LETSEA In CEO/ADCC, CCpur Dist Kiang Ah Memorandum Pia

Tuni sunnung dak 2 in ZOPA CT Lian, Chief Coordinator, LETSEA makaihna in memorandum khat Pi Mannuamching, CEO/ADCC, CCpur District kiang ah piakna nei uhi.
Hiai memo in a taklatte bel:

1 Tutan a kimukhia bang in, mundang akipan Lamka a hongpai ten valid license kichiantak neilou in sumsinna hong pan uhi. Hiai toh kisai a ADC in Nov 12, 2012 leh 18th Jan 2014 a trading policy order a bawl-NO LICENSE NO BUSINESS semsuah a sumdawngte le sumsin mite banah, kholai a vanzuak ten hiai dan a zangna uhia chih etkai ding.

2 Lamka khopi sunga mundang akipan hongpai tam mahmah ta a, hiai ten khotual mite sumsinna paizia naktak in susia a, khotual miten sumdawnna toh kisai a hamphatna a neihte uh suksiat sak hi. Huai ziak in khotual mite business vengbitna din mundang akipan hong paite kiang a trade license piakkhiatna toh kisai a khauhzaw sem a etkai ding.

3 Van tuamtuam a hunbeisa zuak, vanman khek lamdang, tehna diklou zat, naupang leh upa lamte vanman toh kisai a khemnate. Mundang akipan Lamka a Doctor hong pai a damlou hong enzelte, Dist dang apan sumdawng mi hong paite, kholai a vanzuakte khempeuh enkai a, valid license neiloute dan toh kituak a vaihawm ding.

4 Khopi sung ah license lem tam mahmah ta ahihmanin, hiai toh kisai a khauhzaw sem a etkai ding, license piakkhiat peuhmah ah license neitu limlak, suai, local address, leh a inluahna neitu min leh Contact no a om ding.

5 Khopi sunga van kibang mah a man kibanglou a sang taktak a kizuakte aman ki kimchiat a bawl ding, puannawt man, clinic tuamtuam a Urine test, Blood test X ray lakmante hoihtak a etkai ding.
A tunga points kipiate toh kisai a mipite deihna banga panla ding in phutna nei uhi.
Hiai memorandum toh kisai in CEO/ADCC in Police toh kithuah a kalnawn sung nei a panla ding in thuchiam bawl hi.

Zogam.com News Service