Tipaimukh Road Siatna Toh Kisai In CT Lian in BRTF Ah Memorandum Pia

Tipaimukh Road mun khenkhat kisiatna toh kisai in tunitaklam dak 1 in CT Lian, Social Activist in Officer In-Charge, 80 RCC, BRTF kiang ah memorandum pia hi. Hiai memorandum in a taklat bel; Hiangtam Lamka tawn a Tipaimukh Road paipen 0 km akipan 0.3 km vel a om Community Hall kong lampi tua vuah zu in naktak in susia hi. Hiai lampi kisiat ziak in Traffic naktak in nawngkai a, gari taituah velte di'n accident tanpha tunthei dinmun ah om hi.

Huailou in, 0 km akipan 2.2 km vel a gamla Chiengkonpang a BSNL building kong leh 0 km akipan 2.3 km vel a om Forest Beat Office kongte ah tuktui luan chiang in tui kiching thei hi. Hiai tegel kal ah school nih Beersheba Play School leh Lalpuithuaii Foundation School-te om ua, school timing hunchiang in gari zanga school naupang pi leh kha tamtak om ahihman in, hiai mun a tui kichingte school naupang leh a pitute banah, gari taituahte adin accident ding baihsam diak hi.

Hiai a tunga thute toh kisai mipite mah a thuaktu ahihman in, a poimoh banga nna a hon sep khiat pah ding uh ngen hi.

Zogam.com News Service