Mumbai Zomi Christian Fellowship in August 18, 2012 (Kiginni) dak 2:30 PM apat in Janssen Hall, Holy Spirit Hospital premises, Mahakali Caves Road, Sher-E-Punjab, Andheri (E), Mumbai ah "Khopi a Nundan Kilawm" chih thupi a nei in Freshers' Meet vaiveng tak in zangkhinta.
A nuai a program kizat sung in lasiam tuamtuam Ng. Lunniang, Ng. Grace Vuvung, Tv. Kevin Zou, Tv. Thangnou, Tv Thianshyam, etc. te apat in la ngaihnop huai taktak a vangkim in kingaikhia hi. Hiai hun ah Mumbai a siamsinna sunzom di leh sepna join thak dia hong kuan freshers 30 val hong kihel thei uhi.
REPORT TOMKIM
I biak Pasian hoih mah ahiding a, singzung-suangzung bia a, dawi-leh-kau bia a, neektawm zong a khosate himah lehang tuni chiang in India genlouh leitung bup khopi tampi ah Zomite i-omta hi. India adia financial capital, khopi thupi mahmah ahih ban a filmstarte khopi Mumbai bang ah Zomite a kitam mahmahta hi. Lamkai masate’n maban saupi mukawm in Mumbai Zomi Christian Fellowship (MZCF) chih minvoh in, Zomite kipawl khawmna anapan ua, tuni tan in member tampi pawtkheta mahleh atamzawsem ahong lutjel hi.
Biak inn kikhop bang nidang a BII INN neuchik a Pasian phat khawm, lamkhawm, Bible simkhawm etc., chihkhawng a i omlai mah uh bang in ka lim thei mahmah ua, Lamka a building lian pipi a KHA POLHLOUH lah hilou, kikhop nuamlou simsim bangdan in ka om ngeikei uhi. Officer lian taktak kaneihte bang un zu-leh-sa leh mahni nopsakna ding geellou in, mipihte ding in pan nasatak in ala ua, kiletsakna, ki ngengkhai sakna chihte himhim muhding a aneikei uhi.
Huchi kawmkal ah 18th August ni in kou atungthakte ‘loplutna’ Janssen Hall, Holy Spirit Hospital Premises, Andheri East, Mumbai ah “KHOPI A NUNDAN KILAWM” chih thupi zang in, ahong neihpih uhi. Hall thupitak (AC om zawmah!), vanzat kiningchingtak ahihziak in aman bang le atam ding ka gingta hi. Himahleh kou MAITHAKte ahon khualna un sum-leh-pai, tha-leh-zung ban ah Mumbai a manpha diak petmah HUN tampi asen uh poisalou in, program pai dingdan bangkim feltak in a bawl uhi.
Nu Ngaihbawi in hunpatna thumna ahong nei a, huaizoh Conductor Lia Lunching Guite in program ahong pat pihta hi. Pu Lalhmangaih Hauzel in vaidawnna khumtak, kamsiam leh kamnemtak in ahong nei hiauhiau a, kou fresherste bang a omsate sang mah a inntekzaw ka bang pah uhi. Sepna lian leh detdoutak neite lak ah kou Mumbai tungjou changchangte bang ka nakdan uh ahong hisim huai a, nuamsalou kichiding ka omlouh ban uah Mumbai pailouh khak ding bang alauhhuai abangta hi. Huaikia hilou in Pa Muanding in hampha i hihdan leh theihdia kilawm tuamtuam ahong genbeh lai hi.
Zomite lak a thugensiam (society, development leh secular lam deuh) leh Zogam.com Columnist Pu Dr. Ginlianlal Buhril in “THE DYNAMICS OF UNLEARNING, LEARNING AND RELEARNING” chih tomkim leh chiangtak in ahong gen hi. A thugen, university khawng a gending hileh amantam mahdi! A diak in athugente lak a hon khoih mahmah khat tuh “Our social networking is ill-advised and limited. Our thought process and outlook are not broadened and enlightened enough. We are a community that simply learn little” ahong chih toihtoih chuh mahni kimuh pailet in a om vungvung mai.
A kallak ah lasiam minthang taktak………… tekhawng in la ahong awi ngelhngelh ua, tutmun bang a kilok (alam chuh hihial samlou) ka tam mahmah ding uh ka gingta. Vengsung neuchik a tuailai lapawl zilding natawm kuamah akiman omlouh kal ah, Mumbai ZCF CHOIR bang ana om hi. Bang hun a azil uh chihle theihlouh, ahong sakhia ua, studio a khum kikhah toh kateh hi. Keichuh ‘nuamna leh lamdang sakna’ in ka dim a, sumseng jen a zil ahih dingdan uleh asiamna uh thupi ka sa mahmah hi. Lamka khawng a saptuam khawmpi omdek chia kha bangzah hiam zilte’n atuk himhim kei ding uh ka chi phial hi.
Huai kawmkawm in Tg. Thangsuanhau Phiamphu leh Lia Kimmuanching in kou amai thak deuhte (freshers) pulakna siamtak in ahon nei ua, kei ngial in houh zumding lambang ka na mangngilh man zezen hi. Aziak tuh- khotualte (MZCF) mibawldan siamlua unchin, khotual in ka na kikoih khaman laizang hi. Min, sepna, omna leh kipatna khua chauh gending i sak aleh, kare! Ana hilou. Dotna bawm ana om, huai a kigelh topic toh kisai tomchik gen ngaijel. Bangziak a mithakte hichidan a gawtbawl mawk uh ale chihbang ka na ngaihtuah hi. Himahleh atup pentak uh, inntek pan pah ding, Mr & Miss Fresher teelna adia process ana hitajel. Singtang deuh a kiphaijangsak kou pawl in katheisiam man kei uhi. Introduction ka zoh uh toh kiton in Pastor Robert K. Samte in Pasian kiang a thumsakna a honnei a, huchiin ka tutna chiat uah ka tuthei pan uhi.
Mr. & Miss Fresher chuh nathei ut uh maw? Anuailam ah.
Pa Thangzamuan Hauzel in “WHO IS A SUCCESSFUL PERSON ?” chih topic pansan in houlimna ahong nei a, eilam a lohching i chihte toh a kibatlouhna tampi om in kathei hi. Eilam a zaw sumhaute, sepna leijoute mi lohching himawk a maw! Huaiban ah lohchinna dia GOAL neih a poimoh dan a hong gen sawnsawn hi. “Nidang in Lamka ah bike nei mi 2/3 khawng kia a om uh. Hohna ding lah neilou, lampi a atai chiang ua lah a kin a kin, huaimun ka va pha dia, ka taihat kei aleh tung manlou ding ka hi chih lah hilou………..” chi in tupna kichian neiloute hindan aphattuam louhna a hong gen hi. Huai banah “Puteek khat rail ah atuang a, ticket checkte ahong pai tak in a ticket mujoulou in a buai mahmah. ‘Pu, poikei, hichi mai heh’ ticket check pan a chih a leh Putek in ‘Hilou ahi, ka tunnading ka ticket a kigelh ahi. Huai a omkei leh ka tunnading theilou ding ka hi’ chi’n adawng hi” chi in agen hi. Hiai gentehna in mihing tupna nei, a lampi bangle tawnkha,himahleh tun dingdan theiloute omdan a hong genchiang mahmah hi.
Piching ngen omkhawm ka kisak lai in SUNDAY SCHOOL naupangte’n hun a hongla ua, choreography hoihtak, amau utzawng chiat in a hongbawl uhi. Naupangte thalawpdan mipin a kimuh tak in, kipahna a dimleet gawp in khut ka beng ging zuazua uhi. Huailaitak inzaw kua Pangal, kua North East buai ka theikha se kei uh, vangam loubuang ding in ka tai mahmah uhi.
Huaiban ah Pu T. Roumuan Paite in “UNDERSTANDING CHURCH & SOCIAL RESPONSIBILITY” chih nouneel tak in ahong suut diudeu hi. Vaite lak a ‘sweet trap’ a tam dan, kicheidan kilawm a poimoh dan, nasem ding i hih a leh nasep ding dan, laisim dia hongkuan i hih a leh laisim ding dan chiangtak in ahong gen hi. Pu Roumuan gendan mah bang in eimite zaw “This is my personal life” chih i tamsak ua, atawpna ah ei vangtahna asuah ban ah chipih-sapihte buaina asuak ut mahmah hi. Puan leijoulou lah hilou, bangchi dan hiam a mit-hiip zawng ding a kicheidan bang i siam ua, himahleh i hong kipatna – mi inn neuchik luah, means of transport i zat lah local train leh auto chihkhawng a kituakkei petmah hi. Vaite khawng hichidan a a kichei hiam, film khawng a akichei ualeh a hong kipatna inn uh amau a ahihban ah a inn pawlam sangmah a a sung thupizaw, pawtphet driver khat in AC car khat a tonpih, ahohna dingte bang uleng mi hausa leh milian ngen ahi uhi. Eikhawng huchidan a i kicheina di’n i monthly income, family life etc in a zil nai mahmahkei hi. Laisim dia kuan in a poimohpen table neilou, nasemdia kuan in semthei lah hilou, semtheilou lah hilou khawng a om apoidan Pu Roumuan in CHINTUIGUH SUNKHA hial in a hong gen hi. Kei hong genna mah hiale chih in a om kiaukuau!
Refreshment lampang bel kei leh VL Mangzou duhdan ahikei. Kouzaw SINGNGAT SPECIAL mah ka duh ua, himahleh Mumbai lamkhawng ah Cold Drinks mah uh a thangsak uhi. Duhlou himahleng khotualte (ana omsate) mi 5 khawng dawnzah di khawng ka dawn-gai thou ding in ka gingta!
Hun tomchik paipan ka saklai in session masa tawp ana hunta a, Pu Pumzamang Simte in hamteina nei in, 1st session ka khak phot uhi.
Huaizoh in singspiration phur deuh mai leh hot deuh mai in ka pan nawn ua, Pu Ginkhotuan Guite in Pasian kiang a thumna in hun a hong patsak hi.
Amasapen in Pu Thanglianmung Tonsing Moderator hihna nuai ah KINIALNA HUAISIA (Debate) pat ahingal mai hi. Random selection in a omsate leh freshers (hinonlou?) helkhawm in “Khopi a imi-isa (Zomite) omdan kilawmloute tung ah action lak ahoih hi” chih pansan in ka hong kinialta toihtoih uhi. Gendan tuamchiat, pansan tuamchiat in ka hong kibei ua, kei bangle innpi ngaihdan gum pawl in ka va teltei hi.
Comperes a pang Tg. Damsuanmang leh Lia Angela Rothlamuan in skit lah hiloudeuh bawlkawm, program zeek lah hikawm in mipite ahong sulim petmah uhi.
Program paidan detail report Lia Nianggousiam leh Lia Esther Suantak apan ana ngakmai unla, Prize hawmna lam kongen tadi.
1. Final result ahong puankhiat un facebook a regular chihtak mah chu BEST DEBATOR (Mover) in kava pangpah a (FB ziak le adiam ah!), BEST DEBATOR (Opposer) lam ah Pu T. Roumuan Paite apang hi. Overall ah kou punishment deih pawl in ka jou dimdem uhi.
2. Tang Duangzen thak (Mr. Fresher 2012) title Mr. Suanlyan Tungnung khuksak ahi a, Lia Duangkuai thak (Miss Fresher 2012) title in Miss Melody Guite khuksak ahi.
Program khakna leh annkuang thumna neiding in Pa Joshua L Singson, Adviser-MZCF in thumna nei in hun khak ahita.
Theih maimai a vallou:
1. Freshers meet ka neihna uah annkham ka tam mahmah ua, himahleh ZU kham ka omkei uh. Freshers meet hiam function khat peuh ZU omlou a le nuamtak a bawltheih ahi.
2. Mr & Miss Title melhoihte chauh adia bawl ahikei, ahoih velvulloute’n le laktheih tham ahi.
3. Officer hiam Company khat khawng a mohpuakna neihziak a hun-awl neihlouh teitei ding chihna ahikei. Poimoh i sak aleh hun piaktheih luat ahi.
4. Officer hihziak a annkam limna bawl teitei, party dan a function paipih teitei ding ahi tuankei. Ka lamkaite uapan in midangte bang in a na zil le uh ka ut mahmah. Pasian thu mah toh mipite ahon piikhawm ziak un thilbangkim ah ka muang ua, kipahna ahong tun uhi.
5. Laisiam ziak, pil ziak leh letziak a thugensiamna om ahikei. Lungsim taktak toh deihsakna taktak a thu kigente mipite’n a kimuang a, zuih theih ahihdan a kitheisiam pah hi. Lungsim akhoih mahmah.
6. Ka freshers meet uh lohchinna program zatjoh leh saneek ahikei, CHRISTIAN INNKUAN bang a ka kingaihnatna uh ahizaw.
-Suanlyan Tungnung |20082012
(with input and pics from Muanding Guite)
