TUALSUNG THUTHANG:
District AIDS Prevention & Control Committee (DAPCC) saina in World AIDS Day zatna dan in tuni apan November 28 tan daih ding “Drug Addiction & HIV/AIDS” chih thupi pansan in HIV/AIDS Weeklong Awareness Campaign tuni’n kipan hi. Hiai toh kisai in, tuni sunnung dak 3:00 in DAPCU Office ah inaugural program zat in om a, Dr. HL Liensang, CMO/CCPur in Chief Guest hihna toh uap in hiai Week Long Campaign hongkhia a, tunitak lam dak 5:30 in mun tuamtuam mun 4 ah a hun kibang geih in campaign kipan ngal ding hi’n thutut kingah hi. Tunitak in a campaign neihna munte ahihleh Rengkai Community Hall, YPA Hall, Hiangtam Lamka, Zogal Memorial Hall leh B. Vengnom Community Hall hi a, CMO/CCpur, DFWO/CCpur, Community Based Organization (CBO) leh Dist. Youth Co-ordinator, NYK-te Resource Person a pang in sinsak uhi. Zingchiang in Thingkangphai Community Hall, Chiengkonpang Community Hall, New Lamka YPA Hall leh SYO Hall, Sim Veng ah campaign neih hinawn ding a, hiai ding toh kisai in YPA New Lamka Block in tuni’n thupuan bawl in, New Lamka YPA Hall a campaign neihna hun New Lamka huamsung a om mipi a tam theilam tel ding in ngetna bawl uhi. …….
District Health Society/CCpur saina in tuni’n Mini Training Hall, CMO Office Campus ah Nurse leh Lady Health Supervisor-te a ding in ni 3 sung daih ding “Adolescent Reproductive Sexual Health” toh kisai training kipan hi. Hiai training ah CCpur District sung a om CHC, PHC leh PHSC a sem Nurse leh Lady Health Supervisor teng kihel ua, Dr. Baby, MO Incharge, Saikot PHC in sinsakna nei hi.
CCpur District sung ah gari neu (two wheeler) a tai te’n helmet khu chiat dia thusuah kibawl nung kum 1 bang paita in, khauhtak a paipih ahih nung in helmet khulou a gari neu a tai helmet khulou muh ding a vang mahmah nung in tu in helmet khulou a gari nei a tai tamtak om nawnta ahihman in, tuni’n Traffic te’n khopi sung mun tuamtuam ah Special Drive pan uhi. Tuni a Special Drive neihna hun ah Traffic Police te’n gari lai leh driving licence banah helmet khuloute hoihtak in check ua, tuni kia in leng tamtak mankhia in, matkhia a omte TR-5 Receipt cut in sum liausak ngal zel uhi. Hiai Special Drive ahihleh zingchiang in leng sutzop hiding hi’n kigen hi.
CCpur District sung a loubawlmite a ding in tuni’n Hmuia Veng ah NABARD Consultancy Pvt. Ltd leh National Institute of Agriculture Marketing, Ministry of Agriculture, Govt. of India saina in AMIGS, RGS & Commodity Trading toh kisai Awareness Program om hi. Hiai hun ah Lamka khopi sung mun tuamtuam apan loubawlmi hunkhop kihel ua, KS Lal Guite, DDM/NABARD leh CT Lian Guite, BE, MBA (London) in sinsakna nei uhi. Hiai toh kisai in tuni zinglam dak 10:00 in inaugural function neih in om a, hiai hun zatna S. Khaikhopau Ngaihte, SDC/DC Office in Chief Guest hihna toh uap in inaugural speech pia hi. Aman a a gendan dan in, CCpur District sung a loubawl mite’n I loute uh commercial purpose a dia dopsang a, huanhai tuamtuam I chiingte uh zuakkhiak theih ding dan I ngaihtuah uh hunta a, huai ding a market control ding dan toh kisa I ngaihtuah uh poimoh mahmah ahi chi’n gen hi. Loubawlmite dopsangna dia hiai bang program NABARD in hon sai kipahpih thu gen in, hiai lam toh kisai a siamna nei te’n Agriculture Product tuamtuamte zuakkhiat ding dan toh kisai leh Market Strategy bawl ding dan sinsakna hon pe ding ahihman un, tamtak in a phatuampih uh a lamet thu gen hi.
CCpur District Sports Association (CDSA) saina in zingchiang sun dak 12:00 in Lamka Public Ground ah (L) T. Doulenmang Haokip Memorial District 3rd Division League Closing Ceremony om ding hi. Hiai hun zatna C. Doungel, Ex-Minister in Chief Guest hihna toh uap in, David Hangshing, Social Worker; TS Haokip, Social Worker; Sanga Hmar, Social Worker leh Calvin Hatlang te Guest of Honour a pang in, Paujangam Haokip, Secy, KKL/GHQ in Functional President hihna toh hiai Closing Ceremony uap ding uhi. Hiai ding toh kisai in CDSA Official te’n tuni sunma dak 11:00 in amau Office Hiangtam Lamka ah Lamka pansan press/media-te kimuhpih in zingchiang program ding toh kisai pulakna nei ua, hiai closing ceremony pen tu 2012-13 seson a dia a tawpna pen hita ding ahihman in mipi kuapeuh in uap chiat ding in chialna bawl uhi. Tutung (L) T. Doulenmang Haokip Memorial 3rd Division League ah team 66 kihel ua, amaute group 13 a kikhe in league match kimawl ua, huai teng lak ah Lenruol Duilou Val, Bungmual FC, Taqchapa Utd. FC, Monglenphai YC, Red Ribbon Club, Molnom YC, S. Molcham Yc, Neihsial Veng YC, Kholmun YC, Angel’s Place FC, Dorcas Road Soccer, Kim Commissionrate FC leh Khengjang FC te’n Group Champion hihna la in kum nawn 2nd Division League a ding in dopsang in om ua, zingchang closing ceremony ah Neihsialveng YC leh Kholmun YC te 3rd Division League Champion hihna kituh ding uhi. Tuaban ah, final kimawlna zoh chiang in Sadar Hill District Champion banah Nagaland a dia tournament minthang mahmah Royal Cup a champion hihna la FC Khanglai leh CCpur District Champion M. Songgel YC te’n Exhibition Match nei ding uh hi’n thutut kingah hi.
Lamka khopi sung a hotel bawl te’n nek ding siangthoutak a zuakna ding uh leh government in food safety toh kisai dan hoihtak a bawl uh zuih ahih theihna ngimna in tuzingkal in Lamka Traders & Self Employed Association (LATSEA) te’n Lamka khopi sung ah hotel tuamtuamte nektheihna bawlna munte etkhiakna nei uhi. Hiai hun ah LATSEA pawl in hotel tuamtuam 7 phakual in a nektheih bawlna munte uh enkhia ua, hotel tamzawte nektheih bawlna buah mahmah ahihdan muhsuah ahih banah hotel neitu tamzaw in a nektheih zuakkhiak zohlouhte uh nitaklam a paihkhe zel uh hi’n gen mahle uh tuzingkal in leng nektheih lui zuak dia kiphoukhia tamtak muhkhiak in om hi. Tuaban ah, hotel tamzawte ah, a nektheih bawlna munte uleh a kuangsilna munte uh kinaih mahmah a, huai in a nektheih bawlte uh buahsak mahmah ding in gintak huai hi.