TUALSUNG THUTHANG:
**Manipur gamsung a post office tuamtuam omte vehkual a tulai a Manipur a taamlel Chief Post Master General, NE Circle P. Murthy, IPtS in tuni sunma dak 11:00 in CCpur Post Office hong pha in staff-te nasepdan hong enkhia hi. P. Murthy, Chief Post Master General ahihleh Imphal apan in Mangminthang, Director, Postal Service, Manipur Division leh official bangzah hiam in hon zui ua, dakkal 1 sung vel staff-te toh kithuahkhawmna a neih nung un sun dak 12:00 in Imphal ah kiksuk nawn uhi. Hiai hun ah Lamka pansan Press/Media te’n CCpur District in Postal Service toh kisai a haksatna tuamtuam a tuahte uh pulakna nei ua, Chief Post Master General in leng mipite a diak a sepna zong te’n haksatna a tuahte uh hoihtak a enkai ding ahihdan a gen banah, hiai toh kisai a haksatna tuak te’n a kinlam a head office ah complain bawl pahpah ding in theisak hi.

**Churachandpur District Disable Union (CDDU) saina in hongtung ding November 23, 2013 sunma dak 11:00 in KKL Complex, Headquarters Veng ah District Level International Disability Day zatna dan in Community Based Organization leh Lamka pansan Press/Media te a ding in Sensitization Workshop om ding hi. Hiai hun zatna ah Moderator in Gin Suanthang Guite, Vice President, CDDU pang ding a, T. Siammuanthang, President, CDDU in keynote address gen in Dr. Jaswanta Sapam, President, State Platform for Disabled Peoples Organization in tulel a vualphaloute dinmun pulakna nei ding a, vualphaloute neihsiah a aomna utoh kisai in houlimna om ding hi.

**Dr. Liangoumuan leh MSD, Imphal saina in tuni’n Grace Bible College ah GBC a kai student-te a ding in Hepatitis B & C Screening om hi. Hiai hun ah Imphal apan MSD Company a sem staff mi bangzah hiam hong paitou in vanzat bangkim hon potou ua, GBC a kai student-te a thawn in Hepatitis B & C test uhi. Thutut kingah dan in, tuni a Hepatitis B & C Screening neihna hun ah, GBC a kai student 150 val test in om ua, huai teng lak ah Hepatitis B vei mi 2 leh Hepatitis C vei mi 4 muhkhiak a om hi’n thutut kingah hi.

**Rural Women Upliftment Society (RWUS) in tuni sun dak 12:00 in RWUS Office ah Church’s Auxiliary Social Action (CASA) panpihna tungtawn a naupang tagah-genthei leh liangvai puansilh ding gina neiloute a dia puanthuah hong paite hawmkhiakna nei uhi. Thutut kingah dan in, hiai panpihna SMILE Project kichi tungtawn a Church’s Auxiliary Social Action (CASA) apan panpihna hong pai hi a, RWUS in mohpuakna la in, Women Organization tuamtuam te’n amau bialsung chiat ah hiaibang panpihna ngah thei dingte kaikhawm in, tuni a RWUS makaih a piakkhiakna program zat a om hi’n kigen hi. Pricilla Home, New Lamka apan in mi 23 in hiai panpihna tangkha in, Sangga Muon Inn a om naupang 24 leh Hmar Women Association, CCpur Joint Women Organization, Tuithaphai Women Development Program, Action for Women & Child Advancement (AWCA), WWUCDA/Kamdou Veng leh ICI Women Ministry apan mi 5 chiat in hiai puanthuah kihawmte tangkha ua, puanthuah hawmkhiak tengteng a vek in 77 pha hi. Hiai puanthuah hawmkhiakna program ahihleh Rev. Dr. JL Songate, Executive Secretary, ICI in uap in puanthuahte piakkhiakna nei hi.

**Singngat Sub Division huamsung a om Suangdoh khua ah hongtung ding Nov 27 & 28, 2013 in 2nd SSPP Suangdoh Block Meet-cum-Presidential Election 2013 om ding hi. Hiai program ahihleh Suangdoh Community Hall ah zat hiding a, Nov 27, 2013 nitak dak 6:00 in bialtu MDC G. Suanchinpau in 2nd SSPP Suangdoh Block Meet-cum- Presidential Election 2013 hongkhe ding a, Huai hun ah Kikhopna Uktu in M.Gouzamang Guite, EM/ADC hiding a, Khual zahtakhuai in Upa Dr G.Ginkholian, Chief of Suangdoh leh Zindeihthoh in Siamnunlian Valte, Exe Director VKTawna College hidign a, Election Commission saina in Presidential Election omding hi. Nov 28, 2013 zinglam dak 11:00 in mipi program omding a, Ginsuanhau, MLA (Singngat A/C) khuallian (Chief Guest) hidign hi. Kikhopna Uktu in Langkhanpau Guite, Chairman ADC/CCpur hiding a, Khualzahtakhuai in Upa Dr G.Chinkholian, Chief of Suangdoh, Lalrobul Fimate, SDO/Singnat leh Joseph Lalrothang, ZEO/CCpur hiding hi. Intekpa in Lianzapau Samte, President SSPP GHQ hiding a, Deihtuam Chial ah G.Suanchinpau, MDC leh M.Gouzamang Guite, EM/ADC hiding hi. Program hun ah Pastor L.Thang Guite, Area Pastor EBCC Suangdoh in student te thumsak ding a, Pastor T.Nanglian, Area Pastor PCI (R) Suangdoh in thumna in hun khak ding.

**CCPur District Sports Association (CDSA) saina a (L) T. Doulenmang Haokip Memorial District 3rd Division League kimawlna pailel ah tuni’n Pre-Quarter Final kimawlna om a, Kholmun YC, Angel’s Place FC, Taqchapa Unied FC, Bungmual FC leh Khengjang YC te’n vualzohna ngah in Quarter Final lut uhi. Tuzingkal in match 2 om a, match masapen ah Red Ribbon Club leh Kholmun YC kimawl in full time tan ah 1-1 a aki-drawn nung un Penalty ah Kholmun YC in 5-4 in vualzohna ngah ua, match 2na ah Angel’s Place FC in Bungmual YC 3-1 a zoukhia in Quarter-Final lut uhi. Sunnung lam match ah Taqchapa United FC leh Dorcas Road Soccer kimawl in Taqchapa Utd. FC in 2-0 in vualzohna ngah ua, Bungmual FC in 3-2 in Kim Commissiorate FC zoukhia in, Pre-Quarter match nanungpen ah Khengjang YC in 3-0 in Lenruol Duilo Val zoukhia in Quarter-final lut uhi. Quarter-final kimawlna ahihleh zingchiang in kipan ngal ding a, zingkal dak 6:30 in S. Molcham YC leh Molnom YC kimawl in, sun dak 12:30 in Kholmun YC leh Khengjang YC kimawl ding ua, sunnung dak 2:30 in Angel’s Place FC leh Bungmual FC kimawl in Quarter-final match teng zohsiang hiding hi.

XXXXXXXXXXX

GAMSUNG THUTHANG

**Investigation news chih a om Delhi pansan a kisuahkhia Tehelka weekly magazine a Editor-in-Chief Tarun Tejpal in a sepkhawmpih Journalist numei khat a luppih tungtang ah kha 6 sung nasem theilou ding a khawlsak in om hi.  Hiaitung tang ah, luppih a om numei in luppih a omna tungtang a phoulak nung a Tehelka in kha 6 sung lel a sepna apan a khawlsak uh lungkim louhthu taklang hi. Tehelka Editor Tarun Tejpal in leng Tehelka thuken tungtang ah numei nu lungkim lou ahihdan gen in, a thilhih a kisik mahmah hin gen hi. Tehelka Magazine a Managing Director Shoma Choudhary in ahihleh, Tehelka sungthu ahi chin thuthaksai dangte dotna dawng gina nuamlou hin kigen hi. Tehelka Editor gamtatna ziak a amah leh amah thukhenna a kibawl tungtang ah  National Commission for Women in lungkim louhthu taklang ngal uh a, mawkmai a koihdap louding uh ahihdan genkawm in suizui neih hiding chin Nirmala Samant in gen hi. Thiltung toh kisai in Journalist numei in a seppih Tehelka Chief Editor toh Goa a zinkhawm hun ua thiltung hin gen a, ka pa vual ahihban ah ka utlouh nung in leng hon phutluih teitei a mi theihding ka lauhman in utlou sasa in ka kipolh pih chin gen a, tulel in leng lunggim mahmah a omlel ahihdan gen in, Tehelka in tua thubuai toh kisai suizui ding a sep khiak uh poimoh in, dan dungzui a action a lakkhum ding uh ahi chi’n pang hi.

**Ni 2 paita a Bangalore khopi sung a ATM booth khat a Municipal Corporation a Manager lenlel numei kum 44 a upa khat meltheihlouh pasal khat in thagum a a sumbawm leh a sung a Credit Card bangzahhiam toh Mobile phone zatlai a laksak nung in Bangalore Police in misuamtu matkhiak sawm in team 8 a kikhen in Police in mun tuamtuam dapkual lel uhi. Suam a om kum 44 a upa numei ahihleh  Jyothi Uday hidan a gen hi a, suamhat in a taisan dek kuan a a lu a khetna nasa in Hospital ah etkol in omlel lai hi. A lu zang a a khetna nasa mahmah a, a nak lak leng liam in a taksa pum kimkhat taklampang tang theilou hin amah kemtu doctor ten gen uhi.  Thiltun hun ahihleh zinglam dak 7:10 vel hi a, huai hun in security kuamah muhding omlouh ziak a tuabang a thuakkha hidan a gen ahih ban ah, thiltunna ATM neitu bank in leng tunung a ATM a koihna tengteng uah vengtu security koih ding in thupuan bawl ngal uhi.  Karnataka Home Minister KJ George in leng thiltung toh kisai in khutkhatu matkhiak pah ahih lam etthu gen in, tunung in ATM omna mun teng ah ventu koihvek hiding in thuchjiam bawl hi.

**Hongtungding November 25 a Mizoram state a State assembly election om ding toh kisai a, Mizoram state sung a Saptuam pawl tuamtuam leh NGO khenkhat kigawm te’n candidate leh voter te a ding a zuihding dan a bawl uh sep zuina in khauhtak in tuni apan duty kipanta uhi. Kitelna toh kisai a candidate te zuihding in apaisa November 9 apan saptuam pawlpi kigawmte’n pek 4 a sah Danbu ana bawlkheta uhi. Saptuam pawlpi leh NGO tuamtuam kigawmte bel Mizoram People's Forum (MPF) chih kiminvuah uh a, kitelna omding ziak a 2006 kum a phuhkhiak a om ahih ban uah, zan zek in leng a paidan uh khauhsak thak in Mizoram state sung a political party tuamtuam te toh zuihding Dan toh kisai in kilemna MoU point 27 suai kaihpih uhi. MPF deihdan ahihleh, Mizoram state sung a Party peuhmah in helpawl a kaihlut louh ding uh, kitelna siangthopu tak a neihding, sum le pai thahatna toh vote zonlouhding chihte tel in kilemna suai kaihpih uh hin kigen hi.  November 25 chiang in Mizoram ah assembly elections neih in om ding a, Congress Vice President Rahul Gandhi inleng tukal tawplam chiang in Mizoram veh ding chih ahi. Kiginni in Prime Minister Manmohan Singh in Aizawl khopi ah Congress party ading in vote campaign thupitak nei a, kintak a Mizoram in khantouhna leh masawnna angah theihna ding a UPA government in policy leh programme tuamtuam apaipihte’n gah kipahhuaitak tun ahihdan gen hi. Sum-leh-pai dinmun toh kisai in Mizoram in khanna thupitak ngah chi’n phat mahmah hi.

**Cyclone Phailin in Andhra Pradest state sung ni tamlou paita a nawk nung in, zan in Indian Meteorological Department in Bay of Bengal tuipi apan huihpi leh vuahpi kithuah in Andhra Pradesh nawk nawn theidia kilang ahihdan a muhkhiak nung un huai kiim a teengte mun bitzaw ah hepkhiakna nasatak in neih in om hi. Mun bitzaw zuan a tuahkhiak a om ahihleh Andhra Pradesh state sung a District 4 huamsung a tengte hideuh a gen hi ua,  Cyclone Helen in a nak nawk khak diakna mun dia gen a om ahihleh,  Sriharikota leh Ongole munte hi ua, cyclone ziak a si leh liam omlouhna ding ngimna in State solkal in bildoh mahmah in mipite kiang ah tuipi zul a kuamah pailou ding a theisak in, nidang a huihpi om hun a kibukna ding a kibawl mun 350 te ah mipite nawnlut in omlel uhi.  Cyclone apan bitna dia kibawl 350 lak ah  137 te bawlthakna nasep pailel lai mahleh zat mai ngai hin National Disaster Management Authority in gen a, kithuzak tuahna leh kikawm tuahnayte a siat hun a leng zat theih ding in State solkal in vanzat tuamtuam kigingsa in koihta hi.  Nellore, Prakashan, Guntur leh Krishna munte a huihpi dakkal khat in km 150 a hat a nung ding chih ziak in huai munt e ah patauhna liandiak hin leng thusuak om hi.

**Apaisa August 14 a Bombay longkhawlna kiang a India Navy te zat kidouna long submarine INS Sindhurakshak a tumna thu ah Defence Minister AK Antony in Navy te pilvan louh ziak hin ngohna tunin bawl hi. INS Sindhurakshak a tum hun in longpi sung a galvan koihkna mun lenmg puakzak hin kigen hi. Defence Minister in a genna ah maban ah gamsung a gou manpha I neihte kepna lamah nak zawsem a pilvang ding in Navy commander te thuhilh a, INS Sindhurakshak a tuahsiat hun a longpi a sem tuailai laisiam taktak 18 toh a sihkhawmna in maban a pilvang na ding thuhilhna hoihtak hon pia ahi chin gen hi Tulel in tuinuai a tummang Submarine kaihkhiak sawm in pan nasatak a lak in omlel a, tuitung a kaihkhiak ahihna ding in ni 200 vel lutlai ding hin thusuak in gen hi.  Defence Minister in bel  SoPs (Standard Operating Procedures) omsa zuihlouh ziak a tuahsia hidan in Navy te ngoh a, suina nasatak neih hilai ding hin Minister in gen hi.

xxxxxxxxxxxxxxxxxxxxxxxxxxxxxx

GAMDANG THUTHANG

**Paris khopi sung a Newspaper office khat rifle zang a bankaptu Police in mankheta

**Ni 3 paita a France gamsung a Paris khopi a meltheihlouh pasal khat in rifle zang a newspaper office khat  a ban kapna tungtang ah, Paris Police in naktak a matding a a nungzuih nung un zan in Paris khopi sung mah ah mankheta uhi. Police in thiltung om nung in thaukhahtu mat ahihtheihna ding in a lemlak tanpha kholak ah thehzak in, a mukha omleh thuzak theihna ding phone no. tanpha taklang uhi. Zan in police in thuguk a zak dungzui un leinuai a lampi ah a car toh man uh a, mat a om ahihleh 1998 kum a tualthahna ziak a Jail a khum a om ngei Abdelhakim Dekhar hidan a gen hi a, a lemlak tanpha Police in a hah thehzak luat ziak ua laugawp in om a Police in a mat hun un leng thudot theih taktak in omlou chin Police thupuangtu’n gen hi. Mat a om Dekhar ahihleh, 1994 kum in Florence Rey leh a ngaihzawngnu Audry Maupin kaplupna ban ah, Police 3 leh taxi driver khat kaplupna toh kisai a kum 4 jail tangdia thutankhum a omsa hidan a gen in om hi. Ni 3 paisa a French newspaper office khat a thau a khahna ah leng Photographer Journalist khat in liamna tuahloh in, himahleh a dinmun in hoihlam nawt mahmah ta hin kigen hi.  

**Iran supreme leader Ayatollah Ali Khamenei in zan in, Iran tuailai te kiang ah  tulel a khovel gamte toh Iran nuclear thu a kihouna omlel toh kisai pulak in, Iran in "nuclear rights" a neih pen a mawkmai a gamdangte suhsak hilou ding chi hi. Zan zek in leng Iran Nuclear tungtang ah Germany tel in UN security council a tel gam 5 ten kihouna nei mahle uh lohsam in, tunung a neihding in thupuk uhi. Ayatollah Ali Basij force a Commander Ayatollah Ali Khamenei in bel gamdang ten Iran nuclear tung a thuneih a zatkhum sawm uh ngai theilou bilbel hin gen a, Iran in nuclear galvan neihtheihna nuclear rights a neih pen humbitna ding ahihnak leh taise ngeilou ding hin gen hi. Tulel in Iran in nuclear galvan bawlsawm chih ziak in Iran tung ah Economic sanction puankhum in omlel a, kihouna om nawn hun a Iran tungtang a kilemna omtheih leh Sanction kikoih lel leng hih niam sak zrek hiding hin thusuak om hi. Tuni tan in United nation nuai a om IAEA in bel  Iran President dia Hassan Rouhani a chin nung, nuclear galvan bawlna ding a poimoh mahmah Uranium kaihkhawmna ah Iran nasep ze ol mahmah hin taklang uhi.

**Syria kidouna paizel kal ah, rebel pawl in a panmun uh tamtak solkal sepaihte khut a a khahsuah nung un paidan dang khat pankhia in suicide bomber lampang mitsuan lel in, zan in leng Qalamoun mun a Syria sepaihte omna mun lak a bomb 4 hihpuak ahihna ah sepaih 7 in sihloh uhi. Zan a puahzaksak a om bomb ahihleh Car pansan a puahzak sak hi a, Qara mun a rebel pawlte panmun Syria solkal sepaihte’n a luhkhiak nung ua thukkik na dan a Damascus mallam pang a om Qalamoun bial a sepaihte omna mun khoih a om hin kigen hi. Bomb puak toh kisai in Islamic State of Iraq and the Levant (ISIL) leh  Al-Nusra Front te’n amau khutnung hidan in puang zui ngal uh a, checkpoint mun a car khat muanmoh huai sa a sepaih duty ten a va velna lam ua sihloh uh hin security thusuak om hi. Tulel in Hezbollah helte huhna toh Syria solkal sepaihte’n  Qalamoun mun a rebel omte hawlkhiak sawm in naktak in beihpi suahlel uh a, Damascus leh Homs kikawmtuahna kituh in nasak tak in kikaptuah lel uhi. Tuni tan in, Syria buaina ziak in, hinna 120,000 val mangthangta hidan a gen hi a, tamtak Syria gamsung a om ngamlou in galtai hunkhop om uh hin leng kigen hi.

**Afghhanistan a singtangmi kipawl khawm Tribal leader tuamtuam te kigawmna Grand council in kum a US in Afghanistan a pawtsan sawm toh kiton a, bangchi dinmun a omlel uh hiam chihte tel in ni 3 sung dasihding kihouna tuni neipan uhi. Afghanistan khopi Kabul a Grand council pawl kihou khawmna hun ah singtangmi makai 2500 val kihel uh a, huai hun ah US in kumnawn a a sepaihte Afghan apan zukkhiak a sawm toh kiton a US in zuksiang sipsip ding hia ahihkeileh sepaih bangzah koihlai ding chihte kikum khawm ding uh hin kigen hi. Hiai kikhopna bel US leh tulel a Afghan solkal vaihawmtu te’n security pact chikhat neihding chia thupuk na  a bawlnung ua hong piang khia hidan a gen ahihban ah, solkal nihte’n Bilateral Security Agreement (BSA) a kilemna a neihte uh President Hamid Karzai in Afghan Parliament a lemsakna suai a kaihma ngei a, Afghan mipite a ding a siatna hon tun thei hiam chih thu suizuina leng hikawm ding hin kigen hi. Security Pact toh kisai in Afghan vaihawmna inpi a paisuak sak ahihleh, US in Afghanistan gamsung ah migilou man theiding a, huai kia hilou in a tyungtang uah thukhenna tanpha neithei ding uh chih hin kigen hi.

xxxxxxxxxxxxxxxxxxxxxxxxxxxxxxxxxxx