Tukum July kha vel in hih ding tuamtuam neih ziakin ni 4 sung om ding in Lamka ka vapha hi. Hun tomchik sung lel om ding ka hih manin, inn tun pah louh a, mun khenkhat phak a, sep ding poimoh neihte bangzah hiam zohman ka tum a, hih ding poimawh bikte sem ngal in nitaklam ann-nek hun in inn ka pai pan hi. Inn ka tung in ann nek theih ding a ana mandiam ding ka sak leh ana huan lai ua, thil omdan ka dot leh Gas bei ziaka, sing leh hawl a huan ngai chih hon hilh ban uah, Gas chu booking sa hilehle lak theih nai louh kha nih val bang ngak ngai lai ding ahihdan leng hon hilh uhi. Gas a black a muhtheih diam chia ka dot leh muhtheih lua himahleh Cheng 1200/- vel aman ding hon chi uhi. Ken leng I gam a thil paidan te lungsim a ngaihtuah in thil dang ka gen non kei hi. Ahi a, sing leh hawl khong a ann huan nawngkai lua leh hun la ahihman in black a  lei ding in sungkuante ka hilh mai hi. Bang chichi hiam in hon huan ua, ann chu hong min sam in huai nitak chu ann ngawl lou ka hi phot mai uh.    

Hunpaisa hi in, tuhun hitaleh Lamka mipite’n LPG toh kisai in haksatna nasa tak I tuak ua, panlak theihdan om keileh hun hong tung ding ah le I tuak tou gige ding uh chih a chiang hi. Social networking site adiakin Facebook khawng ah LPG buaina thu kigen tam thei mahmah hi. Hiai in hon etsak a ka muh tuh, Aknou a pi sihsan belh ding nei lou leh ann a zawng na ua makaih ding om nawn lou a hamhaih a ham chiakchiak toh ka teh a, a lang lamah khasiat huai bang kasa hi. Facebook adiakin Zogam.com FB Group leh Zogamonline FB Group a member khenkhatte’n Lamka a Gas buaina toh kisai hon post uh kana zuih(follow) khak khenkhat hiai a nuai ah ka hon taklang thak hi.

1. Lala Thomte>Zogam.com FB Group posted on September 10, 2012: Gas Gas Gas.........bng cik ciang a le hng ki ning cing di a diam mw???????

2. Spring Mang>Zogam.com posted on September, 2012: GAS GAS LPG LPG
SAS, Kim Joe- Booking: May 17/May 10. RESPTLY : Delivery: SEPT 6, STOCK: 306, WEIGHT=??

3. (Name withheld)>Zogam.com posted on September 7,2012 Gas...GAs...gaS...gAs...GaS...gAS...CAPITAL LETTER A 'GAS' bang loh ta di? tuni date i et cia lah 7th September,2012 lah hi ngal a, GAS lah hong tung ziah ziah, Teddim Road ah hong ki sawi phei hnak hnak, GAS hong tung ta cia phur deuh a la dia va kuan, 14th MARCH,2012 tan kihawm hong ci mai mah uh.. bang ci dan a tel a ZOMI kici , ka mi kasa ka iit ci te..?? GAS hong tung teng beita, stock om nawn lou a cih ua kipat dawr pawl khat ah BLACK a kizuak tam petmah. Dawr nei te'n GAS kha a bawltawm uh ahi diam?? mipi a di bang ziak a ki daih ngei lou..?? Agent te'n a tamzaw BLACK a zuak uh cih dawr nei te kipat kiza. cylinder 100 lak ah 45% vel BLACK MARKET ah ki zuak. a dang 55% om sun teng Lamka khua mipi teng kituh zaak. I gam bang ci khang ngei di..?? Makai te'n le thei vek uh, bang ziak a kuamah pau ngam lou ahi di uh.?? makai te a di le RATION cih dan deuh a kha teng a cylinder bang zah hiam tung ahi dia?? kam hukdim na di buuk bang zah ngai ahi di?? Mipi te'n kha 4-5 months ki ngaak, a hong tung cia lah bei kici zel, a bei nung a lah Lamka khuapi sung ah BLACK a leitheih di hici tel a a tam mawk , bang ziak ahi di..??? Agent te'n zuak dia a koih te uh ana guuk sak uh ahi dia..?? ka thei zou kei, kei singtang mimawl in :)

4. Muan Guite>Zogamonline.com : Tuni ka Gas(Kuking gas cylinder) uh hong tung. Alapa kiah bang chikchiah a kila thei non dia ka chih leh tukum in jaw kilamet huai non kei hon chih san, ka hisap leh dik leh kilawm, May kha tan a buk bolte kihom suak nailou, Lamka a gas homdan kha.. black a lah tam mahmah jel.. panlak theihna dan om thei diam lawmte!

5. (Name withheld)>Zogam.com posted on July 24, 2012:: Lamka ah LPG kidaihlou deuh hiding aka, Gas hn thon oh chin Aizawl lam a omte hn chah veu ua aki daihlou mah hia? Black a ideih leh chu Rs.1300/-muh di omreng nachi ngalua,mipi adi teng black a paisak gai nahi du e....agent ten haksatna aneih uleh kithuahpih a, adiklou deuh a zuak a omleh et kaizek poimoh diam?

Hiai a tung a post lou leng member tamtak in Lamka a GAS buaina thu post ua, huaite hiai ah gelh seng a hi kei ding hi. Hiai mipi kou leh khasiatna awte kua man za lou hiam? chih in om hi.

LPG distribution system toh kisai mipi buaina aw social networking site lam ah ka zak mun mahmah bang in Lamka a tanchinbu kisuahte ah Gas toh kisai thuthak ka sim kha vang mahmah zel hi. Hiai lam toh kisai thei mahmah lawmte khat in khatvei, Manipur a diakin Lamka lam a LPG buai gige na toh kisai ka thugelh hon na suahsak lou uh hive aw chih hon hilh lam ka thei gige lai hi. Mediate poimawhna khat hia a ka theih chu mipite haksatna leh buaina(public grievances) te kha sorkar hiam, thuneitute kiang a tut ding ahi hi. Mipite patauhna aw vaihawmtute kiang a tun thei(independent reporting bawl thei) media I gam ah om nai kei a a diam aw chih hon ngaihtuah sak vungvung hi.  

Tulel in IOC-Indane Gas in Manipur ah LPG hawmzakna lamah mawhpua hi. Company dang BPCL-Bharat Gas, HPCL-HP Gas leh a dangdangte hong lut nai tadih kei hi. RGGLV Scheme nuai a IOC mahin Lamka a Sub-Division Li(3) Thanlon, Singngat, Henglep te a LPG Agent ding  a sepkhinta a tuin Tipaimukh ading sai lel ua September, 2012 sunga zohsiang sawm uh ahi chih thu leng om hi. Ahi a, Lamka ah milip a khang hat mahmah lai in LPG Distributor nih kia (huai tuh SAS leh KIM-JOE Agencies) a om touh gige pen bel thu theihhakpi hi thepthup hi. Bangteng hileh, Lamka-te LPG buai a I buai gige uh bangziak hiding hiam? Hiai buaina sukveng na ding a kua mawhpuak hi ding hiam? chih kidot hun mahmahta hi.

Hiai anuai ah NE sung a mun tuamtuam a LPG kihawmdan(sample data) ka hon kaihkhawm en thak ni hang.

Source: (http://indane.co.in/transparency/index.php)

(sutzop ding)

RELATED ARTICLE: Lamka-te leh LPG buai - I