Mangpha Kikhenna
(ka UGrace leh ka lawm Sonmuan te adia lat)

Kum bang zahhiam paita a ‘inlam’ a skulte kai a ka hinkhua ka zat lai in, a huchi di mahsa in a manphat luat lamle kana thei khol kei. Tuhun a sapgam hi’n kolgam-vaigam a laisim hiam ahihkeileh nektak zong a khosate leng i na huchih khak chiat uh ka gingta, mihing ngeina khat ahihman in. Himahleh ‘inlam’ khotang siatluat ziak khawng ahihkeileh maban khualna ziak khawng a mundang-gamdang a iva khosak chiangin, bang chi bang tengin se leleng ‘inlam’ a manphat dan va kitheisuah semsem a, mundang a omkhiak pen kisaktheihna ding hiam hizawlou a ‘zillai’ hon hilhtu khat hilellou hiam kachisek hi. ‘Zillai’ chih kia kammal zat sangin ‘zillai manphatak’ chihzang le genkhazawlai din kagingta. Tulai I hinna khovel ah, I changkan leh khantouh ziak uhia theizou khang, inn lehlou hi in innkuan mahmah leng ngaih thupina bei deuhdeuh hileh kilawm a, poi mahmah mai hi. Himahleh ka ngaihtuah chiangin, hiaite mahleng ‘inlam’ man phatdan leh huchia ngaih neu mai dia pammaih lua ahihdan zillai hon hilhtu hong hizel un kathei hi.

Kum 2011 adia a tawp na dingin December 9 in ka skul kai pih lawmte khattoh inlam kapai khawm ua, huai ni mah nitaklam in Lamka damtak in katung uhi. Khakhatvel ‘inlam’ a hun nuamtak zatzoh nungin laizil na sunzom dingin January 7, 2012 in Delhi tual ka tungnawn hi. Hiai a I genkhak khanihte, December leh January, sungin ‘kikhenna’ hunnih katuaka, huaite toh kisai ka lungsim a omte simtute hon kumut a hiai lai hongelh khia kahi.

KIKHENNA KHATNA:
Hiai ‘kikhenna/kikhakna’ program ding ziak deuha ‘inlam’ pai kahi chileng ka chi khial kholkei ding. Ei mahmah bang leng ki naupang saktawk lengleng I kum bang ana pungpung maimah saam ahihman in I uu numeite bangin leng ahuntoh kituak a pasal a neih uh hong hun tou zelzel hi. Mou khakna program I chihte hunkipah huai leh Pathian’ vualzawlna thupitak himahleh innkuan sung kikhenna khat ahihmanin a nopluat hetlouhna khat om giugiau sek hi. Tutung a ka U Grace Ngaihlun ka khak khiak ni uh leng a lamdang tuan hetkei. Unau chiatchiat leng a kizom a piangte akingaina diak uh ana chi ua, dik din leng kaging thou mai hi. Ka kingaina ua, hon deih leng hondeihsak mahmah hi. Inngak ding om louthei phial a kadian khiak veklai un aman ka nu-le-pa inn ana ngakpih a, septheih khamkham sem kawm in ana pang a, a changchang bang in nek ding leh silh ding khenkhat bang hon khakzel hi. Ka kihou chiang un ‘Kenchu inn mahmah nuam kasa lua, pasal neih di ka lin lua, ka ut het kei’ a chi kha veu a, ka mangngilh thei het kei chitchiat hi. Iittu ding pasal hoih tak ahon mu a ka kipahpih mahmah. Pathian’ min a ‘anuamleh a haksa ah, sihna in honkhen ma teng…’ chia akichiam laikhawng uh mit phiat vangzen in kana en a, ka lung akim mahmah. Dansiangthou a kitenna a thupidan bang kava mukhe semsem in katheihial hi.

Huainitaklam, moukhakna program zoh a vanken tengteng akipiak khiakzoh in, amah ngeileng a innkuan thak di ten ngakta ahihman un apai a hong hunta a… bang mah thupi lua ngaihtuah khollou a lawmte toh ding maimai a ka kitheih lai in, hiai huntak ah lungsim ngaihtuahna ahong dim leet phut a, ngaihtuahna a paisau mahmah. Ina khanletpih I sanggam, ei innkuan mi hi nawnlou a midang’ innkuan mi dia va piak khiak toih mawk kha I ngaih tuah zek leh lamdang pi khat le ana hi mawk in ka thei hi. Himahleh Pathian’ minsuang leh vualzawlna tampi toh ki khai hih man in lungsim nuam taka Amah muan ding hong hipen mai zeel hi. Amah leng feltak lah khelah takin apai a, sungkuan mi leh tanau hunkhop in ava zui tou lai ua, ken bel kava zuikei. Amah a omlai a ahih sek bangin inngak in kana pang zaw hi.

Tu-le-ta tampite nei a, Pathian’ mit tukna innkuan nuamsa ahong hih uh ka deihsakna sangpen ka laan hi.

KIKHENNA NIHNA:
I lup chiang in dendeuh chianga mang sepi khat neidi kahi chih thei hetlou in lungmuang takin I lum chiat uh. Himah leh mangsia I hon nei rumrum mai, si thei phial di ikisak lai in I khanglou a, buaina tengteng a veng mai hi. January 19 zingkal khovak lungdam takin kana muak a, mei zing chihte bang om hetlou in ni a sa singseng pah hi. Himahleh hiai zingtung lungnopna teng sawtlou in mangsepi bang mai thiltung in hon tuam a, mangsia bek hileh hoih ding hia, hiai apan lah khanlohna a om hetkei maimah a… Hiai ni in ka lawm hoihtak Lalsonmuan in Hyderabad a Theology a zilna mun ah ihmu phawnzoh nawnlouh in a leitung khualzinna ana zou maimah hi. Sonmuan tungtang ah ‘lawm’ chih kammal sangin ‘nau’ chih zang zaw leng genkha zaw din ka gingta hi. Ka lawmhoih mahmah a ULal toh amah toh 1997-1998 sung vel Ebenezer ah High Skul ka kaikhawm kha ua, huai apan lawm hoihtak ka hong suak kha uh ahi pen mai. Laa bang ka lunglut ua, ka kithuahthei mahmah mai uhi. Huchi in 2003-2004 vel mah in Rayburn College ah ka hong kaikhawm kha nawn ua, ka kaikhawm khaklouh sung un leng ka kipawl denta uhi. Hiai ah leng Evangelical Union khawng a kihel khawm in nuam kasa petmah uhi. Huai lai khawng kan a hunnuam hinkhua a ka tuahlai leh mi hampha mahmah hidin kaki gingta hi. Hunte paipai ahih manin laisimna lam toh kisai mah a kikhen khawng hong hun nawn a, kei Delhi ah kapai a, Sonmuan Shillong ah apai hi. Himahleh inlam ka paikhak chiangin a inn uh kapha teitei sek a, a insung nana uah chu mai leng ka maigal mahmah mai hi. Ahi a chuh, khovel akipei kualhkualh toh kiton in lawmta kimuhna leng avaang hiaihiai chu ahimai ve.

A inkuan un laa a lunglut mahmah ua, himahleh a uten Pathian’ laa ngen a sak lai un aman, lunglut ahi ngei dinga, zawlla bang honsa tou in, ‘Flint’ chih bangin miten hon thei zaw uhi. Ka omna Delhi khawng bangah leng a lasak khawng kana enkha zel a, kana nui heuhau zel hi. Hun tamzaw ah a’ ULal toh ka kipawl zaw ua, amah bel, ka gensamah bangin ‘nau’ banga etna chiang kanei hi. Himahleh ka lawm ahihna abei tuankei. A unau un ‘Boss’ chin ahonsam ua, tutan ahon sam lai uhi. Himahleh a ‘Boss’ uh kahi kei a, a lawm uh kahi zaw. Lawmta ki maingal sapna ahi a, gen thupi lua a neikei. Sawtpi mahmah ka kimuhlouh sung ua bang khawng hih a, bang chibanga a hinkhua zang hiam chih ka thei sau hetkei, midang’ thu khawng ka navak louhna lampang tak ana hih chitchiat man in. Ken chiang taka ka theih na tan ah bel- mi pautam lawlou, nui pahpah, nu-le-pa ngai leh zahtak, lawmte ngaina, u leh naute lawmte bangbang a pawl thei, thumang, melhoih leh duangching ahi a, laa leng a siam mahmah hi. Hinkhua a ngeina banga apai chiang in ngeina seh baih lam pi ana hi a, kei ngei leng kuamah dangle phawk ngellou in nuam kana sa mahmah hi. Himahleh I gam adia hamsiatna hia ahihkei leh vualzawlna chia I buaipih mahmah uh mobile phone in ka tutmun mahmah ah ka lawm leh nau Sonmuan’ hinkhua tangthu tawpna hon tun thouthou a, ‘Sian in a phal hanga tung hi e..’ chih nawn mai angai zel hi.

January 19 nitak dak 7 in Tuailai Pawl meeting ka nei ua, ka lungsim athil tam lut theilou hial in kava tu ek sam hi. Lungsim leh mitkha a lawmpa mel hong langlang ahi manin, thiltung leng gintak haksa kasa phial a, lah kitheih khem mohbawl di vual ahi ngalkei a. Ka lawm ittak Sonmuan in tangtawn khawlna mun, a pai masa sa hon na dawn dingin hon na zot santa chih chu thudik ahong hi tawntung ta hi.

Hiai atunga ‘kikhenna’ chi nih ka gente tangtawn kikhenna ahi kei uh. Tu-le-tu adia kikhenna chikhat tuak ahi zaw uh. A damlaite bel inn tuam-lou tuam beel in om mahle hun kivei dungzui a kimuh zel in hong om ngei ding hi. Himahleh sihna in vai hon hawm chiangin lungkia leh dahlua in ki hamhaih kha nak a, Kristian diktak kahi chite adingin huai di ahikei kachi ut hi. I iitluat te a hong sih chiang un kidah mahmah in mittuite leng luang mah hi. Ahi ding mah ahi. Himahleh sihna a tawpna a hikei a, nitaka ihmu, zingkala kimu nawn di banglel ihi zaw uhi. Eite adia lametna kipatna ana hizaw hilou hiam kachi hi. Toupa Jesu Kris eite adia hong sihna tungtawn a lametna I neih uh a manphat dan eite leng zan a ihmu a, zingkal a Van Khamkhopi a I khanloh tei chiangin I thei siam mai ding uhi. Huai mun tung thei chiat dingin simtute ki ngaihtuah pha thak chiat ni.