DC/CCpur in I-Day a tel Student paradete leh Award mu khenkhatte nelhsiah.
ZNN | Lamka 18 August 2015. Churachandpur District Administration saina nuai a Independence Day celebration zatna toh kisai in gen leh sak om neneuh hi. Parade a 1st prize team te Rs 500 kia piak in om a, huai ban ah Award khenkhat a saangtu khut a piak hi lou hi.
Tutung Parade kidemna a 1st, 2nd leh 3rd Prize Rs 500 chiat piak in om a, Churachandpur District khangthu a dia prize tawm na pen hi ding a gingtak ahi. Parade contingent khat a mi 30-40 bek pha ding ua, mi khat in Rs 15 vel tangpha hamham di dan in om hi. Hiai parade competition dingin School naupang leh Teacherte kha khat phial nisa nuai leh vuah nuai ah class tampi missed zen in kisa khol uhi. Khenkhat bang nisa thuak zou lou in 'sun stroke' a puk bang om chih zaak in om a, khenkhat Lamka town pua a omte bang Auto bahara tampi seng in pan la uhi. Hiai parade kizilna ah niteng in School in naupangte refreshment pia ua, sum hunkhop ana seng uhi.
Churachandpur DC leh a team ten hiai naupang paradete haksatna theisiam lou a Rs 500 kia prize a piak uh studentte nelhsiahna (humiliation) leh a thupi ngaihlouhdan uh taklangh uhi. Parade a tel Schoolte sum senzah din kiik ding i chi kei a, District khat thilsai dia Prize ki lawm tan om sam hi. Hun paisa ah namdang DC tuamtuam i na nei ua, himahleh I-Day prize toh kisai gen luat di ana om lou hi. Himahleh tutung eimi DC i neihna nuai ua thilsai dan pen a za kha peuh in lamdang leh kilawmlou sa chiat uhi.
1st prize, 2nd Prize leh 3rd Prize te Rs 500 chiat piak a om pen in kidemna paidan (competition spirit) omzia neisak lou hi. 1st la te a ding in khatna lak man omlou mah bang a, a vualtungtuanna un omzia nei nawnlou hi. DC tan dinmun len thei ten competition spirit a theihsiam uh lamet ahi.
Award i chih lam tuamtuam a lohchingte piak hi zel ua, ettontaak ahihziak mah un mipi mai ah tawisan in om sek uhi. Tutung Ccpur I-Day ah bel award khenkhatte a saangtu khut a piak hilou a, Head of Department khut ah piak in om mawk hi. Award in a tup mipi muh a pahtawina leh ettontaak ahihna uh pulakna pen omzia om nawn lou a, District award pen thupi ngaihlouh ahih dan uh DC leh akaihzatam ten langsak uhi. Award saangtu khenkhat a sungkuante toh award la dia hong kuante thawn kiik maimah pen lungsim nasak mahmah hi. Hun ki daihlou chih dia lah Football match neihna di hun bang om thei zel hi.
Fund omlou chih dia lah DC pa huang sung a Garden Party chih bang thupi thei pen a sai in om zel a, huai ban ah thildang saina a sum tampi piak a om pawl bang om zel hi. Tutung DC eimi mah ahihna toh i dinmun uh leh haksatnate hon theihsiampih dia lamet hinapi in, hichi bang a studentte nelhsiahna leh Award saangtu te ngaihsaklouh a om pen in studentte leh award saangtute suthadah (discourage) thei ahih manin, mailam ah DC leh a team te'n pilvaanna a hon zat uh i deihsak mahmah hi.
