Nampi Salpha General Tunkhopum Baite Sunna Leh Vuiliamna Hun Zat In Om
Tuni Dt 25/6/2014 zinglam dak 11:30 in Panglian khua ah Nampi Salpha Gen Tunkhopum Baite (10th Oct 1929- 5th Feb 1967) sunna leh vuiliamna hun zat in om hi. Hiai hun zatna ah ST Jamkhanthang, Gen Secy, Ex-Chin Liberation Army Society in Pu General Tunkhopum Baite luang toh khiatna ding toh kisai a apanlak dan uh tomkim tak in gen a, hiai tungtawn a kipumkhatna leh politics a khantouhna thak a om ding lunggulhna ahihdan leng taklang hi. A luang tohkhiatna a va kuan a sanggam’ Ginkhenpau Baite inleng report hun saulou zang hi. Aman a genna ah, Pu Gen Tunkhopum luang pen a ki vuina MNF camp a commander pa va dong masa ua, amah huai hunlai tak a adamlouh ziak in aman huai hun a tel midang ana kawkmuh hi. Amau leng a mikawkmuh pa uh va pan in, huaipan leng a genna uapan a lungsim a thak mahmah lai ahihdan ana hilh in mun bangzah hiam a va toh nung un vangphat huai tak in a makaihpa uh genna mun ah a sam bangzah hiam va mu thei in leh, a guh a taang buanlei suak khin ahihman in, a sam leh buanlei bangzah hiam kum 47 vel mi gam a vui liam ahih nung a lungmuang tak a apianna khua mah a vuiliam theih din hon pawtung thei uhi.
Pu LB Sona, Chairman, Zomi Council in a thugenna ah, Pu Gen Tunkhopum Baite tangthu gelhna laibu Geneva a UN Headquarter’ library a koih a omta ahihdan leng taklang a, hiai luang pholh khiat kikna pen a hoihlou lam a lalou a, I mi thupi khat si a a vuina omlou chihpen ngaihtheih huailou ahihmanin, a vuina hunzang ni chih ziak ahi chi hi. Huai banah, Pu Gen Tunkhopum statue thupi tak a bawl khiat sawm ahih dan leng gen banah, Zomi Revolutionary a martyr masapen, a hangsanna leh chihtakna etton in nei leng chi’n a thugen zou hi. Ama thugen zoh toh kiton in ZC memberte’n a luang puan a tuam in pak piakna leng nei uhi.
Pu Thanglianpau, President, ZRO in, Pu Gen Tunkhopum ana paisuak hileh tutan in Zosuante kigawm vek zou keilengle State khat a ina omtak ngei uh ka ginta chi hi. MNF cadre-te lungsim lian deuh hile uh, I makai pa uh sepna sa zarzouta ding hi hanga, chi’n poi asak dan khase tak in gen a, hiai luang tungtawn in nam le gam itna naktak in hong khang leh chih a deihdan gen in a hun zou hi. ZRO GHQ in puankhuhna a neih zoh un pak piakna leng nei zuingal uhi.
Hiai hun ah Pu Vungzagin Valte, Hon’ble MLA/Thanlon, Pu Langkhanpau, Chairman, ADC/CCpur, Pi Grace Zamnu, MDC ten hunsaulou chiat thugenna a neih ban ua, zahna piakna leng nei uhi. Zahna piakna hun ah ZRO GHQ, ZYA GHQ, PTC GHQ, TCU GHQ, TPO GHQ, ZOLLS, SSPP GHQ, VPC Kangvai Block, Pu Ginsuanhau Hon’ble MLA/Singngat min inleh, midang tuamtuam akipan in puan leh zahna pak piakna hunzat in om hi.
Pu Gen Tunkhopum Baite’ Pute’n hun a zatzoh un a Inn kuante a kipan inleng thugenna hun saulou zat in om hi. Pu Khatkhotong Baite, President, Vaiphei Peoples’ Council (VPC) in thugenna hun a zatzoh in Rev Lamkhogin Khaute, Exec Director, EOC in khak khiatna thumna nei in sunna program zoh in om hi. Amah Pu Gen Tunkhopum Baite vuina ding a tuam a kibawl ah nitaklam dak 3:00 in ittu mipi tampite maiah zahna liantak toh ngaina tak a vuiliam in omta hi.
Zogam.com News Service
