Hornbill Cable Network in Manipur leh North-East pumpi adinga amasapen dingin tuni January 15,2013 nitaklam 3:00pm in HORNBILL Complex (Thawngzathang Enclave) Mission Road, Hiangtam Lamka ah "HORNBILL GOES DIGITAL" Launching and inauguration kichi program thupitak in zang uhi. Ngaihnattuam a chial akihih bangin ZOGAM.COM admin ten leng va ki uap hi.
Hiai hun zatna ah Presider in H.Thawngkhanlian pang in Chief Guest in Pu Phungzathang Tonsing, Hon’ble Minister (Health & Family Welfare, GAD,CADA) pang hi. Rev. L. Khamkholun, Director of Missions EBC in Pathian kianga latna leh kipahthugenna nei hi. Pu Mangpu Tonsing, proprietor Hornbill Cable Network in short speech, Cable Network toh kisai hong kipatdan leh analogue akipan tu a digitalized hong suahkhiak dan tomkimtak in genna nei hi. Akallak in Mamboih te unau leh Tabitha home naupang te akipan Pathian phatna la ngaihkhiakna leng omzel in tuazoh in Upa LT Juan Tonsing in hunkhakna thumna nei hi.
Hiai hun zatna ah Churachandpur SP Pu Mangkhogin Haokip, Pu LV Tunglut OC Churachandpur Police, Pu Thangkhosuanmung Hiangtam Lamka Hausa, Pu C.Hangsing, Pu S. Kamsuanlun MDC, leh milian tuamtuam hunkhoptak leng kihel in, Lamka pansan niteng tanchinbu leh ZOGAM.COM banah Cable News tuamtuam teng leng uap uhi.
Program zoh in kithuahkhawmna leh annekkhawmna leng neingal uhi.