Lamka-te leh LPG Buaina-I ah kum 2011-12 sung a NE State mun tuamtuam a Gas kihomdan tangpi I taklang khinta uhi. Tuin Manipur gamkhen sung a Indane Gas Agency om teng takkhe lou in mun 4 -huaite tuh Imphal, Senapati, Tamenglong, Kangpokpi, leh Churachandpur(Lamka) a te I en nawn ding hi. Imphal khopi a LPG Distributors 10 om lak ah nih kia, Churachandpur- 2te, mundangte ah khat chiat lakkhawm a kha 5 (1.04.2012 to 24.08.2012) sung a customer-te kiang a gas a  hawmdan uh hiai bang ahi.

.

Hiai refill muhzah pen consumer mi-malmal in kha 5 sung a refill a muhzah uh ahi. Manipur State sung atung a mun kipiate etkak in kha 5 sung in 5-4 vei refill consumerte’n a muh lai un, Lamka a Gas Consumerte’n nihvei kia kimu hi. Kim-Joe Gas a Consumer 9211 lak a 264 ten 3vei kia mu ua, huai tuh Lamka a dia mu tampente hilai uhi. Hiai a tung a kipete garap(graph) a I bawl leh hiai anuai bang hong suak hi.

(Note: Imphal leh Lamka a Agency nihtuak kipeta lak a khat tuak lak garap(graph) a ding a data lak ahi a, Lamka 2 refill cylinders lak ahi)

Lamka (Churachandur) tuh I theih chiatsa mah bang in Manipur a dia khopi lian nihna ahih banah consumer leng a tam lam a nihna ahi. Manipur mundang a LPG supply lam in hoih lam not a diam aw I chih lai in Lamka ah bel a ngeingei gentak louh quota le keniam deuhdeuh hileh kilawm abang hi. Kum khat-leh-akim paita in Lamka a Agency nihte a ding in truck 35 vel bil-at hi gige in kigen hi. Himahleh, tu hun in 30 truck lak khateng in quota piak lak uah, truck 30 le Agency nihten va pokhe lou chihna suak hi. Hiai bangziak ahi ding? A milip mahmah lah pung, consumer lah pung tou jel ding a, huai bangkal a Lamka a ding LPG quota a niamsak theih mok uh? Patauh huai mahmah maw!

IOC Sekmai Bottling Plant lamte’n le Lamkate’n zaw black in le na leilei thouna uh chi a quota hon niamsak uh hizaw hiam? Ahihkeileh, blockade ziak, bandh ziak khawng paulap I hi uh hia leh? Manipur chiatchiat ding a le Senapati, Kangpokpi, Tamenglong chihten kha 5 sung a 4/3 a hom zou thou ua, Imphal lak a ten kha 5 sung 4/5 vei hom khe thei veve thou uhi. Huaiziakin, Lamka ah kha 5 sung a 2/3 vei kia consumerte kiang a refill piak zaw tawm lo lampang a hi. Kha 5 sung in 5 vei refill muh ding zaw ki lamen pha nai kei hang, himahleh kha 5 sung a refill 4/3 tan bek piak theih hamham hileh lungngulh huai mahmah hi.

Indian Oil Corporation(IOC) in le Manipur dinmun a thei lou ahi kei. The Sangai Express dated 16 July 2012 ah hi chin kigen hi.

“ In order to at least put a check on the large scale pilferage of filled LPG cylinders and the diversion to the black markets, the Indian Oil Corporation is likely to crack the whip and fill up empty cylinders from the Sekmai bottling plant from August this year.  Talking to The Sangai Express a reliable source said that despite the existing laws and rules to book pilferage and selling filled LPG cylinders in the black market, the law enforcing agencies as well as the district administrations have not done anything to check the illegal trade.

To ensure a minimum degree of check on pilferage and ensure that the filled LPG cylinders reach the consumers, the IOC authority has decided to fill the empty cylinders at the Sekmai bottling plant from August.

Despite shortage of filled LPG with the dealers, the same is available in plenty in the black markets with filled LPG cylinders being put up for sale at many pan dukans and grocery stores.

Moreover in many cases, the consumers do not receive fully filled LPG cylinders as the same have been pilfered. Filling the empty cylinders at the Sekmai plant will help to a certain extent in checking the diversion of filled cylinders to the black market, said the source.” (Source: TSE)

Huaiziakin, black market a guk khenkhiak(diversion) ziak a Lamka a LPG quota kidaih lou eimah in chi kei thei in, Lamka a Distributor nihte’n le a quota mah uh va puakkhiak zoh teitei sawm le uh , Lamkate leh LPG buaina  a dan hong om deuh ding in lamen hang.

Tulel a Sekmai Bottling Plant Capacity tuh 900 MTs ahi huai lak ah a supply theih 770 MTs vel ahi. Hiai Sekmai Plant a supply zoh Manipur State a ding in a kidaih kei chih haihvual louh ahi. Sekmai Plant in a supply zawhlouh(deficit) 800 MTs kha State polam apan Tanker a puaklut zel ahi chi in IOC in gen ahi. IOC in Sekmai Bottling Plant pen 1800 MTs Capacity ding a bawllet(double upgrade) ding in pan la pan hi. Hiai tuh July, 2014 tan a zoh a tup uh ahi a, himahleh, huai hun chet a a bawl zoh uh gintak haksa mahmah hi. Huaiziakin LPG kidaih deuhna ding a July 2014 tan ngakngak lai ding I hi uh hia? Ahikeileh, bang tan pan lak theih a? “Temporary Arrangement” bang chi bawl ding?  chih lampang I district a thuneitute’n hon gel a pan hon lak kal uh mipi kingak lah mahmah hi.  

LPG homzakna paidan(distribution system) Sorkar in a etkai(regulate) ahi lai hi. Huaiziakin, Churachandpur District a Deputy Commissioner, District Civil Supply Officer leh Agency nihten panlak ding liantak nei lai un ka mu hi. Huaite panlak panpihtu leh huhte ding I muan mahmah uh-Autonomous District Council bang le om lai. Huanah, Gas Agency lamten le ‘DC nu hiam, DSO hiam in hihtheih gentheih le nei kei’ chi in I haksatna tutpih maimai lou in mipi leh pawl tuamtuamte’n hon panpih theihna ding in om thei zaw lehang chih huai mahmah hi. LPG homtu(distributors) ten lah a kisaipih kiang ah thu tun ngei lou ’tun le le vailak zunthak bang lel ding’ chih khong pansan louh hoih ding hi.

LPG kha Sorkar in aman niam(subsidized rate) a mipite kiang a zuak ahi. Subsidy sum kha a company leh phualpi sorkar in a puaksuah uh ahi. Hiai subsidy sum ziakin Oil Marketing Company-te(OMGs) kum tengin  a ‘business profit’ uh se thei mahmah hi. Azawng ahau in aman kibang a a lei theih na ding ua  bangziak a sorkar in ‘subsidized rate’  a hon pia hiam I chi mai thei. Aziak khat hi a ka theih chu, LPG tuh mei siang(clean fuel) ahi a, mipite’n sing/melhawl zang lou a baihlam leh kizen a neek ding a huan theihna ding ngimna ahih banah, gamlak a sing hing dipdipte singkhuah/meihawl ding a phuk a gammang sutsiat ding venna khat leng ahi a. Huai gammang kepbit hong hihchiang in khovel lum-leh-vot kikhenna lam leng kepbitna khak hong hi ding ngimna ahi. Ahi a, I Gam ah LPG kidaih louh ziak in meihawl leh sing a ann I huan ban uah LPG black a lei zou te’n a aman diktak sang a tamzaw Rs. 1200-1500 kal lak khong in I lei toihtoih uhi. Dan toh kituak lou a LPG Black market Lamka khopi a pumdim toh kisai leng thu netu adiakin- Lamka Police leh District Civil Supply Officer te’n pan hon la le uh chih deih huai mahmah hi.  

Mundang khong ah hichibang haksatnate mipi’n a tuah chiang un a Minister/MLA te’n District Officialte kiangah thil omdan kan chian in panla kin din theisak pahpah uhi. Himahleh, ei gam ah chu mipite buaina aw, kahna aw a ngai khe ding om lou a bangta mai ve! I MLAte uh, I Ministerte uh, leh District a Officer te uh Office a omsak man lou a a sak a khang a Chief Guest ding kia a subuai ihi ding ua aw! chih mai in om hi. District Officialte- DC, Distt Civil Supply Officer leh LPG Distributor nihte hong pangkhawm thak uh henla, a mau kia a buaina a tuah ua leh district in-chagre Minister/MLAte, ADC tanpha ah panpihna ngen in tha thak honsuah thak mahmah le uh chih huai hi.

Atopna ding in, simtute khualna in, Zogam.com FB Group a kigelh, a gelhpa phalna toh laksawn, Gas Supply toh kisai buaina nei a Online Complaint/Feedback IOC-Indane Gas a pe utte a ding in hiai ah ahihdidan ka hon tak lang thak hi.
 
1.    Website http://www.indane.co.in/  ah lut in (preferably Internet Explorer)
2.    Na Consumer Number na theih kei leh LPG transparency portal ah et theih ding. Mundang a omte’n pate min a card om ahihleh leng complaint bawl theih ahi a, hiai mun mah ah  Min leh Vengmin in le zawng theih ding hi.
3.    Na Consumer Number na theih chiang in HOW DO I? ah na cursor koih inla SEND A COMPLAINT? chihna click in
4.    Huaina click chiang in http://webapp.indianoil.co.in/paribhavam/  site ah Feedback form hong kihong ding hi.
5.    Hiai form ah dropdown om hi. Feedback related to- Indane(LPG) Packed/Bulk and Auto Gas select inla, Huan Indane Domestic Customer hiam Indane Distributor hiam na deih pen select in.
6.    Nature of Feedback ah Delay in Refill Supply hiam, Diversion/Misuse hiam, ahihkeileh Others select in.
7.    State piakna ding ah Manipur tel inla, huan ah District ah Churchandpur tel in
8.    Dealer/Distributor Churachandpur a nihte min hong kilang dia consumer na hihna Agency tel lel in
9.    Consumer Number piakna ding om ah Lamka a na Consumer No pia in.
10.    Subject leh Feedback Description munte ah thu poimoh na sakte gelh in. Feedback Description 500 characters tan ahih theih banah, letter leng upload theih ahi.
11.    Complaint lam teng na fill-up zohchiang in, anuai a min address, contact, number, mobile number, email chihte piakna ding form om leng fill up in.
12.    I have read, understood and agree to the Terms & Conditions fully chih ah TICK bawl in la submit feedback click in.
13.    Huaizoh submit lechin Complaint Registration Number honpe ding ua, printout na lak kei leh chiamteh in.
14.    Hiai teng na zoh chiangin complaint zou na hi dia, na complaint status leng a changchang in na check thei ding hi.

Hun hongtung ding ah, LPG toh kisai a haksatna/buaina I tuahte uh hiai a tung a dan in Complaint Platform ah tunzel thei leng a hoih mahmah ding hi. IOC-Indane Gas in Complaint/Feedback Platform adiakin consumerte khualna a hon bawl ahi. Kuamah maigum phut ngai lou, leh sum sen ngailou  a complaint bawl theihna ahi. (thugelh beita, athu bei nai lou!)

RELATED ARTICLES: Lamka-te leh LPG buai - I