Lamka a tui hak. Private a tui zuak te lawk uh.

I gam sung environment ki khek ziak in khua lum in, lanva tui leng kangphial im om hi. Khuga Dam i neih pen un la Lamka khosung tu ta dih a tui supply thei nai lou ahih manin, Lamka khosung tui haksa mahmah hi. Tua toh ki ton in private a tanky lian nei te luun mahmah ua, tui deih teng le  pe daih zou lou uh chih muhtheih in om hi.
Hi chi bang a tanky bangzah hiam kibawl te lak ah, Zoar Veng, Bungmual a om, H.Thuamsanglian in a inn kiang ua tanky a bawl lun diak in kilang a, zinglam dak 4:00 apan nitak dak 10:00 tan phial phial tui tawi om zou den hi.

 
Tanky nei tu H.Thuamsanglian in a gen dan in, a tanky a ding tui te, Nahlip, Ngallian leh Lanva lui te apan a laak hi a, tua pat kha 2 bang vuah zu kei le leng, a tui kang lou ding hidan in gen hi. Huai ban ah, hiai tanky a mahni tha zang a tui tawi ut te bel a tui man la lou a, himahleh rickshaw leh gari dang dang zang te a bel a tui man la zel hi dan in gen hi.

Tanky neitu, H.Thuamsanglian in a gen zel na ah, rickshaw te khat vei ah Rs. 5/- zel la a, litre 500 tan chiang po ding te Rs. 10/- a laak ban ah, litre 1000 tan paw ding te Rs. 50 dan a la zel hidan a gen hi.Tulai a ni khat a Rs. 2000 apan Rs. 3000 vel mu zou gige hidan a gen hi. Pu Thuamsanglian a lou mun dang bangzah hiam ah leng mi ten tui tawi ua, a laak dan u leng ki bangkual sim vek hidan in gen hi. Pu Thuamsanglian in a gen zel na ah amah tanky pen litre 8000 hi a, a kiang a a kuang dan a a bawl pen, litre 3000, a ki gawm a litre 11000 himahleh, hiai te bangmah lou kal a bei zou ahi chi a gen a, Churachandpur district mipi te i tui demand uh saang mah mah ahi chi in gen hi.

Manipur Government in Water Supply ki  nei hi zen pi in, mipi te private supplier te a kipan tui i ki ngak mai pen uh Zogam.com in poi ki sa mahmah hi. Hiai lam tawh kisai deparment te leh social organization i neih te un ngaihven thei leng chih huai mahmah i sa ahi.