A 67 veina Zomi Namni -cum- Mithun Festival 2015, 20th february 2015 zinglam dak 7 akipan Lamka khopi sung ah thupitak in zat in om hi. Zingkal dak 7 in Zomi Innpi honna leh Flag kaihpalhna ZC Veng New Lamka ah zat in om hi. Report tomkim hiah sim theih http://zogam.com/news/zogam-com-news-service/2961-zomi-innpi-honna-leh-flag-kaihpalhna-neih-in-om.html

Zingkal dak 10:30 in YPA Hall, Hiangtam Lamka ah Zomi Nam Ni lopna program sai in om a, tua zoh in nitaklam dak 3 vel in Public Ground ah Zomi Nam Ni Football Final kimawlna neih in om hi.

Zomi Nam Ni program mi tampi in a uap theihna dingin Lamka ah dawr teng dak 12pm tan khak sak hi a, traffic a nawnkai louh nangin Traffic Police te na hoihtak in sem  ua, pahtak huai mahmah uhi. YPA Hall, Hiangtam Lamka ah Zomi Nam Ni lopna program zatna ah Chief Guest in Ex-Chief Minister, Pu Rishang Keishing pang a, Chief Host in Pu Thang Lian Pau, President, Zomi Re-unification Organisation pang a, Nam Ni Pa in Pu P.S Haokip, President, Kuki National Organisation, Hqtrs leh  Functional President in Pu Phungzathang Tonsing, Hon’ble Minister, (Health & FW/GAD, CADA) pang uhi. Guest of Honours in Pu Thangso Baite, Hon’ble MP, Pu Vungzagin Valte, Hon’ble Parliamentary Secretary & MLA banah heutu tuamtuam te paikhawm uh hi.  

KNO leh UPF makai tam takin Zomi Nam Ni hong uap te kiang ah Organising Committee in zahtakna etsakna in Zomi Nam Puan pia uh a, Guest tuamtuam te kiang ah sing a ki bawl Sial lem pia uhi. Chief Guest, Pu Rishang Keishing in a gen na ah hun paisa a singtangmi laka kitheihsiam louhna tuamtuam om mahleh, Jesu Khrist itna ziakin tuni chiang a kituahna in Manipur ah vaihawm theita chi hi. 
FOOTBALL FINAL:
67th Zomi Nam Ni football final match Lenlai Club leh Lamka Sporting Club ki mawlna kua peuhmah in en ut in ngaklah chiat ua, nitaklam daak 1:00 lak akipan ground kimvel ah mipi dim sim tamai hi. Mun nuam deuh deihte kuan baih ahih chiang ua, dak 2 laka ground kimvel in mipi dim phitphet himai ta hi. Public Ground tutna di mun a lem tan louh ziakin, mipi tam khop singkung khong leh a kim a intung khong a kipan kimawl en dingin tu phengphung uhi. Heutu lam ten football en te tutna di gallery ground kimvel a koih di dan a ngaihtuah meng uh poimoh sakna su lian mahmah hi.Mipi ten kimawl kipatdi ngak in tum dim mitmet ua, himahleh YPA Hall a program a bei nai louh ziak un, football pek pen kipan thei lou hi. Dak 2 leh a kim vel in  YPA Hall lam  a te hong man tak phet un ki mawl ding players te hong ki lang ta uhi- mipi football peksiam leh thahat te muak in mau vengvung mai uhi. Huchi in mipoimoh tampi leh makai te toh player ten photo session hon nei zoh un, dak 3:20pm vel in match taktak kipan thei ta hi. Hun ki bichilh ziakin 90 minutes kimawlna di hun pen 70 minutes (35-35) play time dingin vaihawm ten hon khek uhi. Overall in match pen nuam mahmah a - first half in LSC te'n chance neih hoihzaw hi a theih in om hi. Tamvei pi chance lost ua, 3vei bang lost dan uhi. Huchi in 1st half bel 0-0 in hong ki draw uhi.

Break sung hun lemchang a la in heutu ten hun deih tawk in hon la ua, mipi lam in ning gawp ua theih in om hi. Break sung a program pen hong sawt luat phet in, mipi kikou husa te akipan kimawl kipat deih ahih dan uh theihtheih hi. Sawt break luat ziakin players te bang votsa in hong ding khe top ua, minute 15 bang practice hon nei mai uhi.

Second half hong kipat in khua mialsim ta a, play bel nuam mahmah hi. Team tegel a kipan player te fit thei mahmah uhi. Second half kipat zoh 10 mins lakvel in Lenlai keeper in goal nih hoihtak in hon save hi. Goal bar khalou deuh a nih save khia a - hiai a kipan LSC te winning chance bei bangtuk hong hi sim hi. Tua zoh in Lenlai ten tha hon ngah ua, hon neh deuhdeuh ua, himahleh goal khum haksa sa deuh ua, khum pah thei lou uh hi. Huchi in Lenlai ten free kick hon mu ua, huai ah goal hon khum uhi. Huchi in LSC ten goal din kik zou lou ua, hun hong bei a, Lenlai Club ten vualzohna hon la uhi. Lenlai Club ten winner hihna in Rs.1 lakh leh Sial khat tang ua, Lamka Sports Club in Sial khat leh Rs.50,000 la uhi.

Zomi Nam Ni YPA Hall Photo Gallery: https://www.facebook.com/media/set/?set=oa.809325902486852&type=1
Zomi Nam Ni Football Final Photo Gallery: https://www.facebook.com/media/set/?set=oa.809532242466218&type=1