Hau Nuam in Zogam.com tungtawn in Pauginmuang Rs 18600/- in panpih

Hun paisa a Zogam.com tungtawn a Pauginmuang tangthu ina suahte un khovel pumpi a om Zomi te lungsim sukha ahi ngei ding a, US Tennessee a om Pi Hau Nuam lungsim khoih kha in, admin Pu Ginza Vualzong ana contact a, Pauginmuang panpih ut ahih dan te gen in houlim toutou uh hi. Hiai a houlimna uh taksuah in Date 11 Juy 2015 in Pi Hau Nuam in Zogam.com tungtawn in Pauginmuang panpihna in US dollars 300 hon khak hi.

Tuni Monday, 13 July 2015 ni in Lamka a om Zogam.com ngaina tu khenkhat ten hiai US dollar 300 Excel Travel ah India sum in va khek ua, Rs 18700 pha zou hi. Excel Travel ten a ngeina dan hi leh Rs 300 la ding uh hi mahleh, Rs 100 kia sum khekman la ua, tua zoh in Rs 18600 pha zou hi.

Zogam.com team ten nitaklam dak 2 vel in Pauginmuang te inn Khominthang, New Lamka ah sum piakkhiatna va nei uhi. Hiai hun ah Dr Liangoumuan in hiai itna sum hongpiankhiatdan te gen a, tua zoh in Zogam.com member paikhawm teng in itna sum piakkhiatna nei uh hi. Tua zoh in intekpa Pu T. Ginzamuan in Pi Hau Nuam leh Zogam.com tung ah kipahthu gen a, tua zoh in Pi S.Chingnu in Toupa kiangah kipahthugenna in thumna nei hi.

I media tungtawn a panpihngaite panpih a om theihziakin kipah huai i sa a, Pi Hau Nuam kipiakzohna thupi i sa petmah ahi. Pathian in Pi Hau Nuam a leh tam pi in vualzawl ta hen aw!