DA PANTHER UNITED IN HOIHLAM NAWTLOU; DOSTI 04 IN MA KAI LAI

Frontier Premier League paizomtou zel in tuni february nisim 28 nitaklam dak 3 in DDA Ground, Vasant Kunj, New Delhi mun ah matchday li (4) na neih in om nawn a, league kipat tung a hihhoih mahmah Da Panther United in bel a kizom a a nihvei na ding in vuallelhna tuak nawn uhi.

Kimawlna masa ah table a nihna luah ZuunLouh ParMawi Football Club leh a niampen a om Bahut Jyada Pyar kimawl ua, ZuunLouh ParMawi Football Club in 3:2 in vualzawhna ngah hi. Kimawlna nihna ah table ma kai Dosti 04 leh Da Panther United te ki sutuah nawn in, Dosti 04 in 2:0 in vualtungtuanna ngah ua, league table ah point 9 nei a point a kikim pih ZuunLouh ParMawi Football Club tung ah goal force neih hoihzawk ziak in league table makaih lai uhi.

Matchday 5 ahihleh DDA Ground, Vasant Kunj mun ngei ah March 7, 2015 ni in om nawn ding a, huai ni in league table a khatna leh nihna - Dosti 04 leh ZuunLouh ParMawi Football Club te ki sutuah in, kua'n khatna luah di'n chitna leh hatna a neizaw a chih chetna hong hi ding hi. League table nuailam a om Bahut Jyada Pyar leh Da Panther United te ngei leng hiai ni mah in ki sutuah ding uhi.