Hill District Premier League ki pan ding. Ki mawl et man Rs 10.
Hill District Sports Association Manipur, HIDSAM saina in zingchiang, April 22, 2014 in Public Ground,Hiangtam Lamka ah, 1st Hill District Premier League, 2014 kipan ding hi. 1st Hill District Premier League ahih leh April 26, 2014 tan ding ahi. Hiai toh kisai in ki sak kholhna nasa tak apai tou in, ground mun ding te man fel diam in om ta hi. 1st Hill District Premier League, 2014 pen Churachandpur District Sports Associatoin, CDSA te zintun ding ahih dungzui in CDSA in leng pan nasatak a la in district dang te et ton taak ding chi in, a nuam thei pen ding in sai sawm uhi. CDSA in fund raise na ding in public ground te langva a uum kiim vel in, kimawl en ding te a ding in ticket bawl sawm uhi. Kimawl et man mi khat ah Rs. 10 zel hi ding a, hiai pen mipi leng theisiam chiat a, ticket te lei sak siau siau ding in ngetna leng bawl uhi. Hiai 1st Hill District Premier League ding toh kisai, district tuam tuam te leng hong tung ta ua, amau te Public Ground sak a Youth Hostel om sak vek uhi.
Thutut ki ngah tan in District 2 - Ukhrul leh Chandel te a ki pan team hong tung pan uhi. 1st Hill District Premier league, 2014 opening ceremony, zingchiang, April 22, 2014 sun dak 12:00 in kipan ding a, hiai hun ah, Dr. Rishang Keishing, MP, Rajya Sabha in Chief Guest hihna toh uap ding hi. Pu Thangso Baite, MP, Lok Sabha in Chief Host hihna toh uap ding a, TN Haokip, MLA, Janghemlung, MLA, PK Jha IAS, DC, Churachandpur, John Raleng, Chairman ADC leh A.Santosh Kumar, President, AMFA ten Guest of honour hihna toh uap ding uhi.
1st Hill District Premier League ah, Manipur a Hill District teng, Churachandpur, Ukhrul, Senapati, Chandel, Tamenglong leh Sadar Hills te apan team khat chiat tel ding ua, Pool A ah DSA Ukhrul, DSA Senapati leh DSA Sadar Hills te om in, Pool B ah DSA Chandel, DSA Tamenglong leh DSA Churachandpur te om ding uhi. Zingchiang opening match ah, Pool B apan DSA Chandel leh DSA Churachandpur te kimawl ding ua, zingchiang mah, 2nd round ah Pool A apan DSA Ukhrul leh DSA Sadar HIlls te kimawl ding uhi.
