MESSAGE FROM ADMINS
ZOPA leh Zogam.com 11th Anniversary zang dia hong hawh tengteng amasa pen in Zogam.com min in chibai! Zogam.com in kum 11 mel mu thei ding a om man in kipah huai i sa a, Pathian kiang ah thupina teng i pia ahi.
2008 Kum in Zogam.com Writers Award ana ki sai a, 2010 in Dr. T. Ginkam Zogam.com Writing Competition Award zong ana kisai hi. Tutung in a tuam deuh i gam leh i society sung a nasem hoih leh vual tungtuang te pahtawina dingin Zogam.com Person of the Year Award (ZOPA) sai hoih kisa hi. ZOPA tungtawn a na hoih sep i gam sung a nasataka encouraged leh motivated a hong hih i lamen a, a hoih lam a ki elna a hong saan lamet ahi. Hu chi in tu kum bul January in nomination sapna ki bawl a, response hoih tak ki mu hi. Nomination 9 akipan Jury Member ten Top 4 hon tel khia ua, tua te mipi leh jury ten february kha sungin a hoih pen di hon tel khia uhi.
Ei singtangmi sung a voting kisai na te a Jury voting system leh transparency om masakna pen ZOPA hi a theih ahi. A hoih pen deihna ziakin Public SMS voting pen 60% weightage ki pia a, Jury vote pen 40% ki hi sak hi. A fair thei pen deihna in Jury member te, independent observer khat leh member te mai a ngentel tak a vote sim in om hi.
ZOPA 2013 winner Pu C.T. Lian ka congratulate ua, i society a dia thil pha tuam leh thilthak mailam ah hon puak lut beh i lamen ahi. Top Nominees dang te Pu Pauzagin Tonsing, Pu Kamminthang Guite leh Pu Thangboi Singto te ngaihsan huai leh phat huai i sa mahmah ua, amau line chiat uah winner ahi uh.
ZOPA 2013 sai theih na dingin fund leh human resources poimoh hi. ZOPA 2013 sai theih na dia mahni lawh khiat sum hon thawh khawm te thupi ka sa ua, Pathian in amau ki piakzawhna te a leh tamzaw a vualzawl dingin i ngen ahi. Zogam.com in i politicians te leh beauracrats te panpihna ngen lou in member te funding tungtawn in tutan ki tou delh thei lai a, member te’n na hon phungvuhna uh thupi kasa uhi. ZOPA 2013 lawhching taka hon et kai pih a diak a Jury member teng tung ah kipahthu ka gen ua, ngaihdan hoih taktak hon share te, tha leh zung a pang te leh vote khe tengteng tung ah kipahthu ka gen uh ahi. Mailam a noute panpihna ka poimoh gige ua, i pangkhawm ding ua, i sem khe zel ding uh.
Khovel pumpi a om Zomi te ki thuzak tuah theih na ding leh platform khat a din theihna, Zomi te kaikhawm tu - Bridging the Zomis chih thupi ngiim na in 9 March 2003 in New Delhi ah Zogam.com ana ki pan khia hi. Mawl chik a ki pan khia hi mahleh tu in ei Zomi sung chih taklouh nam tuamtuam te lak a website lian pen pawl leh kisak theih pih tham hong hi ta hi.
Zogam.com in kum 11 mel a muh theihna ziak Pathian ompihna ahi a, tua banah khawl lou a member te panpihna leh support te ziak ahi. Member te leh Pathian tung ah kipah thu gen kawm in hiai message ka khin uh ahi.
Zogam.com damsawt hen!
Admin teng sik le taang in,
Pu Ginza Vualzong,
Founder and Admin,
ZOGAM.COM | Bridging The Zomis.