiai news simkha a ngaina peuhmah chial ahi,chihsuk mawk te dik khin kasakei nawn hi.Bangziak in i chihleh,News a Chialna simkha taphot honghoh le uh,i vaak zou taktak diam? Chih dotna ki dot masak ding in hoih hi.Mi honghoh zahzah vakzou di ihih leh chu hoihlua chih di hizel.CHIALNA bawldan ah pilvang deuh le ka chih nopna ahi.
Vanmang leh Gan mang khawng i muh leh mat chiang un,News khwng ah i Flash ua,ahun chiam khauh deuh in i pe chatchat sek uhi.Hiaipen hoihlua himahleh ahoihlouhna lam leng omzel hi.Huchibang a van leh gan i kepkhak leh 'Akin lam a anei tu'n hongla a,hong lak hakluat a avan/gan banghiam a chih leh bangmah gentheilou di' chihdan bek in suahle bang a chi dia?Aziak ahihleh,miteng in News lalou ahi ua,ani khawng i fixed chatchat chiang un,Christian gim le namlou i bang uhi.Sum leh tha ina seen khak leh leng huaite zaw,aneitu te toh kihou theihluat ahi.
Sihna leh Manna i tuakzel sam ua,huaihun chiang in Puantuam leh Beel kipiak chihte Zomite ki gaalna chikhat ahi.Himahleh,Programme a Thilpiak hundi va heltel hial zaw nalhlou deuh bang hi.Hun sawtsak maimai ahihman in,atung masa sa in,vatuam/vape ziau henlan,ahihhang in,Pute pen hun atuam a piak hileh bang a chi dia? Innteek leh Pute thugen hun a,ki 'aangkhak' dualdual chihte le tawpsan theile vaiveng mahmah leh kilawm sa ingh.
Tulai a i Chiindan uh ahihleh,Diktatna lunggulh a,gilkial dangtaak te a Vangsia uh,Zawng(poor) ding ahi ngal ua,chih toh kibang hi. Diktatna ziak mah in,sawina tuak leng lah Vangsia mah hi thouthou,'Haiman thuakloh' chih a ki om maimah.
Zahngaithei tak a omte,Bible in zaw Hampha uh ahi,ana chihial hi a,tulai in ahihleh,Zahngaitheite tuh a Vangsia uh,Nuaisiah a omding ahi ngal ua,chih toh kibang hi.Lungtang Siangthou te lah Vangsia hizel,aziak ahihleh Mihai chih a om ahih chiang ua..!
Bible in zaw,Lemna bawlte a hampha uh,Pathian tate chih a om di ahi uh,ana chi hi a.Eilawi in,lemna bawlte a vangsia uh,gam leh nam hum ngamlou,mi dawilok i chi khanak ua hiven.
Pathian Lalgam leh a diktatna zong masa dia,Bible in honna hilh hi a,en I zuaugen siamna leh thuneihna tengteng toh hauhsakna i zong masa ua hiven.Huchia zong te mah lah Thohlawm tam pipi a thoh ciang ua,Saptuam te leh mipite' pahtawi leh deihsakna tangzel tel ua..!
Gam leh Nam it,Christian diktak,Saptuam makai te tata bang,Election chiang a Thagum zang a Vote tam pipi khete leh muhsawm te ihi zomah uhi. English a,Solkal nasemte 'Public Servant' kichi hi a,eilak ah 'Public Corruption Leader' chi mah i bang ua hiven.Mipite poimoh te ngaihtuah leh puah di hi ua,amau innsung leh gilpi chauh hon puah hial chiang un zaw,a Gil khwng uh Puakkek hial leh kilawm sek hi.Mipi te'n lah 'Damsawt hen' chi zuazua zel.
I Zogam uah,'Huai ah Job House,Job Car,Lanva Lei,Mata Dam' chi a Pawtna lam a,kawktheih pahpah di tamlua hi.Sepna kichian neilou i sak te khawng,Mutpuak bang a muhtheih a hongkhan hulhul chiang un zaw,a Summuhna uh theihtheih mai hi ve aw.
Government Skulpu khenkhat lah chu,thadah petmah in 'Dahpa' toh kibang kitam hi.Regular tak a Skul kailou hina pi,Regular tak a loh i laksawm thouthou chiang un buaihuai pi hongsuak hi.Hiaite lah Christian kahi kichi te mah hizel,'Semlou in ngawl hen' kichi om kasa a? 'Thadah Loh' kichi le omzel ahi diam a..!
Evangelical Baptist Convention(EBC) saptuam in,2007 kum a,Thupi(Theme) dia a zat uh,'DIKTATNA IN NAM A TAWISANG' chih ahi. Diktat zoulou ihi di ua,Nam tawisan sang in,I INN te uh i tawisang ua,eimah leh eimah bang leng iki tawisang sek uhi.Huai te'n sawt adaih kei,Diktatlouh ziak mah in 'Development Work' khenkhat 'Table Work' in abei mai zel hi. I Lampi-te uh lah bawlzoh phet cia,aak in thai sezou,huaikia le hilou,loupa bang in phu pailet zou hial sek hi.Bang gau a,Hanmual a Leikha ann dia ki phuum pahpah ihi ua,kingaihtuah a hun ta..!