THEIHSAKNA LEH CHIALNA
Dated: The 15th August 2013

One Day Political Awareness Programme Rengkai Community Hall Ah Om Diing

August 19, 2013 – daak 11:00 AM in Rengkai Community Hall ah Public Consultative Meeting Programme, Hill Peoples’ Forum-Manipur (HPF-M) makaihna nuai ah thupitak om diing hi. Nam makai tuamtuam leh heutu tamtak hiai hun ah kihel diing uh ahi chih HPF-M Chairman, Dr. R. Sanga akipan thutut kingah hi. Pu K. Guite leh Dr. John Pulamte - Resource Persons a pang in India Daan Bupi, Art. 244A Tribals-te a di’a phattuamna mipite mai a apulaak uh baan ah, athutun leh omzia hilhchetna nei diing uhi. Hiai, “One Day Political Awareness Programme” hun a Commentators-te lak a khat, Pu K. Vungzamawi in zong thugenna hun poimohtak nei diing hi.

Zomi Council, Kuki Inpi, Hmar Inpui, Mizo Peoples Convention leh Frontal Organizations tuamtuam a makaitute baan ah NGOs a heutute leh Students Organization a heutu muan tamtak hiai, One Day Political Awareness Programme ah kihel diing uhi. Hill Peoples’ Forum-Manipur, Churachandpur District Committee zong hiai hun ah phuankhiak hi diing a, mailam hun ah Singtang mite a diing a adetdou Socio-Economic dinmun kiptak aom theihna diing leh Pu-Pa Ngeinadan leh Tawndante kepbit ahihna diing leh Political Status kichian bangchileh kingahtheih diing hi hiam chihte hun aom bang dungzui in HPF-M leh mipi paikhawmte kikupkhawmna om diing ahihman in kuapeuh in awlmoh chiat leh poimohngaih mahmah diing in ka hon chial hi. Tulai a ‘Current Issues’ Tribals-te a di’a khawk leh lauhuai zaat tuamtuam Meitei-ten hon pawkhia uh ahihman in “Pankhawm Hatna” ahi chih phawkthak chiat le’ng chi in Hill Peoples’ Forum-Manipur in mipite pangkhawm diing in ahon chial a; kuhkalna toh mipite kipumkhat diing in HPF-M in ahon ngen ngutngut petmah hi. Meitei-te’n general category a omsa zenpi, ST Status a i kiguanlut diing uh ahi chi in Scheduled Tribe Status Demand Committee of Manipur Valley min in Phualpi Sorkar ah ngetna pelu khinta uhi. Bangziak ahi diing…!! Tribals-te zong kibilsih hun ahita chih theisiam a, khanloh hun petmahta ahi hi. “Hong pai un, i ngaihtuahkhawm diing uh….”             

Sd/-

Lalthalien, Secretary
Information & Public Relation
Hill Peoples’ Forum-Manipur (HPF-M)