'Tribal' chih thumal hi English thumal 'tribe' kici akipan kilakhia ahi a, Paite pau in 'suangtu khat nei nam chikhat' chihna ahi tangpi a, Dictionary khenkhat ah bel 'Manlai mi, nam niam leh tuantual' genna in kizang hi. Hilhchetna masa pen a hoihlam (positive terminology) ahi a, a nanung pen in bel a selam (negative terminology) kawk hi. Anthropologists leh sociologists te'n ahihleh a hoihlam (positive connotation) kawk sak ua, himahleh thumal peuhmah a zat hun leh a manna mun a zir in kawksak dan tuamtuam om thei thou hi. Chi-le-chi a kideidanna gam India ah bel nidanglai pek apat in 'Tribe/Tribal' kici thumal pen 'nam niam, singtang kawm a tengte' genna in kizang a, tuni tanpha in nam mawlte genna (negative connotation) in kizang hi. Hibang a nam/chi a kikhenna (caste system) pen Kristian gam ah om thei kei mahleh ei utthu leng hiloupi in tunin ei Zomi-te pen India ah 'Tribal' chi in chiamteh i hi uhi. I unau Chinese-te, Korean-te, Japanese-te, Thais-te, Burmese-te leh adang dangte jaw 'Tribal' kici tel lou uh hive'n maw!
India gam ah malai pek akipan 'caste system' ana uang mahmah a, tuni tanin nam niampente genna di'n Government of India in 'Scheduled Tribes' (SC) ana zang a, atung ah 'Scheduled Tribes' (ST) ana om hi. Hibang a nam nam a kikhenna in namsang leh namniam a bawl jiakin India ah kisimmohna leh kihajatna uang petmah hi. Ei Zomi/Mizo kia hilou, North East India a i unaute tengteng tanpha zong deidan in i om mawk uhi.
Positive Terminology ah bel Tribe/Tribal pen kikheng (dynamic) thei a, nampi (nation) khat in kip takin dingkhe thei hi. Etsakna na'n German Tribes hi sek pen Germans, 12 Tribes of Israel pen Israelites, Africa gam a nam mawl leh tuantual mahmah omte leng kuaman 'Tribal' chi tuanlou ua, nam a hihna uh American toh thumun (synonymous) thou hi. Himahleh India ah bel kikheng lou in nget takin ding (static) a, khangsawn tawisawn adi'n mulkimhuai sim mahmah hi. India gam ah Zomi-te pen huai Bengali, Marathi, Tamil, Malayalam, Urdu, Bihari, Oriya leh adang dangte sanga nam niam jaw leh tuantual jaw hi kumkhua ding maw? Bengali Minister a om leh Zomi Minister ki-om a, Hindu a hihleh ei Christian kihi mai a, First Class Human leh Second Class Human kichi thei ngei khang! A poi pen bel masawnna kibang vek lou ahi mai hi. Himahleh gentheih leh tuantual jiaka 'tribal' va hih na'ng om kei hi. Kitoudelh louh peuh paulam a zang a, tribal quota, tribal concession leh tribal development peuh muh ut jiaka 'tribal' hih ut maimah ina hi zaw diam?
Huaijiakin, Zo tate hi 'tribal' i hi kei ua, nam piching leh vualpha pangngai khat i hi uhi. I gam simthu sut lehang beh/phung tuamtuam Gangte, Paite, Lusei, Vaiphei, Hmar, Zou, Simte, Laizo, Mara, Khumi, Thadou leh adang dangte kigawmkhawm a, nampi khat lamkhia a, siamtu Pathian pahtawi dia kisa lel i hi uhi. Huchibang a galdot (vision) sang tak i neih chiat lai ua 'nidanglai mi, nam tuantual, nam mawl, nam niam' kichih veu pen deihtelhuai nawnlou law mahmah hi. Huai naksangin 'tribal' hon chi a, hon simmohbawl om leh tuanu/tuapa toh I kalthu ngaihsut hun hi zaw ta hi. Tuni chiangin khovel khantouhna tuamtuam te'n hon chim a, hat taka pai dingin Zomi-te zong hong toholh maimah ta hi. Kitawmkansak lou a, kipelsak lou a ina bohdet ngai ta hi jaw hi. India gam a ST Quota nengnawn khawng delh a i om pen a tawpna vawrhtawp hilou in i gam-le-nam, i mi i sate adia thilmanpha, suangmantam puak ngai hi ta hi. History ah 'tribal' i mu kei ua, 'Ancient' i mu uhi. Bible ah 'Ancient' chih thumal kizang lou zomah lai hi.
Ahihhangin, tuni'n Zomi te'n 'Paite khonung pil' ding kitasam hang. I Zogam Political Issue ah pialmang kha nakin i khosa nak uhi. Siamsinpawlpi Annual Magazine 2010 'OUR CHALLENGE, OUR FUTURE' ah Zomi te'n 'Politics Beyond Tribalism' i mamoh dan uh hong lang hi. Galdot ina neih louh luat jiak ua i gamsung ngei ua gamdang Constitution nuaia kun maimah i hi uhi. Huaijiakin, pil ta ni. I taksap, i mamoh om leh unau China-te kiangah puktaw ni in, i buaina om leh Tangthupha hong hilh a, hon tankhia Sapte kiangah zualkou ni. Tribal dana kingai mai lou in hiai India 'LAND OF HORRIBLE DREAMS, LAND OF DACOIT POLITICIANS, LAND OF TABOOS and Land of Devils kici hial kiangah Tangthupha gen jaw ni.