Pu Hrangdovel Khawbung (64) h/o Lalthluongpui of Parbung, sihna toh kisai in zan December 9, 2014 in Lamka khawpi sung bandh om man hi.  Pu Hrangdovel ahihleh zan December 8, 2014 sunnung dak 4:30 vel a Diesel Auto khat in a phutkhak ahi a, amah damzoulou in si hi. Thutut ki ngah dan in phukha tu’n amun ah taisan hi. Tuahsiatna tung ah lungkimlouh lahna in Hmar organization tuamtuam kithuah khawm in Lamka bandh puang ua, himahleh khosung hausa leh student organization te’ ngetna theisiam in bandh khahkol in omnawn thei hi.  Hiai thu toh kisai in zan nitaklam in HL Dhaka Memorial Hall, Nehru Marg ah Hmar Student Association (HSA), Zomi Students’ Federation (ZSF) leh Kuki Students’ Organization (KSO) makaite leh Diesel Auto Driver pawlte kihou ua, Diesel Auto Driver pawlte’n dakkal 24 sung a mi phutu a matkhiak ding un kihou ua, huai hihbuchin ahih keileh Diesel Auto ban puang ding in kithukim uhi. 

Pu Hrangdovel luang ahihleh postmortem bawlzoh hita a, himahleh mipi’n a phukhatu matkhiak ahih matan a luang lalou ding achih ziak un District Hospital Morgue ah koih in omlai hi.  Lunminthang Haokip, IAS, DC, Churachandpur in leng District Hospital pha in lusuunna tuak Pu Hrangdovel’ zi va hehnem a, IAY Scheme nuai a hamphatna mudia guanglut ding ahih dan va theisak in, District Administrator ahihna toh Diesel Auto hektu a kin theilam a mankhe dia noh ding ahih dan theisak hi.  Pu Hrangdovel ahihleh khawmpi zanga Lamka hongpha hi a, Muolvaiphei a a tanaute’ inn a tung Sielmat Christian Hospital a damlou veh a kuan dan ahi hi.

Zan nitak Public Announcement bawl om ua, huai dung zui Pu Hrangdovel phukha tu matkhiat ahih masiah tuni a kipan Diesel Auto teng service sak louh ding hih tuak hi.