LAMKA, Dec 10: Mrs. Ngahneilam Haokip (35) w/o MD Khumei of Kwakta Ward No. 9, a paisa Dec. 7, 2014 nitak a Police in a luang a laknung a Lamka Damdawi inn morgue ah kikoih ua, tualthattu diktak Police in a matkhiakma misi luang lak hilou ding chih thu om hi. Tua banah Dec. 8, 2014 nitak a Diesel Auto in a phutkhaknung a dam zoulou a si Upa Hrangdovel(64) s/o (L) Hrangthansung of Mualvaiphei leng a phukhatu Auto leh driver Police in a matkhiakma misi luang lak hilou ding chih thu om ziak in Lamka damdawi a misi koihna a koih hi a, morgue ah siluang 2 om hi.
Hiai toh kisai in Langkhanpau Guite, Chairman, ADCC leh Lunminthang Haokip, IAS, DC/Ccpur panlakna in zan nitak a pan in DC/Ccpur Residence ah kihouna om a, zan nitak zan dak 12:30 tan inleng meeting nei uhi. Himahleh thupukna kichiantak omtheihlouh ziak in tuni zingkal dak 7:00 in DC/Ccpur Residence ah meeting sunzom ua, huai ah DC/Ccpur Level a kilemna bawl in, ex-gratia Rs. 1 lakh leh IAY piak ding a kilemna bawl in tuni zinglam in Mrs. Ngahneilam Haokip luang pawkhia in tuni mah in kivui hi.
Tua banah tuni sunnung dak 2:00 in DC/Ccpur Residence ah Diesel Auto in a phutlup Upa Hrangdouvel of Mualvaiphei tungtang meeting om a, a phukhatu Diesel Auto diktak Police in a matkhiak zohlouh ziak in All Ccpur District Diesel Auto Association kiphuan in amau pawl panlakna in kihouna nei uhi. Tuni a kihouna ah Diesel Auto teng sik-le-tang in misi innkuante khitui nulna ding in Rs. 1,00,000/- pia in misi luang nampuan in tuam ua, zingchiang, Dec 11 in misite inn a lut in gan gou in kilemna va bawl ding uhi. Tua banah DC/Ccur level ah ex-gratia Rs.1 lakh leh IAY piak ding chih thukim uhi.
Kilemna bawl zohnung nitaklam dak 4:30 vel in Lamka damdawi inn a misi koihna a pan siluang vui ding a puakkhiak in om hi. Hiai hun a Upa Hrangdouvel' zi in a genna ah, a pasal sihna tung ah kuaman buaina bawl nawnlou ding leh mipite’n Christmas nuamtak a zat ahihtheihna theihna dia hiai tan a hun sak ding in ngen a, mipi leh pawlpi tuamtuamte panlakna tung ah kipahthu gen hi.
Upa Hrangdouvel' sihna toh kisai in tuni’n pawlkhat in Bethel, Khawmawi a rea Tedim Road a Diesel Auto taite singkhuah leh suang in deng ua, Diesel Auto 3/4 vel khensia uhi. Tuni a Diesel Auto hihsiat a omte ahihleh Ccpur District sung a pan hilou in Sagang leh Kwakta area vel a pan bangmah theilou hire a hong pai hidan in kigen hi.
Huailou in, All Ccpur Diesel Auto Association a pan kizadan in ACDAA a pan thuthak omma kuamah in Diesel Auto Service lou ding in Ch. Soma, Secretary in theihsakna bawl hi.
~ Lamka Post
