HAAM (Competitive Awareness & Personality Development) An initiative of Mr & Mrs. Biakmuan Tombing in Associate With Siamsinpawlpi Joint Headquarters Shillong.

HAAM ichih ipupa hun a bangkim kisinsakna mun a neih ahih dungzuiin tuhun inleng sep theih bawltheih tuamtuam nei tuailai talent hoih taktak neite bang chi tunding ahi a chih ngimna na HAAM KHA(spirit) tunding thak ngimna in Competitive Awareness & Personality Development patkhiak ahi. Hiai HAAM ah kisinsakna tuamtuam neih leh sepna zonglel te adinga lampi kawkmuhtu a hong hihkhak lametna liantak nei kawm a HAAM mivuah a Mr & Mrs.Biakmuan Tombing leh Siamsinpawlpi Joint Headquarters Shillong malakna a patkhiak ahi.

HAAM DAY-1:
Shillong Siamsinte makhualna in Siamsinpawlpi Joint Headquarters Shillong leh Pu Biakmuan Tombing malakna a kibawl Competitive Awareness & Personal Development 15th August 2015 zing dak 11:00 Pu Dongginlian Tonsing (Advisory Board, SSPP Jt.Hq.Shillong) in honkhiak nei hi.Hiai kisinsakna mun dingin ‘HAAM’ chih minvuah ahi.Pu Biakmuan Tombing in ‘HAAM’ ichih bang hi hiam?chih genna a neih banah a video clip inleng lahna nei hi.Aman agenna ah Siamsinte a awlmohna ziaka SSPP Shillong toh pangkhawm a hichibang Competitve Awareness programme hon sai ahi dan genin maban ah leng a tel nuam peuh te adia kong kihong gige ahihdan gen hi.Hiai programme pen thawn liauliau a bawl ahihmanin siamsinten ngai poimoh in banghiam lam bek ah phattuampih a deih thu genna leng nei hi.

Hiai hunah Pu H.Chinkhenthang, IAS (Retired) in leng hun saulou zatna nei in aman agenna ah nidang sangmah in tuchiang in Competition sang mahmah ta a, nidang in bel lehkhabu sim lel in exam ki clear thei a, himahleh tuhun in bel a sim kia hinawnlou in practice tam mahmah leng poimoh ahihdan genkawm in tuchiang a eilawi i lutzohna omsun Bank lam himahleh tu apan hahtak a ipan kei leh tunung kum 4/5 in miten hon lutkhalh zungzung ding ua,eilawi adia chance tawm deuhdeuh ahihkhak ding lau huai ahihdan gen hi.Huaiziak a hiai bang siamsinte awlmoh na ziak liauliau a HAAM hon pankhia Pu Biakmuan Tombing leh SSPP Shillong te pahtakhuai leh phathuai asak dan gen hi.

SSPP Shillong President Pu Suankhenmung Shoute in leng hiai programme siamsin ten atam theilam hamphatpih sawmin hichibang programme te ah siamsinte atam theilam kihel dingin chialna leng bawl hi.

Hiai ni in Pu Mawi Hatlang Paite in SSC lam toh kisai Reasoning sinsakna pia in nuam mahmah hi.Hun nihna ah Pu LB Muanthang in Mathematics lam sinsakna pia in atel ten kisik huailou ahihdan gen kheukhou uhi.

Programme hun kal in Break om a hiai hun in Target nei a Air Pistol kikap demna om hi.Hiai thau kap kidemna om pen gennei tak a sai hi a,Siamsin ten tup kichian neitak a siamsin a,thau i kap a target i neih bang in i siamsin na ah leng target kichiantak nei a huai kapkhaksawm a panlak ding ahihdan etsakna a sai ahi.Hiai thau kikap a siampen hihna la Mr.Tuankhansuam Gualnam in Competitive Success latest issue copy khat sang hi.Hiai HAAM pen kigiini teng a zat hi ding a,a tel ut te tel theih ding hi.

HAAM DAY-2:
22nd August 2015 nitaklam dak 04:00 - 05:30 sung HAAM sai hi a,Hiai hun ah Bank(IBPS) lam toh kisai sinsakna Htp.M.Thangmuanlal Guite in nei a, SSC-Reasoning kisinsakna Htp.Mawi Hatlang Paite in nei hi.Hiai hun ah siamsin sintu mi 30 vel paikhawm hi.Hiai hun ah Siamsin tamkhop pai khom in phatuampih mahmah uh ahihdan agen uh kiza hiauhiau hi.

Hiai program mailam a le sai tou lai ding uh ahih man in, kuapeuhmah a lunglut teng tel ding in zong chial uh hi.