Lamka dec 3: Center for Community Initiative (CCI) te makaihna in tuni’n Synod Hall, IB. Road ah tuni sunma dak 11 in "International Day of Person with disabilities" zat in om a, Smt A. Umarani Devi, DSWO, CCpur, Colonel Anil Kumar NR, Commanding Officer, Khuga Battalion leh Shri Mani Ram Sharma, IAS ten Chief Host, Functional President leh Chief Guest hihna toh uap uhi.
Hiai hun ah Chief Host in agenna ah 2007 census record dungzui a Churachandpur district ah vualphalou mi 861 register in om a, amaute identity card leh certificate piak in om ua, maban ah Disable Certificate CMO apat in piakin omta ding chi’n gen hi. Huai banah DSW Department in Scholarship, Financial Assistance, Un-employment Allowance, Grant -in-Aid (Register NGOs), Indira Gandhi Award leh scheme tuamtuam ngah theih ding om a, hiai scheme te ahihleh Social Welfare Department ah kanchet theih ding hi’n gen hi.
Scheme te catagory nih in khen in om a catagory khatna (40-80%) ahihleh Scholarship ngah thei dingte class Nursery - class V tan in Rs. 200 leh Catagory -2na ah class VI - XII tan in Rs. 300 khateng in ngah thei ding chi’n gen a, graduate ten Rs. 600 leh Diploma te’n Rs. 400 leh post Graduate te’n Rs. 600 khateng in ngah ding ua, tua banah, Financial Assistance sum 6000 kum khat a (2014-15) ngah thei ding ua, Un-emploument Allowance ah Rs. 400 leng khateng in ngah thei ding uh chi’n gen hi.
Catagory nihna ah (81-100%), ahihleh under matriculate ten khateng in Rs. 500/-, graduate te’n Rs. 700 leh post graduate te’n Rs. 1000 khateng in ngah thei ding uhi.
Tuni a hiai hun zatna ah, 2012-13 leh 2013-14 a scholarship apply naupang 12te kiangah piak khiak in om a Tri-Cycle, Gutch, Hearing Aid leh Wheel Chair piak khiakna leng nei ngal uhi. Tri-Cycle ngahte ahihleh Thangpilien of Tuinom Village, Elizabeth Buongnu of Rengkai, David Lianboi of Beulahlane leh Chungkhosei of D. Phailian hi ua, Gutch ngahte ahihleh, Isaac of Hqt. Veng, Langkhenthang of Hiangzo Village leh Kimthianching of Tonglal Veng te hi ua, Hearing Aid ngahte ahihleh Khawlching leh Benjamin; Lalremrout in Wheel Chair ngah a; Disable scholarship ngahte ahihleh Y. Wilson of E.L Scism High school in Rs. 480/- Lianthansang of St. Paul institute in Rs. 1260/- Khupminlal of HB Academy in Rs. 600/- H. Dongvanglian of Rayburn high in Rs. 600, S. Chanchan Haokip of Young Learner school in Rs. 1260/- Langkhenthang of Chinkham Model high school, H. Jangkhohen of HB Academy, Ngaithiansiam of HB Academy leh Lhaijanei Haokip of VK. Tawna college te’n Rs. 720/- chiat ngah ua, Nemngaihfarm of St. John high school in 440/- Thanglet Khongsai of Soikholal Ideal high school in Rs. 660/- leh Christie Niangbiakhoih of Dawn School in Rs. 660/- ua, Chief Host in piakkhiakna nei hi.
Finctional President in a genna ah a pianna pa taksa poilongte lak a khat hi a, lungke hetlou a, a tate honvak piching a, a pa ziakin piangsual/Vual phaloute ngaina mahmah ahihdan gen hi. A genzawm zelna ah Stephen Hawkins, franklin Roosevelt chihte leng vualphaloute laka khat hi ua himahleh khovel a mi theihphak in om ua, huai ziakin eiten leng i lungsim uh i sukkhauh ua, septheihna lam chiat a panla di’n hasuan hi.
Chief Guest in a genna ah mahni hihna chiat a zumlou a, la sathei, lam thei leh khut nasep siam leh a dang dang bawl thei om i hihna uah i hih theih lamchiat uh pibawl a hahpan zawsem leng mahni kivakna tham mukhe ngei ding i hi uh chi’n tuni a paikhawmte kiangah gen hi.
Huailou in CCI te malakna mah a Seat Reservstion for Disable Person Sticker campaign 2nd Dec, 2014 a anapat uh sunzawm touzel zel ua, hiai ah commercial garite ah sticker belh in vualphalou te a din seat reserve ngetsak uhi. Banah hongtung ding 6th Dec 2014 chiang in Bicycle, Tri-Cycle leh Wheel Chair rally neih sawm ahihna ah kuapeuhmah in hiai hun ngai poimoh a uap chiat dingin leng ngen hi.
- Lamka Post
